11
Ntono yakua Leza pa Baizraeli
1 ✡11.1: Kut 4.22; Mat 2.15“Izraeli lu-aali wakili mwanike, naamutonene,
ni kufuma ku Misri, naamukuutile mwanane.
2 Inzi nga vibaali bakila kukuutua,
i vibaali bakila kuya kule ni nene.
Baeleele ngelelo ku ba Baali
ni kufunkia bubaani ku mikisi.
3 Nene i waamusambiliziizie Efraimu kwenda,
nabakwete ku maboko,
inzi tebainikile
nangue nene i waabakosiizie.
4 Naabalombwele na nkamba ya nkumbu ya bumuntu,
na nkakilo ya ntono,
kuli bene naali nga olia aliwatwama
mwana pa nkombe,
kabili naafwineeme kuti n'mbaliisie.
5 “Kubako tebakabwelela ku Misri
ni kuteekua na Asuria
pantu baakeene kulapila?
6 Kipanga kyaakabeekia mu mizi yabo.
Kyaakazakila minkolonto ya milyango yabo
ni kupwisia mapange abo.
7 Bantu bane bekinkiziizie kuti ban'mbutuke.
Anzia kine balibankuuta Leza Kabezia Mpungu,
ata pakaba syani, nsikavinda kubasezia.
8 ✡11.8: Mam 29.23“Kuti nakusia syani we Efraimu?
Kuti nakulekelela syani we Izraeli?
Kuti nakukitila syani bibiipile nga vinaakitiile Adma?
Kuti nakukita syani nga Zeboimu?
Mutima wane walulukile mukati mwane,
nkumbu yane yonse ibuukulukile.
9 Nsikafikilizia kikonko kyane kikata,
kabili nsika-alulula malanga ni kumwinoona Efraimu paakale,
pantu nene ndi Leza, kabili nsili muntu,
ndi Muzuuke pakati kenu.
Nsikeeza kukanda mizi yabo.
10 Baakamukonka Yawe.
Waakabuluma nga nkalamu.
Lu-aliwabuluma,
baana bakue balibaiza kufuma ku mboosi balimukututuma.
11 Baakeeza kufuma ku Misri,
balimukututuma nga minsole,
kufuma ku Asuria, bapupukile nga nkunda.
Naakabeekazia mu nghanda yabo ingi,”
nangue Yawe.
12 Efraimu anzyungulukiile na bufi,
Izraeli na bupompo,
inzi Bayuda baatwaliile kuba ba kisinka kuli Leza,
Leza Muzuuke wa kisinka.