1 Kupwako, likolo ni Hamani baya kulia matebeto pamo ni nabeeza Esta. 2 Lubaali balimukumina divai busiku bwa bubili, likolo waamwipuziizie kabili nabeeza Esta nangue, “Kiulimukulomba ni kiki? Nene ndikukupeela, Ni ki-ulimukukeba ni kiki? Nene ndikukupeela. Anzia kine ni nsempu ya bukolo bwane.”

3 Nabeeza Esta waalandile nangue, “Kine ngitabilue na likolo, kabili kine awaminue kun'mpeela kandikulomba, nalomba n'mpususiiwe pamo ni bantu bane, 4 pantu nene pamo ni bantu bane tusisiiziwe kuti twinoonue, twipawe ni kuloviiwa. Kabenge nangue twakisisiiwa sie kuti tuye twali bazia, balalume ni banakazi, nga nakitalala sie. Pantu bwavia bwetu tebupalile kumwemia likolo.”

5 Likolo Ahasuero waamwipuziizie nabeeza Esta nangue, “Ozo muntu aliwakambila kukita evio nani? Alipi?”

6 Esta wa-asukile evi, “Muntu alimukutukyuzia, kabili mulwani wetu, i ozu Hamani, muntu akilile kubiipa.”

Kupwako, Hamani wamukenta likolo ni nabeeza waunvwile mwezo ukata. 7 Likolo waabuukile wafiitilue, wasia matebeto ni kuya mu bukaba bwa mu kipango. Inzi pantu Hamani wainikile nangue likolo wakeba kumwipaya, waasyele wamupaapaata nabeeza Esta amulandileko tekuti bamwipaye. 8 Likolo lu-aabweleele ku nghanda ya matebeto, waamusangile Hamani waaponeene pansi walimukwivulunga lya palia paali paikeele Esta watambaleele. Likolo waalandile evi, “Ati emwe, ozu muntu alimukukeba kumubaka nabeeza pa ntanzi yane kono ku kipango?”

Pa kyamba kya kako keebo kaalandile likolo, baamuvimbile Hamani pa menso. 9 Harbona umo wa pa babombi bamasai bakua likolo waalandile evi, “Mu nghanda mwa Hamani muli ni kimuti kileepele metre 25 ki-akiteania kumukulikako Mordekai waalandile twebo twa kupususia likolo.”

Likolo waalandile evi, “Mukulikeko ye mwine.”

10 Penka papo bamukulika Hamani ku kimuti ki-akiteaniizia Mordekai. Kupwako, kipuki kyakua likolo kyatontoloka.