Yang Yadwang Isinulat Ni Pablo Tung Mga Tag̱a TESALONICA
Patkaw Ang Pasanag Tung Kumpurming Magbasa
Naa ra yang sulat ang nagdasun tung Primirung TESALONICA. Yang elaan nira tung pagsurulaten puiding mga enem ka ilem ang bulan. Puiding ipinagpasulat ni Pablo atiing duun pa tung Corinto ang asan da tung anyang nangabalik da na Silas ni Timoteo ang ya ray pinapag̱ekel na yang primirung isinulat na. Ay may nabalitaan na tung nira ang midyu mali yang pag̱irintindien yang duma natetenged tung paglekat ni Ginuung Jesu-Cristo. Ay may nagngel da nirang balita ang kinaw̱ut da unu yang uras ang ipagsintinsia ni Ginuung Jesus (2:2). Tung pag̱impisaan yang sulat, dakulu yang pagpasalamat ni Pablo tung Dios natetenged mas pang nagbaked yang pagtaralig̱en nira tung ni Ginuung Jesus pati yang paggeregmaan nirang magpurutul nadulangan da ka asta yang pag̱aragwantaen nira tung mga pinitinsia (1:3-4). Pagkatapus nagpaintindi ka tung nira kung unu pay pakaw̱utun na tung uri yang pagtaralig̱en nirang mabaked, maskin nag̱adeeg-deeg̱an ta duma, asta yang pakaw̱utun yang pamandeeg-deeg tung nira, ya ka (1:5-10). Dayun dang nag̱ampu para tung nira (1:11-12). Pagkatapus dayun da kang nagtadleng tung maling pag̱irintindien yang duma natetenged tung paglekat ni Ginuung Jesus (2:1-12). Tung 2:13-15, nagpasalamat tung Dios natetenged tung pagpilik na tung nira pati yang pagbeteng na tung mga isip nirang magtalig tung ni Ginuung Jesu-Cristo. Pinanuntan na ka ta ipagpaprusigir na tung nirang pirming mamagpakatenten tanira ig ipapeg̱et da ka nira tung mga isip nira yang ipinaske na tung nira. Baklu ra ipinag̱ampu na ang tanira pirming paktelen na (2:16-17). May sam bilug pang gustu nang ipatuman na tung nira natetenged tung sasang disiplinang gamiten nira tung mga aruman nirang pira pang bilug ang pamagbinulakbul (3:6-15).
1
Yang Intrada Yang Sulat (1:1-2)
Yang nagpasulat tung sulat ang atia yuung ti Pablo, kasiraanami ra ka na Silas ni Timoteo. Ipinaekel da yamen tung numyung mga tumatalig asan tung Tesalonica ang anday dumang may pundar tung numyung sam pundaan asan, kung indi, ya ra yang Dios ang nagyari rang Ama ta durua ni Ginuu tang Jesu-Cristo. Yang nag̱ipag̱ampu yamen ang mas pang maispirinsiaan mi yang kaneeman nirang pagpadag̱en-dag̱en tung numyu ig mas pang ikasadya mi yang kaampiran mi tung nirang naang baklu.
Nag̱apasalamatan Na Pablo Yang Pagtaralig̱en Nirang Mabaked (1:3-4)
Mga kaputulan, indi maimu ang indiami magpasalamat tung Dios ta muya-muya natetenged tung numyu. Magkabag̱ay ka tia ay natetenged mas pagbaked yang pagtaralig̱en mi tung ni Ginuung Jesus pati yang paggeregmaan ming sasa may sasa ya ra kag durulang agdurulang. Kapurisu indi maimu ang indiamu ipabantug yamen tung duma-rumang mga tumatalig ang kada sam pundaan ang yang may anya tung nira ya ra ka man yang Dios. Ay yang nag̱ipagdayaw yamen tung numyu, ya ra yang kabaked yang pagtaralig̱en ming pag̱agwanta tung tanan ang pandeeg-deeg tung numyu may tung tanan ang mga kaliwag̱an ang pagpasar tung numyu.
