7
1 “Lyonse lundinakeba kukosia Izraeli,
bibalo byakua Efraimu bilibyabiikua paswetele.
Bubi bwakua Samaria bulibwafyulua,
balibapompolana,
bakabooko balibaingililana mu nghanda,
babipoopoosi balibasompolana mu misebo.
2 Inzi tebenikile
nangue nangulukile bikitua byabo byonse bibi.
Bibalo byabo bibazyungulukiile,
ni byo bili pa ntanzi yane lyonse.”
3 “Balibamusansamusia likolo na bilubo byabo,
ni babiloolo na bufi bwabo.
4 Bonse balibakita bukende,
baswelele nga kyapiko kya mikate,
kekio kili ni mulilo usikebekele kusonseziiwa na kaapika wa mikate
kutula musita wa kukandila bunga mpaka musita wa kututumuka.
5 Mu busiku bwa nsikunkulu yakua likolo wetu,
babiloolo balibaleema na bikolani,
ni likolo aliwailunda ku bantu bali ni mufuupula.
6 Mitima yabo ili nga kikuka kya mulilo,
balibamuwila likolo mu bubi.
Kipuki kyabo kilikyafunka kyunsi busiku bonse,
ni lukeelekeele kilikyatuutuuka nga libeebe lya mulilo.
7 Baswelele nga kyapiko kya mikate.
Balibazakila bakateeka babo.
Makolo abo onse aliapona,
kabili tepali muntu aliwankuuta.”
8 “Efraimu esanziizie mu ntundu.
Efraimu i mukate umaatikile upiile bwala bumo.
9 Baeni bamupwile maka,
inzi wene tenikile.
Mu misisi yakue muli ni ndale pale pale,
inzi wene tamanine.
10 Kiitoni kyakua Izraeli kilikyamusininkizia,
anzia evio,
tamubweleele Yawe Leza wakue
ao kumukeba.”
11 “Efraimu ali sie nga nkunda,
tezi kukokola kubeepua, kabili tali na maano.
Musita umo aliwakuuta ku Misri,
ni unge musita aliwaya ku Asuria.
12 Mu lwendo lwabo nakaba kubateela bukila,
nakaba kubakula ni kubaponiizia pansi nga tooni twa mu lweleele.
Pankaba kunvua nangue balimukukolonghana pamo,
nakaba kubakwata.
13 Lisyamo lyabo,
pantu bakinfunghamina!
Busanzo buli pali bene,
pantu bakinsangukila.
Ntonene kubalubula,
inzi baliban'mbeepezia.
14 Tebalimukundilila na mitima yabo yonse,
inzi balimukuloosia baleele pa malita abo.”
Balimukukolonghana pamo balomba baleza babo
pa mulandu wa nghano ni pa mulandu wa divai ya lenu.
Baba bantu banfunghamiine.
15 Ndinabasambilizia ni kubakoselezia,
inzi balibankambila.
16 Tebezi kumubwelela Kabezia Mpungu.
Bali nga buta busifimbile.
Banombozi babo baakeepawa na kipanga
pa mulandu wa twebo twabo twa bukisanguka.
Ni pakako, baakafuupulua
mu kyalo kya Misri.