1 Pa kyamba kya nsiku itatu ya kuizilika, Esta waavwele ngubo yakue ya bukolo ni kuya kwimana pa musolo wa mukati wa nghanda yakua likolo wakentele lya ku nghanda yakua likolo. Likolo waali waikeele mu kitebe kyakue kya bukolo wakentele lya ku mulyango. 2 Likolo lu-aamwene nabeeza Esta waimeene pa musolo, waawamiinue ni kumuolwela kabango ka oro kaali kali mu minue yakue. Kupwako, Esta wapalama ni kukumiako. 3 Likolo waamwipuziizie nabeeza, “Ulimukukebaki? Utoneneki? Anzia kine ulikulomba nsempu ya bukolo bwane ndikukupeela.”

4 Esta wa-asukile evi, “Kine likolo wawaminua, eze lelo pamo ni Hamani ku matebeto anamuteaniizyanga.”

5 Likolo wa-anine babombi bakue nangue, “Endo mumwane Hamani alenge eze evi tukite nga mutoneene Esta. Ni kiine likolo pamo ni Hamani baile ku matebeto ateaniizie Esta.” 6 Lubaali balimukumina divai, likolo waamwanine Esta, “Nghane ki-ulimukukeba, ni kyonse ki-ulikulomba, ndikukupeela. Anzia kine ni nsempu ya bukolo bwane ulikupeelua.”

7 Esta waalandile evi, “Kandimukukeba ni kantonene kulomba ni kaka, 8 ‘Kine ngitabilue na likolo, kabili kine awaminue kun'mpeela kandikulomba, ni kukita muntoneene, nalomba likolo pamo ni Hamani bakabe kwiza ku matebeto anakaba kubatebeta lukeele. Mane nkabe kumwana likolo kandimukukeba.’ ”

9 Bobo busiku Hamani waafumine wawamiinue ni nsansa mu mutima. Inzi Hamani lu-aamwene Mordekai pa mulyango wa nghanda yakua likolo, waamufiitiilue pantu Mordekai taimeene ni kumufwinamina. 10 Anzia kyaali evio, Hamani waasipikiziizie. Kupwako, waya ku nghanda yakue, ni kukuuta babibuza bakue pamo ni mukazi wakue Zereshi. 11 Hamani waabambile kubetankila palua bulumba bwa bunonsi bwakue, ni bwingi bwa baana bakue, ni byonse bi-aakitiilue na likolo, pamo ni vi-a-alwilue mukulu pa bakindami ni pa babiloolo. 12 Kabili Hamani waatwaliliile kulanda nangue, “Nabeeza Esta takikupa muntu unge wa kuya pamo ni likolo ku matebeto a-akiba wateaniizie, inga sie nene, evi ni lukeele nkupilue pamo ni likolo ku matebeto ange.” 13 Hamani waalandile evi, “Anzia kili evio, nsizi kuwaminua lundinamona Mordekai Muyuda waikeele pa mulyango wa nghanda yakua likolo.”

14 Zereshi mukazi wakue pamo ni babibuza bakue bonse baamwanine Hamani nangue, “Tuma bantu bateanie kimuti kileepele metre 25, ni lukeele lukeelekeele ukabe kumwana likolo nangue Mordekai akulikueko, evi ukaye wawamiinue pamo ni likolo ku matebeto.”

Hamani waawamiinue na kako keebo, ni kutuma bantu bateanie kekio kimuti.