Yang Primirung Isinulat Ni Pablo Tung Mga Tag̱a TESALONICA
Patkaw Ang Pasanag Tung Kumpurming Magbasa
Atiing pagliliw̱utun ni Pablo ang pagparakaw̱utun yang Matinlung Balita, duun nagpanaw tung siudad ang Tesalonica duun tung parti Macedonia, kasiraan da ka tanira na Silas ni Timoteo (Mga Binuat-buatan 17:1-9). Tung seled tulung linggu nagparakaw̱utun tung mga tau duun. Matinlu yang pinakaw̱ut na ay dakele yang namananged ang namagtalig da yang mga sadili nira tung ni Ginuung Jesus. Yang kadaklan belag̱an mga Judio. Ug̱aring ilem, may dumang mga Judiong indi ra namananged ig durung pangimun nira tung ni Pablo natetenged tung mga kaarumanan nirang namaglakted da tung nag̱itulduk na. Purisu pinaliit da nira na Pablong kinaskas tung siudad nira. Purisu ti Pablo tanya, durung pagkeba-kebaan yang dedlaan na natetenged tung mga tumatalig ang nabutwanan na duun. Ay nabalitaan na ra ang pati tanira nag̱adeeg-deeg̱an da ka yang namagpakigkuntra tung anya. Purisu atiing duun pa tanira tung Atenas, ti Timoteo ya ray itinuw̱ul nang magbalik duun tung Tesalonica ang para magpaktel tung mga isip nira duun (3:1-2). Ti Pablo tanya nagpadayun yang pagparanawen nang asta nakaw̱ut da duun tung siudad ang Corinto. Duun da ka nga kaw̱utay ni Timoteo ang ya ray kay nagbaw̱alitaen tung anya kung kumusta ra tanira duun tung Tesalonica (3:6; Mga Binuat-buatan 18:5). Purisu ya ra kay uras ang ipinagpasulat ni Pablo yang sulat ang naa tung takun ang 51.
Yang katuyuan nang nagpasulat tung nira ay ug̱ud magpaktel tung mga isip nira ig magpademdem ka tung nira yang itinulduk na ra kang lag̱i tung nira natetenged tung pag̱urusuyun nira tung nag̱ayunan yang Dios. Ig gustu na kang maintindian nira kung unu pay mainabu kung maglekat da nganing ti Ginuung Jesus. Purisu tukaw tung tanan, nagpasalamat da tung Dios natetenged tung pag̱urubraen na tung mga isip nira ang durug katinlu yang pinakaw̱ut na (1:2-10). Pagkatapus ipinademdem na ka tung nira natetenged tung mga pasais na pati mga pasais yang mga ugpu na ang pulus tung matinlu. Sinambit na tia ay puiding may nagkaragngel nirang ibinangdan yang duma tung na Pablo ang muya, kung panangden nira, malpes dang maplekan ta ipagtalig nira tung anya (2:1-12). Pagkatapus nagpasanag da tung nira kung ayw̱a indi ra nagbalik tung nira agkali (2:17-3:10). Pagkatapus pinadayunan na kang sinambit kung unu pay gustu nang ipagpaprusigir na tung nirang usuyun tung mga pagpangabui nira (4:1-12). Naa pala may nag̱apagkurian nira ta pag̱isip natetenged tung mga putul nirang nagkarapatay ra kung muya indi ra mangasakep tung magkarainabu kung maglekat da nganing ti Ginuung Jesus. Purisu ya ray liniwayan ni Pablo ta maayen (4:13-18) ang para magrilinga-lingaan dang pamagdemdem tung dumang nagkarapatay ra. Gustu na ka ang tanira pirming riparasiun ang pamagpakbat tung uras ang ipaglekat ni Ginuung Jesus, kung unu pang mga ug̱aliay ang dapat ang kaw̱utan na tung nira (5:1-11). Dispuis may iningaluk na tung nirang dapat ang intindien nira natetenged tung pagpurutulan nirang sam pundaan (5:12-22).
