1 Inzi Musa waamukanzile Leza paakale walanda nangue, “Ale kyaakaba syani kine masiiko a Baizraeli aya kukaana kungitabila ao kunghunvua ni kunghana nangue Yawe takikumonekela?”

2 Yawe waamwipuziizie nangue, “Ukweteki ku minue yobe?”

Wa-asukile evi, “Nkwete kabango.”

3 Inzi Yawe waamwanine nangue, “Pooza kabango pansi.” Musa lu-aapoozele pansi, kabango ka-alukile kizoka, ni Musa waiseeluka. 4 Kupwako Yawe wamwana Musa nangue, “Ale olola kuboko kobe ukwate ku mukila.” Musa waolola kuboko kwakue, wakikwata, ni kyo kya-aluka kabango paakale mu minue yakue. 5 Leza waamwanine Musa nangue, “Kaka kalangi i kakuti ukakite pakuti bakabe kwitabila nangue ne Yawe Leza wa babikolue babo, Leza wakua Abrahamu, Leza wakua Izaaki, ni Leza wakua Yakobo nakikumonekela.”

6 Kabili Yawe waamwanine Musa nangue, “Ale biika kuboko kobe mu nkanzu lya pa nkulo yobe.” Musa waabiikile kuboko kwakue mu nkanzu lya pa nkulo yakue. Lu-aafumiiziemo, kuboko kwa-alukile ni tembue ni kusweta nga kibue. 7 Yawe waamwanine nangue, “Kabili biika kuboko kobe mu nkanzu lya pa nkulo yobe.” Ni ye waabiikile kuboko kwakue mu nkanzu lya pa nkulo yakue. Lu-aafumiiziemo, kuboko kwa-alukile nga vikwaali pa mambo. 8 Yawe waamwanine nangue, “Kine tebakaba kukwitabila ao kukunvua pa kapapo ka mambo, bakaba kwitabila pa kapapo ka bubili. 9 Kine tebakaba kwitabila totu tupapo tubili, ao kukunvua, wakaba kutapula menda mu Mwenzi wa Nile ni kwitila pansi, ni menda awakaba kutapula mu mwenzi akaba kwaluka mulopa.”

10 Musa waamupaapaatile Yawe walanda, “We Yawe, nene nsimanine kulanda bwino bwino pantu umanine kisinka nangue kutula musita uwakibamba kulanda na nene, ndinameemeetela.”

11 Yawe waamwipuziizie Musa nangue, “Eba, nani waalengele kanua ka muntu? Nani aliwalengia muntu kulanda ao kuba kameme? Nani aliwalengia muntu kunvua ao kuba mpokoto? Nani aliwalengia muntu kumona ao kuba mpofu? Kubako te nene Yawe? 12 Ale endo waya, ndikuba nobe mu kulanda, ni kukusambilizia viupalile kulanda.”

13 Inzi kabili Musa waamupaapaatile Yawe walanda, “We Yawe nakupaapaata utumeko sie unge.”

14 Yawe waamufiitiilue Musa walanda nangue, “Eba, kubako wewe teuli na mukuluubo Haruni wa mu mukowa wa Balawi? N'manine nangue wene kuti walanda bwino. Ni evi vyenka alimukwiza kusaakaana nobe, musita u-alikukumona alikuwaminua. 15 Wewe ulikuyawalanda nakue ni kubiika twebo mu kanua kakue. Mwe babili nakaba kumikwasia kulanda, nene nakaba kumisambilizia kimupalile kukita. 16 Haruni i wakaba kuya wakulandila ku Baizraeli pantu i wakaba kuya wali kanua kobe. Wewe wakaba kuya wali nga Leza kuli wene mu kumubwila bi-upalile kulanda. 17 Twama kaka kabango mu minue yobe evi uye wakabombia kukitilako toto tupapo.”

18 Musa i lu-aabweleele kuli sevyala Yetoro ni kumwana nangue, “Nakupaapaata un'mpeele nsambu ya kubwelela ku lupua lwane luli mu Misri, pantu nsimanine kine bakikosele.” Yetoro waamwasukile evi, “Kili sie bwino, ale iilapo bwino.”

19 Musa lu-aali wakili mu kyalo kya Midiani, Yawe waamwanine nangue, “Bwelela ku Misri pantu balia baali baumiine kukwipaya bakifua.” 20 Kupwako, Musa wamutwama mukazi ni baana bakue balalume, wabasezia pa punda ni kubwelela ku kyalo kya Misri, watwama ni kabango kabiikiluemo buvinde na Leza*4.20 kabango kabiikiluemo buvinde na Leza Kabango kakua Leza mu minue yakue.

21 Yawe waamwanine Musa nangue, “Paukaba kubwela ku Misri, ukabe kuya kukita tupapo tonse ntanzi yakua Farao na buvinde bunakikupeela. Inzi nakaba kukosia mutima wakue, evi tekuti akabe kulekeela Baizraeli kuya. 22 Kabili ukabe kumwana Farao nangue ne Yawe nalanda evi, ‘Izraeli i mwana wane mwalalune, kabili i libeli wane. 23 ✡4.23: Kuf 12.29Nakwana umuleke mwana wane kuti aye an'mpupe. Kine wamukaanina kuya, nakaba kwipaya mwana mwalalume, libeli obe.’ ”

24 Musa ni lupua lwakue lubaali bakili mu nzila balimukuya ku Misri, baafikile pa nghanda ya bweni pakuti balaale. Musita wa busiku, Yawe waile pali Musa wakebele kumwipaya. 25-26 Sipora muka Musa waabuulile libue litwile, wamuteeta yando mwana wakue mwalalume ni kupooza mpapa ku makasa†4.25-26 makasa: Aza malembo ku “makasa” ku bange bobu ni bulanzi bwa mukinzi pasili kuzimbula bya nvwalo. akua Musa walimukulanda evi, “Kisinka wewe uli syabuinga wa mulopa kuli nene.” Ni pakako, Yawe taamukitiile Musa kintu kibiipile. Sipora waalandile evi, “Wewe uli syabuinga wa mulopa pa mulandu wa kuteeta yando.”

27 Yawe waamwanine Haruni nangue, “Endo usaakaane ni Musa mu kaseeba.” Haruni waile kusaakaana nakue ku lupili lwakua Leza ni kumukumbatila. 28 Musa waamwanine Haruni twebo tonse tu-aatuminue na Yawe kuti alande, kabili waamwanine tupapo tu-aali wa-aninue kukita. 29 Kupwako, Musa ni Haruni baya mu Misri, bakolonghania masiiko onse a Baizraeli. 30 Haruni waabaanine twebo tonse twakua Yawe twa-aninue Musa, waakitile tupapo ntanzi ya bantu, 31 ni bo baazumiine. Kabili lubaunvwile nangue Yawe waali wapoozele maano ku Baizraeli ni kumona lyemo lyabo, baakontamikile mitue yabo ni kumupupa.