25
Mapinda ange akua Solomoni
1 Aza i mapinda ange akua Solomoni, mapinda a-ambwilue na bantu bakua Hezekia likolo wa mu kyalo kya Yudea
2 Kufiika keebo, bulumba bwakua Leza,
inzi bulumba bwa makolo, kukebelezia keebo.
3 Nga vili kuleepa kwa lyulu kuya mu muulu, ni kuzika kwa kyalo kuya pansi,
ni mutima wa makolo i viusivinda kukebeleziiwa.
4 Fumia biko mu mutofue,
ni mutili wa mutofue alikukukitila kipe.
5 Fumia babi ku menso akua likolo,
ni kitebe kyakue kya bukolo kilikwimikua mu bulunghami.
6 ✡25.6: Lk 14.8-10Tekwitantamuna pa menso akua likolo,
ni kukeba kifuka pa bakindami.
7 Pantu kyawama kwanua nangue, “Iza kono ku ntanzi,”
kukila kumoniiwa busoni pa bakindami.
Kine kuli ni kawamonanga na menso obe,
8 Tekubutukila kuya kusongela ku kilie,
ukeeza kwandua kumana bya kukita ku mpeleezio
mwinobe pa-akaba kukumonia busoni.
9 Lanzyania ni mwinobe,
kabili tekufyulilane tufiso.
10 Evi olia alikunvua tekuti akumonie busoni.
Ukeeza kuleebulua mu bwikazi bobe bonse.
11 Keebo kalikalandua pa musita upalile,
kali nga nsombo ya oro ili mu kipe kya mutofue.
12 Nga evelia vili lutimbi lwa oro, ni bifwanizio bya oro isambikile,
i vili ni olia aliwasoka kutui kulikwanakila.
13 Nga evelia vili kasama ka kibue musita wa kuzombola,
i vili ni mukenzi wa kisinka ku olia amutumine.
Pantu aliwasansamusia mutima wakua selenzi.
14 Nga evelia vili malezi ni mwela pasili nvula,
i vili ni olia aliwaitasia bufi palua kilambu kisipeenue.
15 Mu kusipikizia, kateeka aliwalengiwa kuzumina,
ni lulimi luteleele, lulilwatyona kakuza.
16 Kine wasyukila kapelo, tekuliisia,
ukeeza kwikuta ni kuluka.
17 Kuulu kobe kuye kwali sie musita umo umo ku nghanda ya mwino,
akeeza kunaka nobe ni kukusuula.
18 Muntu aliwasininkizia mwinakue bya bufi,
ali nga nondo ni kipanga, ni muvui unoonekele.
19 Kuswapila muntu asiliwakisinka musita wa maavia,
kuli nga liino libolele, ni mukonzo uvyukile.
20 Nga evelia vili olia aliwavuula ngubo yakue musita wa kasama,
kabili nga siki pa kilonda,
i vili ni olia aliwaimba nghimbo ku muntu afinine mutima.
21 ✡25.21: Bar 12.20Kine mulwani obe onvwile nzala, mupeele bilio,
kabili kine onvwile kyaka, mupeele menda a kumina.
22 Mu kukita evi, ulikubiika mazekezeke a mulilo pa mutue wakue,
ni Yawe alikukulambula.
23 Nga vili mwela wa ku nkungua uliwaleeta nvula,
i vili ni lulimi lulilwalengia muntu kufiitua.
24 Kyawama kwikala mu kafuli ka mutenge wa nghanda,
kukila kwikala mu nghanda pamo ni mukazi wa mazibo.
25 Nga evelia vili menda a kasama ku muntu ali ni kyaka,
i vili ni mpunda iweme ifumine kule.
26 Mulunghami aliwalekelela mubi,
ali nga kasulo ka menda kalikavunduka, kabili nga kiina kya menda kivundwilue.
27 Nga evelia vikisipalile kuliisia kapelo,
i vikisipalile ni kwikebela bulumba bobe we mwine.
28 Olia asiliwateeka mutima wakue,
ali nga muzi uli ni kibumba kituutikile.