18
1 Olia aliwaikeka ku benakue aliwakeba kukita mu-atoneene,
kabili aliwafiitua lu-aliwasokua.
2 Kipuba tezi kuwaminua na maano,
inga sie kukita mutoneene mutima wakue.
3 Mubi lu-aliwaiza, ni mufuupula ni o uliwaiza,
ni pa kyamba kya busoni, kuleebulua.
4 Twebo twa mu kanua ka muntu, buziba buzikile,
kasulo ka mulangue, menda a kaezi aliaenda.
5 Kukita kitoolela ku mubi tekuweme,
ao kumutana nsambu mulunghami musita wa bupinguzi.
6 Milomo ya kipuba iliyafikyania ku bikanza,
ni kanua kakue kalikakuuta bipumo.
7 Kanua ka kipuba ni lwinoono lwakue,
ni milomo yakue ni muteo wa kukwatuamo ye mwine.
8 Twebo twa musongezi tuli nga bisoso bya bilio biweme,
bisoso bilibyakookela munda.
9 Olia anangheene mu miilo,
i lupua lwakua nghinooni.
10 Liina lyakua Yawe, kyubo kilumine.
Mulunghami kine wabutukilako, alikuya wali ni mutende.
11 Munonsi amwene nangue bunonsi i kyubo kyakue kya maka.
Alangakeene nangue i kibumba kimusungile.
12 Kwinooneka kwa muntu kulikwatangililua na kiitoni.
Ni kwikeefia kulikwatangililua na mukinzi.
13 Kwasuka lu-usinaunvue,
bupuba ni busoni.
14 Mweo wa muntu uliwasipikizia malwele,
kubako kuli ni alikuvinda kuteekamania mutima utoobokele?
15 Mutima wa muntu wa maano uliwakeba bukengezi,
ni kutui kwa muntu wa mulangue kuli kwakeba maano.
16 Kyabupe kya muntu kilikyamwizwila nzila,
ni kumuleeta ku menso a bantu bakulu.
17 Olia aliwaipokolola wa mambo aliwamoneka wali ni nsambu,
inga sie kine unge waiza kutoosia twebo twakue.
18 Kuteya bubale kulikwapwisia bikanza,
ni kupingula milandu ya bakulu.
19 Muntu aluviiziwe na wa kwakue, aliwafinia mutima kukila muzi uli ni kibumba,
ni bikanza bili nga minkolonto ya milyango ya ku kyubo.
20 Kavumo ka muntu kalikaikusiiwa na mazabo a mu kanua kakue,
kabili aliwaikuta mazabo a ku milomo yakue.
21 Lufu ni bukose bili mu buvinde bwa lulimi,
ni balia babutonene, balibalia mazabo akue.
22 Olia aliwaupa mwanakazi, aliwasanga kintu kiweme.
Aliwapokelela buwame kufuma kuli Yawe.
23 Mupabi aliwalanda wapaapaata,
inzi munonsi aliwa-asuka wasasile.
24 Olia ali ni babibuza bengi, aliwaileetelela lwinoono,
inzi kuli ni kibuza aliwa-ampana na muntu kukila lupua lwakue.