1
Yang Intrada Yang Sulat (1:1)
1 Yang nagpasulat yang sulat ang atia ya ra yuung ti Pablo kasiraanami ra ka na Silas*1:1 Yang dumang pangguuy tung taung atia ti Silbano. Nag̱asambit tung 2 Corinto 1:19. ni Timoteo. Ipinaekel da yamen tung numyung sam pundaan asan tung Tesalonica ang may pagrarampilan mi ra yang Ama tang Dios durua ni Ginuu tang Jesu-Cristo. Yang nag̱ipag̱ampu yamen ang mas pang maispirinsiaan mi yang kaneeman nira ig mas pang ikasadya mi yang kaampiran mi tung nirang atiang baklu.
Nag̱aulit Ni Pablo Kung Ya Pa Ag̱ari Yang Pagrisibi Yang Tag̱a Tesalonica Tung Nira Atiing Primiru (1:2-10)
2 Pirmiaming pagpasalamat tung Dios natetenged tung numyung tanan asan. Nag̱asambitamu nganing yamen tung anyang nag̱ipag̱ampu. 3 Muya-muyang nag̱ademdeman yamen tung katalungaan yang Ama tang Dios yang pagturumanen mi yang nag̱auyunan na ang asan da nga pruibaay ang pagtalig̱amung matuud tung ni Ginuung Jesus. Pati yang bedlay ming pagtaraw̱ang-taw̱angan, nag̱ademdeman ka yamen ang asan da ka nga pruibaay ang paggeregmaanamu ta ustung magpurutul. Pati yang pag̱aragwantaen mi tung mga kaliwag̱an, nag̱ademdeman ka yamen ang asan da ka nga pruibaay ang pagpadayunamu ka enged ang pagpakbat tung ni Ginuu tang Jesu-Cristong maglekat. 4 Mga kaputulan ang nag̱agegmaan yang Dios, pagpasalamatami enged nganing tung anya gated nag̱askean da yamen ang talagang pinilikamu ra anyang magkatinir ta kalibrian. 5 Yay nag̱asiguru yamen ay kipurki atiing pagpakaw̱ut yamen tung numyu yang Matinlung Balita, belag̱an ilem sasang balita ka ilem ang nagngel mi, kung indi, balitang may builu nang maktel ekel tung Espiritu Santong nagpaugtun. Asanami ra ka nganing ngaeyangay ta kasiguruan yamen ang yang bitalang atiing ipinagngel yamen tung numyu talagang ipinadlut yang Dios ta maayen tung mga isip mi. Talagang maning tia yang apiktar na ay kipurki naskean mi ra ka kung unu pay mga pasais yamen ang nagparakaw̱utun tung numyu ang pulus tung ikaayen mi. 6 Ig ta yamu, nasug̱utamu ra tung yamen pati tung ni Ginuu ta, ay maskin durung pandeeg-deeg ang napasaran mi, nanangeramu ra ka enged tung ipinagpakaw̱ut yamen ang duru rag sadya tung mga isip mi ekel tung Espiritu Santong nagpaeyang. Purisu tung pasais ming atiang nag̱aagwanta, duunamu ra nasug̱ut tung yamen ni Ginuu ta. 7 Purisu yang dinangat na, nagluaamu rang durug tinlung mulidung nag̱usuyun yang kadaklan ang mga tumatalig asan tung sinakepan yang Macedonia pati tani tung sinakepan yang Acaya. 8 Ay kipurki asan tung numyu maning pa tung nangalintug da yang bitala yang Dios natetenged tung ni Ginuung Jesus. Belag da ilem asan tung sinakepan yang Macedonia may tani ka tung sinakepan yang Acaya, kung indi, maskin duun ka tung ay pang banwaay nagsarambung da yang balita natetenged tung pagtaralig̱en mi tung Dios kung ya pa ag̱arig tinlu. Purisu anda ray ministir ang ibalita pa yamen tung duma. 9 Ay kipurki tanira ra mismu ay pagbaw̱alitaen natetenged tung yamen kung ya pa ag̱ari yang pagrisibi mi tung yamen ig kung ya pa ag̱ari yang panalyud mi tung mga bultung atiing pag̱atuuan mi ra rin ang nunut da ka ta panalunga mi tung Dios ang para manirbianamu ra tung anyang yay ilem ay ultimung Dios ang bui. 10 Yadwa pa pagpakbatamu ra ka tung pag̱aningen nang Ana nang maglekat ang duun manliit tung langit. Ya ra kay pinabungkaras nang pinaliit tung mga minatay bilang ti Jesus ang yay pagpalibri tung yaten ang para indiita ra sakpen yang kasisilag̱en yang Dios ang magkakaw̱ut.