1 Yusufu waatwelue ku Misri. Potifari wa ku Misri, kiloolo wakua likolo, mukulu wa bakalinda, i waamusitile Yusufu ku Baisimaeli baamutwele koko. 2 ✡39.2: Mii 7.9Yawe waali pamo ni Yusufu ni kumupaala mu byonse bi-aali wakita mu nghanda yakua selenzi Mumisri. 3 Potifari wainikile nangue Yawe waali wali pamo ni Yusufu, kabili nangue waali wapaalilue mu byonse bi-aali wakita. 4 Potifari waawamiinue sana mpaka wamupeela Yusufu mwilo wa kulabukila nghanda yakue pamo ni bintu byonse bi-aali nabio. 5 Kutula musita u-aabiikilue kuba ndabukizi wa mu nghanda yakua Potifari ni wa bintu byonse bi-aali nabio, Yawe waapaalile nghanda yakua Potifari pa mulandu wakua Yusufu, ni kupaala bintu byonse bi-aali nabio mu nghanda ni mu makaba. 6 Waasiile bintu byonse mu maboko akua Yusufu, kabili taapoozeleko maano ku bintu byakue, inga sie ku bilio bi-aali walia

Ni Yusufu waali ni mibeele iweme, ni lukebu lwaweme. 7 Pa kyamba kya bebi byonse, muka Potifari waamutokeemue Yusufu ni kumwana alaale nakue. 8 Inzi wene waakeene wamwana muka Potifari nangue, “Potifari tamanine bintu bindi nabio mono mu nghanda, wene an'mpeele nsambu ya kusunga byonse. 9 Mu eno nghanda temuli unge ankilile pa nsambu in'mpeelue, kabili n'mpeelue nsambu pa bintu byonse kufumiako sie wewe pantu uli mukazi wakue. Ale ndikukitilaki kintu kibiipile evi ni kumuluvia Leza?” 10 Anzia kine waali wamukebakeba sie kubalua busiku, wene taamwitabiizie kuti alaale nakue ao kuba pamo nakue.

11 Busiku bumo Yusufu lu-aingiile mu nghanda mu kubomba miilo yakue, ozo musita mu nghanda temwaali ata mubombi unge. 12 Muka Potifari waamukwete ku ngubo wamwana nangue, “Iza ulaala ni nene!” Yusufu waifompwele, wabutukila panze ni kumusia wakwete ngubo yakue. 13 Muka Potifari lu-aamwene nangue Yusufu wabutukila panze, ni ye wasyala sie wakwete ngubo yakua Yusufu mu minue, 14 waapundile wakuuta bantu ba mu nghanda yakue wabaana nangue, “Mone, waaleetele Muebrania kono kwetu kuti atuleebule! Wakiba waumiine kulaala ni nene, inzi nene nasamunanga na maka, 15 ni ye lu-aunvwanga nasamuna, wabutukilanga panze ni kunsiila ngubo yakue.”

16 Muka Potifari waasungile ngubo yakua Yusufu mpaka lwaizile mulume wakue. 17 Waamwanine mulume wakue lyasi lyonse nangue, “Ozu Muebrania muzia uwaatuleeteele, wakinghingilila wakebele kulaala ni nene. 18 Inzi lunakisamuna, wakibutukila panze ni kunsiila ngubo yakue.”

19 Mulume wakue Potifari lu-aunvwile bi-aabwililue na mukazi wakue nangue i vyakikita mubombi wakue, waafiitilue sana. 20 Potifari waamutweme ni kumukaka mu buloko mwaali mwakakilue bakakua bakua likolo. 21 ✡39.21: Mii 7.9Inzi Yawe waali wali pamo ni Yusufu ni kumulangisia ntono yakue ikata, evi mukulu wa buloko aye wawamiinue na Yusufu. 22 Kalinda wa buloko waamupeele Yusufu bukulu pa bakakua bonse, ni byonse bibaali bakita papo, wene i waali watantika. 23 Kalinda wa buloko taapoozeleko maano ku bintu byaali byatantika Yusufu pantu Yawe waali wali pamo nakue. Ni byonse bi-aali wakita, Yawe waali wabipaalile.