1 Abramu lu-aakumaniizie myaka 99, Yawe waamumonekeele ni kumwana nangue, “Nene ndi Leza wa Maka onse, enda ku ntanzi yane ni kuba wapwililikile. 2 Ni ne naakakita kipingo kyane pakati kane ni wewe, kabili naakakila kusandulula nvyalo yobe.” 3 Kupwako, Abramu walaala kyuba, ni Leza waamwana nangue, 4 “Nene nakita kipingo ni wewe, ni we waakaba kikolue wa ntundu ingi. 5 ✡17.5: Bar 4.17Teukikakuutua kabili Abramu, inzi waya wasyakuutua Abrahamu pantu nakukita kuba kikolue wa ntundu ingi. 6 Naakavuzia nvyalo yobe, naakakukita kuba ntundu, ni makolo aakafuma muli wewe.

7 ✡17.7: Lk 1.55“Naakeemika kipingo pakati kane ni wewe, ni pakati ka nvyalo yobe ya ku ntanzi pamo ni nvyalo yabo kuti kikabe kipingo kya muyayaya. Pantu naakaba Leza obe, ni Leza wa luvyalo lobe lwa ku ntanzi. 8 ✡17.8: Mii 7.5Keki kyalo kimwikeelemo mwali baeni, kyalo kyonse kya Kanaani, naakakupeela wewe pamo ni luvyalo lobe lwa ku ntanzi kuba bupyani bwa muyayaya, ni nene naakaba Leza wabo.”

9 Leza waamwanine Abrahamu, “Ni we ukasunge bwino kipingo kyane, wewe pamo ni luvyalo lobe lwa ku ntanzi pamo ni nvyalo yabo. 10 ✡17.10: Mii 7.8; Bar 4.11Ni keki i kipingo kimwakaba kusunga pakati kenu, wewe ni luvyalo lobe lwa ku ntanzi. Kubalua mwalalume pakati kenu apalile kuteetua yando. 11 Mukabe mwateeta yando. Kaka i kaakaba kalangi ka kipingo pakati kane ni mwemue. 12 Mwana mwalalume wa nsiku mwanda pakati kenu apalile kuteetua yando, pamo ni olia avyelue mu nghanda yobe ao asitilue na nfolanga, ni kubalua mweni asili wa mu luvyalo lobe. 13 Olia avyelue mu nghanda yobe, ni asitilue na nfolanga yobe apalile kuteetua yando, kako i kalangi kaakaba ku mibili yenu, kalangi ka kipingo kyane kya muyayaya. 14 Ni mwalalume asiteetelue yando, waakafumiiwa pa ba kwakue pantu enoonene kipingo kyane.”

15 Leza waamwanine Abrahamu nangue, “Sarai mukazi obe teukiya wamukuuta Sarai, inzi waya wasyamukuutua Sara. 16 Naakamupaala, kabili naakakupeela mwana kupitila muli wene. Naakamupaala, ni ye waakaba nghina wa ntundu, ni makolo a bantu aakafuma muli wene.”

17 Abrahamu waaponene kyuba, waasekele ni kulandila mu mutima nangue, “Ati emwe! Ni kiine muntu wasyali na myaka 100 kuti wavyala ni mwana? Ni Sara ozu asyali na myaka 90 kuti wavyala?” 18 Abrahamu waamwanine Leza nangue, “Kansi nga wamuleka Isimaeli apokelele bulayo bobe.”

19 Inzi Leza waamwanine evi, “Ata, mukazi obe Sara waakakuvyalila mwana mwalalume, ni wewe waakamwinika liina lyakue Izaaki. Naakeemika sinta kipingo kyane pali wene ni nvyalo yakue kuti kikabe kya muyayaya. 20 Ni palwakua Isimaeli, nakikunvua. Naakamupaala ni kumusandulula. Kabili naakakila kumuvuzia. Waakavyala bakulu lyanondo ni babili, kabili naakamukita kuba mutundu ukata. 21 Inzi keki kipingo kyane naakakiimika sinta na Izaaki uwaakavyalilua na Sara pa musita nga ono ozu mwaka ulimukwiza.” 22 Kupwako, Leza walekela kulanda na Abrahamu, wamusia.

23 Bobo bwenka busiku, Abrahamu waamutweme Isimaeli pamo ni bonse baavyaliilue mu nghanda yakue, ni bonse baasitilue na nfolanga yakue, balalume bonse ba mu nghanda yakua Abrahamu, ni kuya kubateeta yando nga mwa-aniinue na Leza. 24 Abrahamu waateetelue yando wasyali na myaka 99. 25 Mwana wakue Isimaeli ni ye waateetelue yando wasyali na myaka 13. 26 Bobo bwenka busiku Abrahamu ni Isimaeli mwana wakue baateetelue yando. 27 Bantu bonse ba mu nghanda yakue, pamo ni baavyaliilue mu nghanda yakue, ni baasitilue na nfolanga ku baeni, baateetelue yando pamo nakue busiku bumo.