1 Yawe waamwanine Musa nangue, 2 “Ana Baizraeli bandeetele bupe. Kubalua bupe bubalikufumia mutoneene mitima yabo, i bwa kuti mupokelele. 3 Bupe buwakaba kupokelela ni bobu: Oro, ni mutofue, ni mukuba, 4 ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme, ni masako a mbuzi, 5 ni kipapa kya mpanga kisubilueko mukumino wa kasi, ni kipapa kya kipomo, ni kimuti kya kasiiya, 6 ni mafuta a mizeituni a mu litala, ni manukato a kubiika ku mafuta azuuke, ni ku bubaani buweme, 7 ni mabue a oniksi, pamo ni mabue a kubiika ku efodi ni ku mufuko wa pa nkulo wakua Kitambua Mukulu. 8 Kabili bakankitile liema lizuuke, evi nkabe naikeele pakati kabo. 9 Bapalile kunghimikila Tabernakulo ni kukita kubalua kantu nga mundikukwanina.

10 “Baane bakakite lisanduku lya mbao ya kimuti kya kasiiya. Likabe lyaleepele metre imo ni santimetre 25, mu bukata likabe lyatanine santimetre 75, ni mu kutuuluka likabe lyatuulukile santimetre 75, 11 kabili bakakupeako oro isambikile mukati ni panze. Mumbali bakabe kuzyungulusiamo lufito lwa oro. 12 Bakakite bikobo bina bya oro ni kubibiika ku tufuli tuna twa lisanduku. Bibili ku bwala bumo ni bibili ku bunge bwala. 13 Kabili bakakite mipingo ibili ya kimuti kya kasiiya ni kukupako oro. 14 Mipingo ya kupingilako bakabe kwi-ingizia mu bikobo bya ku lisanduku kumbali yonse ibili. 15 Ezio mipingo ikabe yaikaliliile sie mu bikobo bya lisanduku pasili kufumiamo. 16 Mu lelio lisanduku ukabiikemo bibazu bibili bya mabue binakaba kukupeela, papo palembelue mizilo.

17 ✡25.17: Bae 9.5“Bakakite ntupiko ya oro isambikile. Ezio ntupiko ikabe yaleepele metre imo ni santimetre 25, ni mu bukata santimetre 75. 18 Bakakite makerubi abili atililue bwino ali a oro, ni kuemika ku mpeleezio ibili ya ntupiko mu kuleepa. 19 Bakakite likerubi limo ku mpeleezio imo, ni linge ku inge mpeleezio. Azo makerubi akabe akitiliilue ku ntupiko ku mpeleezio yakue ibili. 20 Azo makerubi akabe alendwile mapaapi abo mu muulu lya pa ntupiko akupilile lisanduku, ni nkebu yabo yakenteene lya pa ntupiko. 21 Mu lisanduku ukabiikemo belia bibazu bibili bya mabue binaakakapeela ni kutupikilapo ntupiko. 22 Papo i panaakaba nasaakaana nobe, kabili i panaakaba nalanda nobe peulu ntupiko, pa bukata bwa azo makerubi abili ali peulu Lisanduku lya Kipingo, ni kulanda nobe palua mafunde onse akuti ukabe wabaana Baizraeli.

23 “Bakakite meza ya kimuti kya kasiiya ileepele metre imo ni mu bukata yatanine santimetre 50, ni mu kutuuluka ikabe yatuulukile santimetre 75. 24 Bakakupeko oro isambikile, ni mumbali bakazyungulusiamo lufito lwa oro. 25 Bakazyungulusie lufito lwatuulukile santimetre mwanda, kusyali kupisia ni mukovio wa oro ku lufito. 26 Bakakite bikobo bina bya oro ni kubibiika ku tufuli tuna twa meza lya palia pabeeleele mikonzo. 27 Bakabiike bikobo pepi na mbao ya pa muulu. Momo i mwakwingizia mipingo ya kupingilako meza. 28 Bakakite mipingo ya kimuti kya kasiiya ni kukupako oro. Ezio mipingo ikabe ya kupingilako meza. 29 Bakakite masaani, ni mpindi, ni bibakuli pamo ni makopo a kubombia ku bupe bwa bya kumina. Bebio bibombelo byonse bya pa meza bakakite byali bya oro isambikile. 30 ✡25.30: Bal 24.5-8Ukabiike ni mikate ya kilangililo pa meza ya kuti ikabe yali pa ntanzi yane lyonse.

31 “Bakakite kya kuteekapo matala kya oro itililue yasambikile bwino. Kya kwimikapo pamo ni mukonzo wakue, ni tubakuli twakue twali nga maluba, ni mapingu akue pamo ni maani akue, bikabe byalundeene kumo. 32 Ku ozo mukonzo umo kukabe kwafumine misambo mutanda. Misambo itatu ku bwala bumo, ni inge itatu ku bunge bwala. 33 Ku musambo umo kukabe kwali tubakuli tutatu tuli nga maluba a almonde ali ni mapingu pamo ni maani a azo enka maluba. Ku musambo unge ni ko bakakiteko evio vyenka mpaka ku misambo yonse mutanda yakaba yafumine ku ozo mukonzo. 34 Ni ku mukonzo wa pa bukata uli pa kya kuteekapo kuye kwali tubakuli tuna tuli nga maluba a almonde ni mapingu pamo ni maani a azo enka maluba. 35 Ntanzi ya kufika pa misambo ibili pakabe lipingu lya liluba limo. Kikabe kyali evio ku misambo ibili ya mambo, ni ku misambo ibili ya bubili, pamo ni ku misambo ibili ya butatu. 36 Mukonzo ni misambo yakue yonse bikabe byakitiliilue kumo ni kya kuteekapo. Kyonse kikabe kyali kya oro itililue yasambikile. 37 Bakakite azo matala kilooba ni ku-aleemia kuti akabe asanikiile ku ntanzi. 38 Bakakite nmano pamo ni bisaani bya kekio kya kuteekapo matala, bebio byonse bikabe byali bya oro isambikile. 39 Bakakite kya kuteekapo matala pamo ni bibombelo byonse na kilo 35 ya oro isambikile. 40 ✡25.40: Mii 7.44; Bae 8.5Poozako maano kuti bakakite kubalua kantu nga vinaakulangisiizia ku lupili.