1 Yakobo waunvwile baana balalume bena Labani balanda nangue, “Mwamona! Yakobo watwama bunonsi bonse bwakua situe. Bobu bunonsi bonse wanonkela mu bunonsi bwakua situe.” 2 Yakobo waamwene lukebu lwakua Labani tekuba lwali nga vilwaali pa mambo. 3 Yawe waamwanine Yakobo, “Bwelela mu kyalo kya babikolue bobe uye wikale kwikeele bantu bobe, ni nene naakaba naali pamo nobe.”

4 Yakobo waamukuutile Rakeli ni Lea beze basaakaane nakue ku kisonso kwaali kwali bisepe byakue. 5 Waabaanine evi, “Namona lukebu lwakua sinue tekuba lwali nga vilwaali pa mambo. Inzi Leza wakua tawe ali pamo nane. 6 Kabili mumanine bwino nangue nene naamubombeele sinue na maka ane onse. 7 Sinue wan'mbiibikiziizie ni kwalulula nsazio yane nghendo lyanondo, inzi Leza wandabukiile. 8 Labani lu-aalandile nangue mikooko ya mabala mabala i yaakaba nsazio yobe, kisepe kyonse kyaavyele twana twa mabala mabala. Kabili lu-aalandile nangue ya mingoloozio i yaakaba nsazio yobe, kisepe kyonse kyaavyele twana twa mingoloozio. 9 Evi Leza i vi-aan'mpeele bisepe bi-aafumiizie mu bisepe byakua sinue.

10 “Musita wakuti ezi nama iimite, naalootele nama ndume ya mabala mabala ni ya mingoloozio pamo ni ya mantolintoli yalimukusela pa ikota. 11 Naalootele malaika wankuuta nangue, ‘Yakobo.’ Ni nene na-asukile, ‘Ne ono pano.’ 12 Wanghanine evi, ‘Mona,’ nama ndume yonse ya ezi nama i uliwasunga, ilimukusela pa ikota yali ni mabala mabala, ni mingoloozio, ni mantolintoli. Nakita evi pantu n'mwene Labani vi-alimukukubiibikizia. 13 ✡31.13: Kut 28.18-22Nene ndi Leza waakumwenekeele ku Beteli lolia luwaapongweleele mafuta a mizeituni pa libue liwaasaamiinepo ni kundaya. Ale bwelela ku kyalo ku waavyaliilue.”

14 Rakeli ni Lea baamwanine evi, “Fwefue tetukili na kantu kakuti tukapyane mu nghanda yakua Situe. 15 Fwefue tupendelue sie nga baeni mu nghanda yakua situe. Wene waatusisiizie, ni nfolanga yonse waaliile sie bunke. 16 Bobu bunonsi bobe bonse buuli nabo bwaabuulile Leza pa bunonsi bwakua situe, i bunonsi bwetu pamo ni baana betu. Wewe kita sie kyonse kyakikwana Leza.”

17 Kupwako, Yakobo wasezia baana bakue pamo ni bakazi bakue peulu nghamia. 18 Mu lwendo lwakue lwa kubwelela kuli se mu kyalo kya Kanaani, waile ni biteekua byakue byonse pamo ni bunonsi bwakue bonse bu-aanonkele ku Padani-Aramu. 19 Labani lu-aali waile ku kutebula masako a mikooko yakue, Rakeli waibile baleza bakua se. 20 Yakobo waamuzembulukile Labani Muaramea pasili kumulaya. 21 Yakobo waatweme bintu byakue byonse waya. Lu-aile kwabuka mwenzi wa Efrati, waile walungheeme lya ku kyalo kya mpili kya Gileadi.

22 Pa busiku bwa butatu, Labani waabwililue nangue Yakobo wakibutuka. 23 Waile pamo ni ba kwakue wamukonkele Yakobo. Busiku bwa kilooba, waile kumusanga mu kyalo kya mpili kya Gileadi. 24 Leza waizile kumwana Labani Muaramea mu kilooto musita wa busiku nangue, “Kengela, tekwezia kumwana Yakobo kantu kaweme ao kabiipile.” 25 Labani lu-aamusangile Yakobo, Yakobo waali waimikile liema lyakue mu kyalo kya mpili kya Gileadi, Labani ni bantu bakue ni ye waimikile liema mu kyalo kya mpili kya Gileadi.

26 Labani waamwanine Yakobo, “Wakinzembulukilaki watwama ni baana bane banakazi nga banakazi bakwetue ku bului? 27 Ale wakinzembulukilaki pasili kunghana? Pantu unghanenge, nga nakikulaya bwino. Nga pakiimbua nghimbo ni kombua nghoma pamo ni kulizia bilimba. 28 Kabili tewakin'mpeela nsambu ya kubalaya nabakumbatila benzikulu bane pamo ni baana bane. Waakikita bintu bimo bya bulubi. 29 Nene ndi ni nsambu ya kukukitila kintu kibiipile, inzi Leza wakua so wakinsoka lukeele busiku kuti nkengele, kabili tekuti nkwane kantu kaweme ao kabiipile. 30 N'manine nangue uli ni nkulu ya kubwelela kuli so. Ale kiwakiibila baleza bane ni kiki?”

