1 Timoteo, naaw̱a may sasang bag̱ay ang yay dapat ang intindien mu ta maayen. Baklu maglekat ti Ginuung Jesus, may uras ang kaw̱utun ang durug liwag. 2 Yang ipagliwag na, magkamaningan da ta maning taa yang sistima yang kadaklan ang mga tau. Asan da ta mapinagpanadili, asan da ka ta durug kainamlukun tung kuarta, asan da ka ta durug kapinabug̱alen ang yang mga kulu nira pagdakul dang subra, asan da ka ta durug kapinalandawen tung mga aruman nira, asan da ka ta mapinagduminar, asan da ka ta mabinatukun tung mga ginikanan nira, asan da ka ta anday utang nirang kaneeman maskin tung Dios, maskin tung mga masigkatau nira man ngani, asan da ka ta naplekan da ta panggalang nira tung Dios ang anda ra kay pag̱eled tung anya. 3 Asan da ka ta mga taung maskin pang sadiling pamilya nira, indi ra enged eyangan ta gegma na tung nira, asan da ka ta mga taung rangga yang mga isip nirang indi ra enged mabulungan, asan da ka ta mapinagrangga ta dengeg, asan da ka ta mga taung indi enged mag̱egtem tung mga sadili nira, asan da ka ta mga taung andang pisan ay pasunaid nira tung mga taung nag̱apapinitinsiaan nira, asan da ka ta mga taung maskin may matinlung buat-buat, aglalawayan da ka enged nira. 4 Asan da ka ta may pagkatraidur na tung mga aruman na, asan da ka ta mapinalangaasen ang indi enged masagangan ang magpasubu tung anday kalalabten na, asan da ka ta may kulu nirang duminakul da ta subra ang kanisip nira sag̱ad da tung tanan ang bag̱ay, asan da ka ta mga tau ang yang nag̱apagamenan ta mga isip nira belag̱an da yang Dios, kung indi, ya ra ilem yang sadiling kalelyag̱an nirang papsawan. 5 Yang mga taung maning tia, pamagpaita-ita ra ilem ang tanira pamagtuu ka tung Dios, piru bistu tung mga ubra-ubra nira ang indi ra ka enged pagpagaem tung anya ang para paktelen na ra rin ang magtuman yang kalelyag̱an na. Purisu kung mapanawan mu yang mga taung mga maning tia, indi mu enged pakigsasaan. 6 Nag̱apabantaya rang lag̱i yeen ay kipurki maskin numaan may mga manigtulduk ang pamagbuat da ta magkapariu ka tung mga maning ka tiang pag̱urubraen. Kipurki durug kaansianung mag̱armunia tung may mga balay ang basta makled ilem ang para mag̱aral da unu natetenged tung bitala yang Dios buat. Yang katuyuan enged nira, ya ra yang mga baw̱ay ang erekel-ekelan ta kulu ang basi pa ra ilem madayaan da nirang papanangeren tung kumpurming nag̱itulduk nira. Malpes da ilem ang makumbinsir nira, ay teleb dang lag̱i ta kasalanan yang mga baw̱ay ang atia ig dereeg̱en yang mga kalelyag̱an nirang sari-sari ra ilem. 7 Maskin pirmi ra ilem ang pamagpatulduk yang mga baw̱ay ang mga maning tia, piru indi ra ka enged maimung mabilug̱an nira yang kamatuuran. 8 Katulad ka tung ni Janes durua ni Jambres atiing tukaw ang namagpakigkuntra tung ni Moises*3:8 Yay aran yang mga manig̱urasiun ang atiing namagpakigkuntra tung ni Moises duun tung katalungaan ni Paraon ang sinambit tung Exodo 7:11-22; 8:7-19., yang mga manigtulduk ang atiang nag̱ipabantayu tung nuyu pamagpakigkuntra ka tung kamatuuran ang naang nag̱ipagpakaw̱ut ta. Ay ya pa ag̱ari, maning pa tung nalubuk da yang mga isip nirang naplekan da ta pag̱intindi nirang matandes. Tinalyuran da ngani yang Dios ang belag dang bag̱ay ang piaran na pang magturuldukun tung duma ay natetenged yang kamatuuran ang liit tung anya tinalyuran da nira. 9 Piru maskin pamagpakigkuntra ka man tung kamatuuran, indi enged mag̱umintung masyadu yang pag̱urubraen nirang atiang malalain. Kipurki maintindian da ka enged ta kadaklan ang yang mga taung atia nakabusan da ang katulad ka tung na Janes ni Jambres.

