30
Bulanzi bwakua Aguri
1 Bobu i bulanzi bwa mponvu bwakua Aguri mwina Yake,
kuli Itieli ni Ukali.
“We Leza wandekeela, we Leza wandekeela,
kabili n'mpeleelelue.
2 Kisinka nene ndi kipuba kukila bantu bonse.
Kabili nsili na maano a bumuntu.
3 Nsyaasambiliile mulangue,
kabili nsimanine twebo twakua Muzuuke.
4 Nani waaselele mwiulu ni kukooka pansi?
Nani waakolonghaniizie mwela mu minue yakue?
Nani waakakile menda mu ngubo yakue?
Nani waimikile mpeleezio yonse ya kyalo?
Liina lyakue nani? Liina lyakua mwana wakue nani?
Nghane kine umanine!
5 “Kubalua keebo kakua Leza kasininkiziiziwe.
Wene i kisoolelo kya balia balibabutukilamo.
6 Tekulundapo pa twebo twakue,
akeeza kukusasilila ni we wamoneka kuba wa bufi.
7 “We Yawe nakulomba bintu bibili.
Tekuti ukabe kuntana ntanzi ya kufua kwane:
8 Fumia bupunzu ni bufi pali nene.
Tekun'mpeela bupabi ao bunonsi,
inzi n'mpeeleko bilio byane bya kubalua nsiku.
9 Pantu kine byanvulila ndikwikuta ni kukulaba nalanda nangue, ‘Yawe nani?’
Ao tekuti ngie nali mupabi ni kuya naiba,
Ni kuleebuzia Liina lyakua Leza wane.
10 “Tekubeepezia mubombi kuli selenzi,
akeeza kukutiipa ni we wamoneka kuba wa kilubo.
11 “Kuli ni luvyalo lulilwatiipa basibo,
kabili tebezi kupaala ba nghinabo.
12 Kuli ni luvyalo luswetele ku menso abo bene,
inzi telwaasambilue biko byabo.
13 Kuli ni luvyalo lukilile kulendula menso abo!
Nkopio yabo ni yo yalendwilue.
14 Kuli ni luvyalo luli ni meno nga kipanga ni lumuma nga myele,
pakuti baye balia bapabi ni kubalovia pa kyalo pamo ni balia babuliilue pakati ka bantu.
15 “Mupoti, ali na bakazyana babili balibalila nangue,
‘N'mpeele, N'mpeele.’
“Kuli bintu bitatu bisilibyaikuta ata kaniini.
Ee, bina bisilibyalanda nangue, ‘Byavula.’
16 Kilibu, kavumo ka nghumba,
ni bulongo busilibwaikuta menda,
pamo ni mulilo usiliwalanda nangue, ‘Byavula.’
17 “Linso lya muntu aliwafuupula se,
ni kufuupula nghina,
lyaakakompua na bizooko bya mu lulambe,
ni twina nzwiba twaakalilia.
18 “Kuli bintu bitatu bilibyan'mpezia maano.
Ee, bintu bina binsimanine,
19 Lwendo lwa nzwiba mu lweleele,
lwendo lwa kizoka pa mwalala,
lwendo lwa bwato pa menda,
ni lwendo lwa mwalalume ali ni mukazyana.
20 “I vili ni nzila ya mwanakazi mukende.
Aliwalia ni kupukusa pa kanua kakue,
ni kulanda nangue, ‘Nsiluviizie.’
21 “Pa mulandu wa bintu bitatu, kyalo kilikyatenta,
ni pa mulandu wa bintu bina kilikya-andua kusipikizia.
22 Pa mulandu wa muzia lu-aliwa-aluka likolo,
ni kipuba kine waikuta bilio.
23 Pa mulandu wa mwanakazi abiipile kine waupua,
ni mubombi mwanakazi aliwapokolola kyupo kyakua nghinalenzi.
24 “Kuli bilengua bina bikeepele mu kyalo.
Inzi bili ni maano engi.
25 Mpazi, ni bilengua bisili na maka.
Anzia evio, iliyaibiikila bilio pa musita wa likungulu.
26 Bibila, ni bilengua bisili na maka.
Anzia evio, bilibyaikitila nghanda mu mabue.
27 Nzie, teili na likolo.
Anzia evio, iliyabuukila pamo mu mabumba.
28 Lunso, kuti wakwatua na minue.
Anzia evio, aliwaikala mu nghanda mwa likolo.
29 “Kuli bilengua bitatu bilibyaenda lwendo lufwaniine.
Ee, bina bili ni lwendo luweme.
30 Nkalamu ali ni maka pa nama yonse,
asiizi kutiina nama inge yonse.
31 Kazenze kalikaenda kaikenkenta, pamo ni kapwata,
ni likolo azyungulukiilue na balukale bakue.
32 “Kine ukitile bya bupuba ni kuya waitantamuna,
ao kine ukambiile kukita bibiipile,
biika kuboko kobe pa kanua kobe.
33 Pantu kine wafulumia mabeele a nama ulikusanga manteka.
Kuuma pa moona kulikwafumia mulopa.
Ni kusomenkezia kipuki kulikwaleeta mazibo.”