1 Yusufu waipoozele pali se ni kubamba kumulila wamukumbatiile. 2 Yusufu wa-anine babombi bakue bakondapa, basube mubili wakua se na mafuta tekuti ubole. 3 Baapwile nsiku 40 bamusuba mafuta akusibola. Bamisri baamulilile nsiku 70.

4 Nsiku ya kumulila luyaapitile, Yusufu waabaanine babiloolo bakua Farao nangue, “Kine kuti mwangitabizia, namipaapaata muye mumwane Farao nangue, 5 ✡50.5: Kut 47.29-31‘Tawe lu-aali wasyafua, wanghanine nkaye nkamuziike mu kilibu ki-aateaniizie mu kyalo kya Kanaani. Ni pakako, namilomba mun'mpeele nsambu ya kuya kuziika tawe, mane kabili nkabe kubwela.’ ”

6 Farao waamwanine evi, “Endo umuziike so nga mu-aakwaniine.”

7 Kupwako, Yusufu wasela ku Kanaani, waya kumuziika se. Babiloolo bonse bakua likolo, ni babikolue ba Baizraeli pamo ni babikolue ba Bamisri, baile pamo nakue. 8 Lupua lwakue lonse, ni bakuluube pamo ni bange bonse ba mu lupua lwakua se baile pamo nakue. Mu Goseni mwaasyele sie baana babo, ni mikooko yabo, ni mbuzi pamo ni nghombe. 9 Bantu baali baselele mu matyakala ni baali baselele pa punda, baile pamo nakue. Lyaali lyali libumba likata sana.

10 Lubaafikile ku Atadi pa nkendo ya kupupiiziapo lya ku kabanga ka Yordani, paapitile musita ukata balimukulila muzowa ukata. Yusufu pamo ni bange baamulilile se nsiku kilooba. 11 Bekazi ba mu Kanaani lubaamwene babo bantu balimukulila ku Atadi baalandile evi, “Azo malilo onvwikile, ni malilo akata a Bamisri!” Pa ezio nkendo i kipalipakuutilua Abeli-Misuraimu, ili ku bwala Yordani.

12 Baana bakue baamukitiile nga mu-aabaaniine. 13 ✡50.13: Mii 7.16Baamutweme ni kuya kumuziika mu kilibu kya ku Makipela lya ku kabanga ka Mamure, kilibu kyaasitile Abrahamu pamo ni bukaba kuli Efuroni Muhiti, pakuti ibe nkendo ya kuziikamo bantu bakue. 14 Yusufu lu-aapwile kumuziika se, waabweleele ku Misri ni bakuluube bonse pamo ni bonse baile pamo nakue.

15 Bakuluube kwa Yusufu lubaamwene nangue sibo wafua, baalandile evi, “Pange Yusufu waakaba kutusuula ni kutukitila kibwelezi kya belia byonse bitwaamukitiile.” 16 Ni pakako baatumine mpunda kuli Yusufu ya kulanda nangue, “So lu-aali tanaafue waatukonkobeziizie walanda, 17 Mukabe kuya kumwana Yusufu nangue, ‘Nakupaapaata weleele bubi bwa bakuluubo bubaakuluviizie.’ Ni pakako, twakupaapaata weleele bubi bwa babombi bakua Leza wakua so.” Mpunda Luyaamufikiile, Yusufu waalilile.

18 Bakuluube baile kumukontamina balanda nangue, “Ewe, mona fwefue tuli babombi bobe.”

19 Inzi Yusufu waabaanine evi, “Tekutiine! Nene nsili na nsambu ya kwalula bintu bitantikile Leza. 20 Mwemue mwantekeele kilie kya kunkitila bintu bibiipile, inzi Leza waatonene kuti mapange akue aweme akitue, mapange a kupususia bantu bengi nga vikili lelo. 21 Kansi evi tekutiine. Nakaba kumiliisia, mwemue pamo ni baana benu.” Waabakoseleziizie ni kulanda nabo bwino bwino.

22 Yusufu waatwaliliile kwikala mu Misri pamo ni lupua lwakua se. Yusufu waafwile wali na myaka 110. 23 Yusufu waikeele nsiku ingi mpaka waamwene kuvyalua kwa baana bena Efraimu ni bena benzikulu. Kabili waamwene ni benzikulu bakua Manase baavyelue na Makiri, ni babo baana waabapokeleele mu lupua lwakue. 24 Yusufu waabaanine bakuluube, “Kufua kwane kwapalama. Inzi kulanda kisinka, Leza waakamisunga, kabili waakamilombola ni kumisezia ku kyalo ki-aalaile Abrahamu, ni Izaaki pamo ni Yakobo.” 25 ✡50.25: Kuf 13.19; Yos 24.32; Bae 11.22Yusufu waabalapiizie baana bakua Izraeli wabaana nangue, “Kisinka Leza waakamimona. Ni pakako, pamukaba mwaya, namyana mukatwame ni bikuza byane.” 26 Yusufu waafwile wali na myaka 110. Mubili wakue waasubilue mafuta tekuti ubole, ni pa kyamba, waabiikilue mu lisanduku.