Nag̱ipagpasanag Na Pablo Kung Unu Pang Sintinsiaay Ang Ipakdul Yang Dios Tung Nira Pati Yang Ipakdul Na Tung Pamandeeg-deeg Tung Nira (1:5-10)
Tung pag̱aragwantaen ming atia, asan da nga pruibaay ang tung uri, yang tanan ang mga tau sintinsiaan da yang Dios tung magkatamang pisan. Bilang ta numyu, ibandunaramu ra anyang bag̱ayamu rang pakleren na tung kaliw̱utan ang baklu ang duun da maggaraemen tung mga tauan nang asta tung sampa. Talagang matuud tia kipurki natetenged ilem ang yamu pagpagaem dang bug̱us tung anya simanyan, ya ra kay nag̱atengeran na ang nag̱adeeg-deeg̱anamu. Ay tung pag̱intindi yang Dios, magkatamang pisan ang yang mga taung atiang pamagpapinitinsia tung numyu numanyan, belsen na ka ta pinitinsia tung uri. Ig ta yamung nag̱apasaran ta pinitinsia numanyan, palinaynayanamu ra anya. Kasiraanita rang palinaynayan na tung uras ang ipagpabistu na tung ni Ginuu tang Jesus ang liit tung langit, ig mag̱aliw̱utan da ka ta sasang apuy ang pagdaw̱a-raw̱a, kasiraan da ka tanira yang mga angil nang makektel. Ya ray uras ang ipagpakdul na ta silut tung mga taung indi kang lag̱i pag̱intindi tung Dios ang ya ra ka man yang mga taung kumpurming indi nalelyag ang mananged tung Matinlung Balita natetenged tung ni Ginuu tang Jesus ang ya ray ipinagpakaw̱ut tung nira. Yang mga taung mga maning tia, ya ray mangaagma ta pinitinsiang magkatamang pisan ang ipakdul tung nirang asta tung sampa. Ay ipaaw̱ig da ni Ginuu tang Jesus tung katalungaan nang durung pisan agkasusulaw. 10 Yang tanan ang atia mainabu ra kung maglekat da nganing ti Ginuung Jesus tung uras ang ya ra kang lag̱i ay ipinagtipu yang Dios. Yang ipaglekat na ay ug̱ud dayawen da natetenged tung pag̱irimakluen na tung pagkatau yang mga tauan na. Bilang yang pag̱irimakluen na tung kumpurming nagtalig tung anya, ya ray maberengan da ta mupia yang kadaklan ang mga tau. Pati yamu nganing maberengamu ra ka tung pagkabetang na tung uras ang atia natetenged pinananged mi ra yang ipinagpaingmatuud yamen tung numyu.
Nag̱ipag̱ampu Tanira Na Pablo Ang Ipabag̱ay Yang Dios Tung Katuyuan Nang Nagbeteng Tung Nira (1:11-12)
11 Kapurisu ya ra kay nag̱ipag̱ampu yamen ta muya-muya tung Ampuan tang Dios ang ipabag̱ayamu ra anya tung katuyuan nang nagbeteng tung numyung mag̱ing mga tauanamu ra anya atiing primiru. Yadwa pa ang maskin unu pang ubraay ang matinlu ang yay pagyenget-yengatan yang mga isip ming ubraen mi, paktelenamu ra ka anya ang para kayanan mi. Pati yang maskin unu pang buat-buatay ang nag̱aimpisaan mi ra ang asan da ka nga pruibaay yang pagtaralig̱en ming ustu, taw̱anganamu ra ka anyang talusun. 12 Tung maning tia asanamu ra ikadengeg ni Ginuu ta ig pati yamu maumiramu ra ka tung anyang mapadengeg̱an tung uri. Yang tanan ang atia magkamaningan da natetenged ilem tung pagpadag̱en-dag̱en tung numyu yang Ampuan tang Dios durua ni Ginuung Jesu-Cristo.