7
1 We mwana wane, sunga twebo twane,
labukila milao yane mukati mobe.
2 Konka milao yane ukabe ni bukose,
ni kusunga mafunde ane nga kambooli ka mu linso lyobe.
3 Kakila milao ku minue yobe,
uilembe pa kibao kya mu mutima obe.
4 Ana mulangue nangue, “Uli nkazyamwine,”
ni kumwana kyunvwila nangue, “Uli lupua lwane.”
5 Evi bakusunge ku mwanakazi mukambue,
ni ku kuleula ku muka nghwana aliwabembia na twebo twakue.
6 Pantu pa nzota ya mu nghanda yane
naakentele mu kisampi.
7 Naamwene pa babipuba,
pa balumendo nainikilepo mulumendo asimanine kantu.
8 Mulumendo waali waya mu musebo ukata pepi ni lipeto,
walungi ku nghanda kulikwaikala mwanakazi umo.
9 Koba kasyazimiine, musita wa kyungulo,
pasyafiita, pa kamuntu uli ni.
10 Kupwako, mwanakazi umo waya kusaakaana nakue,
wavwele nga mukende ali ni mutima wa bupompo.
11 Mwanakazi ali ni nsungu ni butaale,
makasa akue tekuba azikia mu nghanda yakue.
12 Unge musita aliwasangua mu nzila, ni unge musita mu misolo,
ni mu mapeto walimukubenza.
13 Kupwako, wamukumbatila mulumendo ni kumufyompa,
ni kumwana pasili busoni.
14 “Ngelelo ya kyabupe kya mutende ndinayo ku nghanda.
Lelo nafikilizia kilapo kyane.
15 Ni pakako, i kinafuminanga kuti ngize nsaakaane nobe.
Nakukebanga mpaka nakumona.
16 Pa bulita bwane napanzikangapo ngubo,
ngubo ya ku Misri ya mazela.
17 Nafuuminizyanga manukato pa bulita bwane,
ni bubaani, ni kizime pamo ni mudalasini.
18 Iza twikute ntono mpaka lukeelekeele,
tusansamusie mitima yetu na ntono.
19 Pantu mulume wane ku nghanda taliko,
aile mu bulendo lwa kule.
20 Wakitwama ni mufuko wa nfolanga,
wakaba kubwela sie kwezi wasyalingi.”
21 Na twebo twakue tuweme aliwamubembia,
aliwamwanzia na lubembo lwa kanua kakue.
22 Ni penka papo aliwamukonka,
nga nghombe ndume alimukuya ku kusinzua,
ao nga kisongo kilimukwingila mu muteo.
23 Anzia muvui kine wamutunka ku maini,
nga koni kabutukiile pa kakose,
tavinda kumana nangue i busanzo bwa bukose bwakue.
24 Ni pakako, we mwana wane ntwilizie,
poozako maano ku bindimukukwana.
25 Mutima obe tekuti upooze maano ku nzila yakue,
ukeeza kuzeezelela mwaliwapita. 26 Pantu tasyaipaile balalume bengi,
balia ba-asyasinzile, ni bengi.
27 Nghanda yakue i nzila ikata ya kumbo,
ikookeele ku miputule ya lufu.