31 Yakobo waamwasukile evi, “Nakitiina kukulaya pantu nakimona nangue pange kuti wan'mpoka baana bobe bakazyana mu maka. 32 Kansi kine wasangapo umo pakati ketu wali ni babo baleza bobe, tapalile kuba mukose. Ale iza umone kine pali ni kintu kyobe, kine pakili ukitwame.” Yakobo waalandile evio pantu taali wamanine nangue Rakeli i waali waibile baleza bakua Labani.

33 Kupwako, Labani waingila mu liema lyakua Yakobo, ni mu liema lyakua Lea, ni mu liema lya babombi babili banakazi. Momo taasangilemo baleza bakue. Kabili waile kwingila ni mu liema lyakua Rakeli. 34 Rakeli i waali watweme babo baleza ba mu nghanda ni kuya wababiikile pensina mpapa i-aali wapanzikile pa nghamia ni kuya waikeelepo. Labani waakebele mu maema onse pasili kumona. 35 Rakeli waamwanine se nangue, “We tawe, tekunfiitilua pantu nsimeene pa ntanzi yobe. Ndimukutiina kwimana pantu ndwele malwele a banakazi.” Labani waakilile kukeba pasili kusanga baleza bakue.

36 Yakobo waakilile kufiitua. Waalandile evi, “Eba, nene nakikuluviaki pakuti wize wankonkele wafiitilue mu ozu musango?” 37 Mu bintu byane byonse biwakebamo, kine wasangamo kintu kyobe, kibiike papa kimonue na bantu bobe ni bantu bane, evi batupingule kine nani ali ni nsambu. 38 Nakiikala nobe myaka 20. Mikooko yobe ao mbuzi yobe teyaapulumwine ata livumo, kabili nsyaaliilepo mpanga wa pa bisepe byobe. 39 Naali nakita kine mukooko waipawa na kinama, napyanikiziapo unge. Nsyaali nakuleetela ni kukwana nangue te kilubo kyane. Mikooko yonse yaali yaibua musita wa koba ni musita wa busiku, waali wanomba kuti nkubweziizie. 40 Musita wa koba naali nazia na lyuza, ni musita wa busiku naali naumina na kasama. Nsyaali nalaala. 41 Evi i vinaemene myaka yonse 20 naali mu nghanda yobe. Pakuti ungufie baana bobe babili, naakubombeele myaka lyanondo ni ina. Kabili naakubombeele myaka mutanda pakuti un'mpeele bisepe bya nama anzia kine waali wa-alulula alulula sie nsazio yane nghendo yonse lyanondo. 42 Kabenge Leza wakua tawe ni Leza wakua Abrahamu, Leza waatiininue na Izaaki, tekuba wali pamo nane, kisinka wewe nga wankumbile kale pasili kun'mpeela kantu. Inzi Leza waamwene maavia ane ni kubomba kunaakubombeele. Kabili wakikusoka lukeele busiku.

43 Labani waamwanine Yakobo, “Babo baana banakazi, ni bane. Baana babo ni bo ni bane, ni bebi bisepe ni byo ni byane. Bebi byonse bi umwene ni byane. Inzi evi nsili na buvinde bwa kusunga babo baana bane pamo ni benzikulu. 44 Kansi evi, twende tupinghane pakuti kiye kyali kisininkizio pakati kobe ni nene.”

45 Kupwako, Yakobo wabuula libue ni kuliimika nga lipumpu. 46 Yakobo waabaanine bantu bakue batoole mabue ni ku-atuulika pepi na lelio libue. Kupwako, Yakobo ni Labani babamba kulia baikeele mumbali mabue. 47 Pa ezi nkendo Labani waapeenikile Yegari-Sahaduta.*31.47 Yegari-Sahaduta Leli liina lili mu Kiaramaika i kulanda nangue mului wa mabue wa kutusininkizia. Inzi Yakobo wene waapeenikile Galedi.†31.47 Galedi Leli liina lili mu Kiebrania i kulanda nangue mului wa mabue wa kutusininkizia. 48 Labani waamwanine Yakobo, “Aza mabue i-aakaba kisininkizio kyetu bonse babili.” Ni pakako, ozo mului wainikilue Galedi, 49 ni lelia libue ni lyo lyainikilue Misipa.‡31.49 Misipa Leli liina mu Kiebrania i kulanda nangue lupungu. Pantu Labani waalandile nangue, “Yawe aye watukenteleele fwe bonse babili pa tukalekana.” 50 Labani waalandile evi, “Kine ukeemie baana bane banakazi ao kuupilapo bange, anzia kine ne nsikaba namanine, ukamane sie nangue Leza i musininkizi pakati ketu.” 51 Labani waamwanine Yakobo, “Mona ozu mului wa mabue ni lipumpu linakiimika pakati kobe ni nene. 52 Ozu mului pamo ni leli lipumpu biye byali kisininkizio kya kulangulukilako nangue nene nsikataaluka ozu mului ni kwiza kukusakukila, ao wewe kutaaluka ozu mului ni kwiza kunsakukila. 53 Leza wakua Abrahamu ni Leza wakua Nahori, ni Leza wa babikolue babo, akatupingule fwe bonse babili.”

Yakobo waalapile mu Liina lyakua Leza aliwatiinua na se Izaaki. 54 Yakobo waipaile nama ni kwelela peulu lupili, kabili waakupile bantu bakue kuti balie nakue ozo munani. Pa kyamba, baaleele penka papo peulu lupili. 55 Labani lu-aabuukile paakili lukeelekeele, waakumbatiile baana bakue pamo ni benzikulu ni kubaana bailepo bwino. Kupwako, Labani wabwelela kwakue.