1 Lwaakumeene busiku bwa lyanondo ni itatu ya mwezi wa lyanondo ni ibili, i mwezi wa Adari, busiku bwaali bwateaniiziwe kupundua ni kufikilizia mizilo yakua likolo, bobo busiku balwani ba Bayuda i bubaali baswapiile kwanzia Bayuda. Inzi bintu bya alulukile pantu Bayuda i ba-anziizie balwani babo. 2 Bobo bwenka busiku, Bayuda baakolongheene mu mizi yabo ni mu biputu bya byalo byonse bya mu kyalo kyakua likolo Ahasuero kuti basakukile balwani babo baali bakeba kubalovia. Tekwaali muntu waabakaaniizie pantu bonse baatiinine. 3 Ndabukizi yonse ya mu biputu bya kyalo pamo ni mikenzi yabo, ni bakwasi bakua likolo, baakwasiizie Bayuda pantu baali bamutiina Mordekai. 4 Mordekai wa-alukile mukulu mu nghanda yakua likolo, ni bulumba bwakue bwaakumeene mu byalo byonse, pantu buvinde bwakue bwaali bwakililako sie. 5 Ni pakako, Bayuda baumine balwani babo ni kubeepaya na bipanga. Balia baali babasuulile, Bayuda baabakitiile mubatoneene.

6 Ni mu Susani, Bayuda baipailemo balalume 500. 7 Pershandata, ni Dalfoni, ni Aspata, 8 ni Porata, ni Adalia, ni Aridata, 9 ni Parmashta, ni Arisai, ni Aridai pamo ni Waizata, 10 baana lyanondo bena Hamani mwina Hamedata mulwani wa Bayuda, ni bo baipailue. Inzi tebaatweme bintu bya balwani babo.

11 Bobo bwenka busiku likolo waaleeteelue mpendua ya bantu baipailue mu Susani. 12 Likolo waamwanine nabeeza Esta nangue, “Bayuda baipaya bantu 500 ni baana lyanondo bena Hamani mono mu Susani. Paliibufi mu binge biputu bya kyalo. Nghane kinge kiwakeba ukitilue. Nghane kiutonene kulomba upeelue.”

13 Esta waalandile evi, “Kine likolo awaminue, nalomba Bayuda bali mu Susani bapeelue nsambu ya kuti lukeele bakabe kukita nga vibakita lelo. Balia baana lyanondo bafwile bena Hamani bakabe kukulikua ku bimuti.” 14 Likolo waitabiizie kuti kikitue evio vyenka. Mpunda yaatwelue mu Susani, ni balia baana lyanondo bena Hamani baakulikilue. 15 Kabili Bayuda baakolongheene busiku bwa lyanondo ni ina ya mwezi wa Adari ni kwipaya bantu 300 mu Susani, inzi tebaatweme bintu bya balwani babo.

16 Ni Bayuda bange baali mu binge biputu bya kyalo baakolongheene kuti bekingilile ku balwani babo evi babe ni mutende. Baba ni bo baipaile bantu 75,000, inzi tebaatweme bintu bya balwani babo. 17 Bobo bwaali busiku bwa lyanondo ni itatu ya mwezi wa Adari. Inzi busiku bwa lyanondo ni ina mu ozo wenka mwezi, baatuuziizie. Bobo busiku baabukitile kuba busiku bwa nsikunkulu ni bwa nsansa. 18 Bayuda ba mu Susani ni bo baakolongheene busiku bwa lyanondo ni itatu, ni busiku bwa lyanondo ni ina. Inzi busiku bwa lyanondo ni isaano ya ozo wenka mwezi, baatuuziizie. Bobo busiku baabukitile kuba busiku bwa nsikunkulu ni bwa nsansa. 19 Ni pakako, Bayuda ba mu mizi ni ba mu tutanda, bene baali batuuzia busiku bwa lyanondo ni ina ya mwezi wa Adari. Bobo busiku i bubaakitile kuba busiku bwa nsansa ni bwa kupeelana byabupe.

20 Mordekai waalembele bintu byaakitikile, kabili waatumine mpapulo ku Bayuda bonse baali baikeele mu biputu bya kyalo bya mu kyalo kyakua likolo Ahasuero, Bayuda baali baikeele pepi ni baali baikeele kule, 21 kubakonkobezia kuti batwalilile kukita nsikunkulu kubalua mwaka pa busiku bwa lyanondo ni ina, ni pa busiku bwa lyanondo ni isaano ya mwezi wa Adari. 22 Mu bobo busiku Bayuda i bubaakwatiilemo mutende ntanzi ya balwani babo, kabili i mwezi wa-alwiluemo bulanda bwabo kuba nsansa, ni kwalula malilo abo kuba nsikunkulu. Bwa-alukile busiku bwa kupeelana byabupe ni bya kulia pamo ni kukwasiako bapabi. 23 Ni kiine Bayuda baitabiile kukita nga mubaatendekeele, ni muba-aniinue na Mordekai.

24 ✡9.24: Est 3.7Pantu Hamani mwina Hamedata Muagagi, mulwani wa Bayuda bonse, waali wakambila kubeepaya ni kubalovia, kabili baateele puri, i kuteya bubale, kuti abapue ni kubalovia. 25 Inzi likolo lu-aabwililue, waapeene nsambu ya kulemba mpapulo ilandile nangue kukonkana ni mapange abi akua Hamani a kukambila kulovia Bayuda, ezio nkambilo imubwelelele ye mwine, ni baana bakue bakulikue ku bimuti. 26 Ni pakako, bobo busiku bwa nsikunkulu baabwinikile Purimu bafumiizie ku liina lya puri. Kyaali pa mulandu wa lupapulo lwaalembele Mordekai, ni pa mulandu wa bintu bibaamwene, ni pa mulandu wa bintu byaabakitikiile. 27 Bayuda, ni nvyalo yabo, pamo ni bonse bailundileko, ezio nsiku ibili ya nsikunkulu baisungile ni kwikita kuba mbeela yabo kubalua mwaka pa musita wakue pasili kulekela. 28 Ezio nsikunkulu ipalile ikabe yalangulukua lyonse pasili kulekela. Nvyalo yonse, ni mikowa yonse ili mu biputu bya kyalo, ni ili mu mizi, bapalile kuya balanguluka lyonse bobo busiku bwa Purimu.

29 Nabeeza Esta mwina Abihaili, pamo ni Mordekai Muyuda, baalembele bakonkobeziizie mu lolu lupapulo lwa bubili palua Purimu. 30 Lupapulo lwaalembelue ni kutwalua ku Bayuda bonse mu biputu bya kyalo 127 bya mu bukolo bwakua likolo Ahasuero. Mu lupapulo mwaali twebo twa mutende ni twa kisinka, 31 pakuti bakonkobezie ezio nsiku ya Purimu pa musita wakue, nga mwaalandiile Mordekai Muyuda ni nabeeza Esta, kabili ni kubakonkobezia palua kuizilika ni kulila, bene pamo ni nvyalo yabo. 32 Mwano wakua Esta waakilile kukonkobezia palua Purimu, ni kulembua mu kitabu kya bintu byaali byakitika.