5
Nsokezi palua bukambue
1 We mwana wane, unvua mulangue wane,
teya kutui ku twebo twa maano.
2 Evi uye wavinda kwinika biweme,
ni milomo yobe isunge maano.
3 Pantu milomo ya mwanakazi mukambue, iliyatoonia kapelo,
ni bulanzi bwakue buteleele kukila mafuta.
4 Inzi mpeleezio ya bulanzi bwakue ilulile kukila kimuti kiluliisie,
ni kunooneka nga kipanga kya mindyakubili.
5 Makasa akue alimukuya akookela ku lufu,
ntanfu yakue ilungi kumbo.
6 Kabili tasakameene nzila ya bukose.
Nzila yakue ipotonkeene, kabili taimanine.
7 Ni pakako, mwe baana bane ntwilizie,
kabili tekufume mu bindimukulanda.
8 Nzila yobe ilekenkane kule ni wene,
kabili tekupalamina ku mulyango wa nghanda yakue.
9 Ukeeza kupeela bange mukinzi obe,
ni myaka yobe ku balia basili na nkumbu.
10 Baeni bakeeza kwikusiiwa na maka obe,
ni miilo yobe ikeeza kuya yali mu nghanda mwa mweni.
11 Ku mpeleezio ya bukose bobe waakaloosia,
musita waakeenoonua munofu ni mubili obe.
12 Waakalanda nangue, “Ale naasuuliileki masambilizio?
Ale naafuupwiliileki nsokezi?
13 Nsyaanakiile bakasambilizia bane,
ni kubatwilizia balia balibanfunda!
14 Naali nasyaumiine kwingila mu bwavia bukata,
mu libumba lya bantu bakua Leza.”
15 Mina menda a mu nsupa yobe we mwine,
menda aliapita lubilo kufuma mu kiina kyobe we mwine.
16 Ale tusulo tobe twa menda tulikusalanghaninaki mu misebo?
Ni twezi twa menda kuya kiyeyeye?
17 Aye ali sie obe we bunke,
pasili kupeelako baeni.
18 Kasulo kobe kapaalue,
kabili uwaminue na mukazi wa mu bulumendo bobe,
19 Aweme nga nswala, ni kufwanina nga kasia,
mabeele akue aye akuwamiine nsiku yonse,
kabili uye wawamiinue nsiku yonse mu ntono yakue.
20 Ale ni kiki kilikukulengia we mwana wane kuti uwaminue na muka nghwana?
Ale ni kiki kilikukulengia kukumbatila nkulo ya mwanakazi mukambue?
21 Pantu nzila yobe ili ku menso akua Yawe,
ni ye aliwatoosia monse muuliwapita.
22 Mubi aliwakwatua na bubi bwakue mwine.
Ni ye aliwakakua na nkamba ya bibalo byakue.
23 Aliwafua pa mulandu wakubula masambilizio,
ni bupuba bwakue bukata bulibwamulovia.