10 Piru ta nuyu, Timoteo, natetenged tung pagpakignunut mu tung yeen, nabilug̱an mu ra kung unu pay ipinagtulduku, kung unu pang klasiay yang mga ug̱aliu, kung unu pay sinikaru, kung ya pa ag̱ari yang pagtaralig̱enu tung Dios, kung ya pa ag̱ari yang pagparaurayenu tung mga tau, kung ya pa ag̱ari yang paggeregmaenu tung nira, ig kung ya pa ag̱ari yang pag̱aragwantaenu tung mga pinitinsiang ipinamakdul-pakdul nira tung yeen. 11 Pariu ra atiing dineeg-deeg̱anaw ra ta mga tau duun tung Antioquia, magdasun duun tung Iconio, magdasun pa duun tung Listra, ang duru ka man agkalelbat yang inag̱umanu. Piru kada dineeg-deeg̱anaw, ipinalibriaw ra ka enged ni Ginuu ta†3:11 Mga Binuat-buatan 13:50, 14:5-6, 14:19. 12 Maski nganing tinu pa, kumpurming tinu pay malelyag ang mag̱urusuyun tung nag̱auyunan yang Dios natetenged tung pagpakigkapulit na tung ni Jesu-Cristo, ya ka, talagang mapasaran ka ta padeeg-deeg‡3:12 Ikumpalar tung Mateo 16:24, Juan 15:20, Mga Binuat-buatan 14:22.. 13 Kung natetenged tung mga malalain ang mga taung mga maning tia may yang mga manigtulduk ang mga mandarayang atiang nag̱asambitu, madulangan dang madulangan yang pagkamalain yang pagkatau nira. Bilang dayun-dayun da ilem yang pagdarayaen nira tung mga tau ig dayun-dayun da ka ilem yang pagpadaya yang kumpurming pag̱intindi tung nag̱itulduk nira. 14 Piru maskin maning tiay mainabu, ta nuyu, Timoteo, idayun mu yang pagparanangeren mu tung kamatuuran ang pinag̱aralan mu ang ya ra ka dayun ay pinag̱ineteg̱an yang isip mu ang talagang yay matuud. Kipurki yaming nagturuldukun tung nuyu, sunadu mung pisan ang talagang matalig̱anami nuyung magtulduk yang pulus matuud. 15 Kag yadwa pa, nag̱ademdeman mu pa ka siguru ang disti pa atiing paran-parana pa, nag̱aintindian mu ra yang bitala yang Dios ang ipinagpasulat nang tukaw§3:15a Bilang ya ra yang naggug̱uuyan ang Dating ‘Ipinagpakigpaig̱u’, mag̱impisa tung Genesis ang asta tung Isinulat Ni Malakias., ang duun da ka nga tultulay mu kung ya pa ag̱aring magkatinira ra yang kalibrian mu ekel tung pagtalig mu yang sadili mu tung ni Jesu-Cristong nagpatapnay*3:15b Ikumpalar tung Lucas 24:25-27; 24:44-47; Juan 5:39b, 46; Mga Binuat-buatan 17:3, 11.. 16 Yang tanan ang atiing ipinagpasulat yang Dios, ya ipaeyangay na tung isip yang kumpurming pinanuw̱ul nang magsulat. Purisu durug tinlung gamiten ang para asan da nga mamaresmesay ta kung unu pay tamang nag̱itulduk, ig asan da ka nga maladmaray ta yang mga kamali ta, ig asanita ra ka nga tadlengay yang Dios, ig asanita ra ka ngaugyatay na kung ya pa ag̱ari ita magbuat yang magkatama tung pagterelengen na. 17 Yang katuyuan na tia ay ug̱ud yang sasang pagpaturuw̱ulun tung Dios†3:17 1 Timoteo 6:11 asan da magluang simpan dang pisan ang manirbian tung anya natetenged biasa rang magtuman da yang maskin unu pang mga ubra-ubraay ang matitinlu.