28
1 Babi balibabutuka sie tekuba bakumbilue na muntu,
inzi balunghami bapamine nga nkalamu.
2 Pa mulandu wa bukisanguka bwa kyalo, bakateeka balibavula,
inzi kateeka wa maano ni akengeele, aliwaleeta mutende.
3 Mulombozi mupabi aliwaemia bapabi,
ali nga nvula ya mwela iliyainoona bilio.
4 Balia basilibakonka mizilo, balibatasia bubi,
inzi balia balibakonka mafunde, balibakanzana nabo.
5 Bantu babi tebamanine bilungheeme,
inzi balia balibamukeba Yawe babimanine.
6 Kyawama mupabi aliwaenda mu nsambu
kukila munonsi ali mu nzila ibi.
7 Olia aliwakonka mizilo, mwana wa mulangue,
inzi kibuza wa bakazule, aliwamonia se busoni.
8 Olia aliwavuzia bunonsi bwakue mu kukopia nfolanga ya kaloba,
aliwakolonghaniizia muntu aliwaunvwila bapabi nkumbu.
9 Olia aliwakilika kutui kwakue tekuti onvue mizilo,
ni mapepo akue ni bilubo.
10 Olia aliwalengia balunghami kuzeezelela mu nzila ibi,
aliwaponena mu kiina kyakue mwine,
inzi balia bapwililikile balibapyana biweme.
11 Munonsi ali ni mulangue pa menso akue mwine,
inzi mupabi ali ni maano, aliwamutoosia bwino bwino.
12 Balunghami kine ba-anzia, bulumba bukata.
Inzi babi kine i bateeka, bantu balibafyama.
13 Olia aliwafiika bilubo byakue, tezi kulunduluka,
Inzi olia aliwalapila ni kulekela, aliwaeleelua.
14 Lisyuko ku muntu aliwatiina Yawe lyonse,
inzi olia aliwafinia mutima wakue, aliwaponena mu busanzo.
15 Nga vili nkalamu aliwabuluma, ni kimbui kilikyasakukila,
i vili ni kateeka mubi aliwateeka bapabi.
16 Kateeka asili na maano, aliwakila kubabiibikizia,
inzi olia asiliwatokamua bunonsi bwa bupompo, aliwaikala nsiku ingi.
17 Olia afiniinue na mulopa wa muntu,
aliwaya wali mbutusi mpaka musita wa kufua kwakue.
Tekuti kuye kwali muntu wa kumukwasia.
18 Muntu aliwaenda mu bulunghami, aliwapususiiwa.
Inzi olia ali ni kiitoni mu nzila yakue, aliwaponena mu kiina.
19 Olia aliwalima bukaba bwakue, ali ni bilio bingi.
Inzi olia aliwakonka milandu ya mpuni waya wali ni bupabi bukata.
20 Muntu wa kisinka, ali ni mapaalo engi.
Inzi olia aliwakeba kunonka lubilo lubilo, aliwakandua.
21 Kuba ni kitoolela ku bantu, tekuweme.
Inzi muntu kuti waluvia pa mulandu wa kisoso kya mukate.
22 Wa butani aliwatona kunonka lubilo lubilo,
kabili tamanine nangue kuti wabulua.
23 Olia aliwasasilila mwinakue, aliwatonua pa kyamba
kukila olia aliwamulandila twebo twa kuwaminizia.
24 Muntu aliwaiba bunonsi bwakua se ao bwakua nghina ni kulanda nangue, “Te kilubo,”
ozo muntu, kibuza wakua nghinooni.
25 Wa butani aliwabuusia mazibo,
inzi olia amuswapiile Yawe, alikuba munonsi.
26 Muntu eswapiile ye mwine, kipuba.
Inzi olia aliwaendela mu mulangue, aliwapususiiwa.
27 Muntu aliwakwasia bapabi tezi kubulua kantu,
inzi olia aliwazibata, ali ni ntiipu ingi.
28 Babi kine bateeka, bantu balibafyama.
Inzi kine baloviiwa, balunghami balibavula.