10
Mapinda akua Solomoni
1 Aza i mapinda akua Solomoni:
Mwana wa mulangue aliwasansamusia se,
inzi kipuba, bulanda kuli nghina.
2 Bukonto bulibwanonkelua mu bubi tebuli na kibwezia,
inzi bulunghami bulibwapususyania ku lufu.
3 Yawe tezi kulekelela mulunghami kwemiwa na nzala,
inzi aliwabatana babi belia bibalibatokamua.
4 Olia aliwabomba na kuboko kunangheene aliwaileetelela bupabi,
inzi kuboko kwa olia alumine kulikwaleeta bunonsi.
5 Olia aliwakolonghania musita wa kipua, i mwana ali ni mulangue,
inzi olia aliwalaala musita wa kuzombola, i mwana aliwamoniania busoni.
6 Mapaalo ali pa mutue wa mulunghami,
inzi bupompo bukupiliile kanua ka mubi.
7 Liina lya mulunghami lililyabombiiwa ku mapaalo,
inzi liina lya mubi, lyaakabola.
8 Wa mulangue aliwaitabila nsokezi,
inzi kipuba wa bulanzi bwingi waakaloba.
9 Olia aliwaenda mu bulunghami, aliwaenda pasili busanzo,
inzi olia aliwamuzeeziizia nzila waakamanika.
10 Olia aliwakapia na linso aliwaleeta bulanda,
inzi aliwasokana mu kisinka aliwaleeta mutende.
11 Kanua ka balunghami, i kasulo ka menda a bukose,
inzi bupompo buli mu kanua ka mubi.
12 ✡10.12: Yak 5.20; 1 Pet 4.8Kukenda kulikwalengia bupusano,
inzi ntono iliyavimba pa bubi bonse.
13 Mulangue uliwasangua mu milomo ya muntu aliwainika,
inzi nfimbo iliyaumua mu musana wa muntu asili na maano.
14 Wa mulangue aliwabiika bukonto bwa bukengezi,
inzi kanua ka kipuba, kalikapalamika lwinoono.
15 Bunonsi bwa munonsi, i muzi wakue ulumine.
Inzi lwinoono lwa bapabi i bupabi bwabo.
16 Kilambu kya mulunghami kilikyaleeta bukose,
Inzi bunonsi bwa mubi ni kibalo.
17 Olia aliwaunvua lu-aliwasasililua, ali mu nzila ya bukose,
Inzi olia aliwakaana nsokezi, aliwazeeza.
18 Olia asuulile mwinakue mu kafiso wa bufi,
ni olia aliwa-ambana, kipuba.
19 Mu bwingi bwa twebo, temwapusa bubi,
inzi aliwasunga milomo yakue, aliwabombia maano.
20 Lulimi lwa mulunghami luli nga mutofue uwamiisie,
mutima wa mubi ni wa mpuni.
21 Milomo ya balunghami iliyaliisia bengi,
inzi babipuba balibafua pa mulandu wa kusimana.
22 Mapaalo akua Yawe alianonsyania,
pasili kwemenapo.
23 Kipuba kukita bubi, kuli nga musaapo,
inzi muntu wa kyunvwila aliwawaminua na mulangue.
24 Kilikyatiina mubi i kilikyamufikila,
inzi balunghami balibapeelua kibalibakeba.
25 Kine mulula wapita, babi balibazeeza,
inzi mulunghami wene, kiputa kya muyayaya.
26 Nga mpubili mu meno, ni byunsi mu menso,
i vili munanghani ku balia balibamutuma.
27 Kutiina Yawe kulikwalunda nsiku ya muntu,
inzi myaka ya babi iliyakeefiiwa.
28 Maswapi a balunghami ni nsansa,
inzi kuketekela kwa babi kwa mpuni.
29 Nzila yakua Yawe, i lusako lulumine ku mulunghami,
inzi ni lwinoono ku bankitatubi.
30 Balunghami tebakaloviiwa,
inzi babi tebakeekala mu kyalo.
31 Kanua ka balunghami kalikalanda bya mulangue,
inzi lulimi lwa muntu wa kiitoni lwaakaloviiwa.
32 Milomo ya balunghami imanine bilibyaitabiziiwa,
inzi kanua ka mubi kalikalanda bibiipile.