1 Pa kyamba kwaunvwikile mizowa ya bantu, ni ya bakazi babo, baali balimukwitendookela Bayuda nabo. 2 Bantu baali balanda nangue, “Fwefue ni baana betu balalume ni banakazi tuvulile, kansi tupalile kupeeluako nghano tulie tukeeza kufua.”

3 Kwaali ni bange baali balanda nangue, “Twakibiikia makaba etu kuba kikwatizi, ni makaba a mizabibu, ni nghanda yetu, pakuti tukabe ni nghano pa musita wa nzala.”

4 Kabili bange baali balanda nangue, “Twakikopa nfolanga ya kuti tukasonke musonko wa bisonso byetu, ni makaba a mizabibu kuli likolo. 5 Fwefue tuli sie bantu bamo, ni baana betu bali sie nga baana babo. Anzia kili evio, tupatikiziiziwe kutwala baana betu mu buzia, ni bamo ba mu baana betu bakazyana tebasyali kale bazia, tetuli na ka kukita pantu bisoka byetu, ni makaba etu a mizabibu tebisyapokelue na bantu bange.”

6 Naafiitilue sana lunaunvwile kwitendooka kwabo ni bulanzi bwabo. 7 ✡5.7: Kuf 22.25; Bal 25.35-37; Mam 23.19-20 Pa kyamba, naamwene kuti nsoke babiloolo ni bakateeka nabaana nangue, “Mwemue mulimwakopia bya kaloba ku bantu.”

Ni pakako, naakolonghaniizie bantu bengi kuti nande nabo. 8 Naabaanine nangue, “Fwefue kukonkana ni buvinde bwetu, twakilubula Bayuda netu baasitilue na Bazima. Eba, kabili ni mwemue temwakeba kubasisia kuti ni fwe tubasite paakale?” Tepaali muntu waalandilepo kantu, bonse baikeele sie tondolo.

9 Kabili naalandile evi, “Bintu bimulimukukita tebiweme. Ale mwa-andiluaki kutiina Leza wetu evi balwani betu Bazima tekuti baye bali na nsambu ya kuya batutuka? 10 Ni nene wenka ni balupua bane pamo ni babombi bane, ndinabakopesia nfolanga ni nghano. Ni pakako, tulekele kukopia bya kaloba. 11 Ale babweziizie byonse bimwaali mwabakopia bya kaloba: bisonso byabo, makaba a mizabibu, ni makaba a mizeituni, ni nghanda yabo, pamo ni kibwezia kyonse kimwaalundilepo pa nfolanga, ni pa nghano, ni pa divai pamo ni pa mafuta.”

12 Kupwako, ni bo balanda nangue, “Tulikubabweziizia, kabili tetukasonza kantu ka kaloba kuli bene, tulikukita muwalandila.”

Naakuutile babitambua, evi babiloolo ni bakateeka balape nangue baakakita nga mubaalandiile. 13 Pa kyamba, naakunkile nkanzu yane nalanda nangue, “Kubalua muntu asikaba kufikilizia keki kilapo, Leza amukunke ni kumufumia mu nghanda yakue pamo ni mu miilo yakue. Akunkike pasili kusyala na kantu.”

Libumba lyonse lyaalandile nangue, “Evio sile. Yawe alumbue.” Bantu ni bo baakitile nga vibaalapile.

14 Kabili kutula sie lunaabiikilue kuba mulombozi wa mu kyalo kyakua Yuda, kutendeka mu mwaka wa 20 mpaka mu mwaka wa 32 mu kuteeka kwakua likolo Artasasta, nene ni lupua lwane twaapwile myaka lyanondo ni ibili, pasili kulia bilio bya bandabukizi. 15 Inzi bandabukizi bantangiliile, baali babiibikizia bantu ni kubapoka bilio ni bya kumina, kukila shekeli 40 ya nfolanga ya bityele, ku mpeleezio, babombi babo ni bo baatendekele kubiibikizia bantu, inzi nene nsyakikita evio pantu ndinatiina Leza. 16 Ee, naatwaaliliile ni miilo ya keki kibumba, kabili tetwaasitile bukaba, ni babombi bane bonse baali baiza kukolonghana pamo ni nene ku kubomba. 17 Ku meza yane kwaali kwaiza kulia bantu 150, Bayuda ni bakateeka, kubiikapo ni balia baafumine ku byalo byaali byatuzyungulukiile. 18 Ni bilio byaali byateaniwa bya busiku bumo, paali paelekua nghombe umo ndume, ni mikooko iweme mutanda, kabili baali bandeetela ni tooni, ni bukonto bwa bya kumina bya kubalua musango, lwendo lumo mu nsiku lyanondo, anzia evio, pa mulandu wa bebi bintu byonse, nsyaakebele bilio ku bantu, pantu kubiibikiziiwa kwaali kwakilile ku babo bantu.

19 We Leza wane nanguluke pa mulandu wa buwame bunakikitila baba bantu.