Yang Yaklung Isinulat Ni JUAN
Patkaw Ang Pasanag Tung Kumpurming Magbasa
Atii kanay tung timpu ni Juan, may mga manigparakaw̱utun ang pinanuw̱ul nang mamagliliw̱utun tung duma-rumang lugar ang para mamagparakaw̱utun yang Matinlung Balita natetenged tung kalibrian ang pinagtukud ni Ginuung Jesu-Cristo. Ang pagkatapus, pagkaw̱ut nira tung sasang lugar ang may sam pundaan yang mga tumatalig, indi ra rinisibi yang sasang pagmangulu ang yay nag̱aranan tung ni Diotrefes. Maskin pangalelyag yang dumang mga tumatalig ang mamag̱asikasu tung mga bisitang atia, nag̱atag̱aman nang mag̱ampalaren. Ang pagkatapus kung mamag̱asikasu ra ka enged, ag̱ityapuiraen na ra ilem dayun tung sam pundaan (10). Ay ya pa ag̱ari, ti Diotrefes ang atia indi kang lag̱i pag̱ilala tung ni Juan. Ay atii pala, yang pag̱asikad na ang tanya ilem ay tingaraen ang may kalalangan tung sam pundaan ang atia (9). Purisu naisip da ti Juan ang magsulat tung sasang ungkuy nang nag̱aranan tung ni Gayo ang lug̱ud tung sam pundaan ang atia. Tukaw tung tanan dinayaw na natetenged tung pag̱arasikasuen na tung mga manigparakaw̱utun ang atiang pinanuw̱ul na (3-8). Pagkatapus ipinabantay na ra ka dayun ang kung kumaw̱ut da nganing tanya asan tung nira, ipatalunga na ra tung ni Diotrefes ang ipatuw̱al yang mga ubra-ubra nang malalain ang na Juan nag̱ipagsatsat na tung kadaklan ang pulus tung bukli ang para mararangga ilem tanira (10). Pagkatapus ipinailala na ra dayun tung ni Gayo ti Demetrio ang yay pinapag̱ekel na yang sulat ang naa ang para risibien da ni Gayong asikasuen (12).
1
Yang Intrada Yang Sulat (1-4)
1 Gayong nag̱amaalu,
Yuung pag̱aningen ang pagmaepet-epet napagsulataw ra tung nuyu ay nag̱agegmaana yeen ta duru natetenged pariuitang pag̱usuy tung kamatuuran ang liit tung Dios. 2 Ungkuy, yang nag̱ipag̱ampuu tung Dios para tung nuyu ang padag̱en-dag̱enana ra anyang pirmi tung tanan ang pag̱urubraen mu pati paninanguni mu ang pirmi ka tung maayen ang katulad ka tung pagtaralig̱en mu tung anyang nag̱abalitaanung maayen ka. 3 Nag̱apag̱aningaw ta maning tia ay tung pagkaw̱ut tani yang mga putul tang duma, durung pisan agkasadya yang isipu natetenged tung ibinalita nira tung yeen ang yawa unu pag̱usuya tung kamatuuran, bilang asan ka unu nag̱ipaatuay mu yang pasais mu. 4 Anda ray magdeeg ta ikasadya yang isipu ang mabalitaanaw ra nganing natetenged tung maning tung numyung agkaw̱ig̱enung mga anaw ang yang mga pasais mi asan tung kamatuuran nag̱ipaatuay mi.
Nag̱apaktel Na Ti Gayong Magpadayun Tung Pagparadag̱en-dag̱enen Na Tung Mga Manigparakaw̱utun (5-8)
5 Ungkuy, yang pag̱abuat mu talagang atung pisan tung kamatuuran ang nag̱apananged ta. Ay kipurki kada mamansikaw̱ut da nganing asan yang mga putul tang mga tumatalig ang pamagliliw̱utun, ya ray nag̱apadag̱en-dag̱enan mu ta mupia maskin indi mu pa nganing nag̱ailala ang kaisan. 6 Ay kipurki tanira mismu namagbaw̱alitaen da nganing tung mga kaputulan tang sam pundaan tani kung ya pa ag̱ari yang pagpaita mu yang gegma mu tung nira. Purisu durug tinlu kung ya ray padayunan mu yang pagparadag̱en-dag̱enen mung atia tung mga pagparanawen nirang pamagparakaw̱utun ang katulad ka tung magkabag̱ay ang buaten ta tung kumpurming pagpaturuw̱ulun tung Dios.
7 Dispuis pa, yang mga putul tang atia, kada mamagliliw̱utun ang para mamagparakaw̱utun tung mga tau natetenged tung ni Jesu-Cristo, indi pamagrisibi ta supurta tung belag̱an mga tumatalig. 8 Purisu ta yaten ang mga tumatalig kaministiran ang itay magpadag̱en-dag̱en tung mga maning tia ug̱ud asanita ra nga sug̱apilay tung pagparakaw̱utun nira yang kamatuuran.
Nag̱asambit Na Yang Buat-buat Ni Diotrefes Ig Kung Unyen Na Pa (9-10)
9 Tan taa pa napagpaekelaw ra ta sulat tung sam pundaan asan natetenged tung bag̱ay ang atia. Piru anday pinakaw̱ut na natetenged tung ni Diotrefes ang naang indi kang lag̱i pag̱ilala tung katengdanan yamen. Ay ya pa ag̱ari, yang pag̱asikad na ang tanya ilem ay tingaraen ang pagmangulu tung sam pundaan. 10 Purisu kung kumaw̱utaw ra nganing asan, ipatalungaw ra tung anyang ipatuw̱al yang mga ubra-ubra na ang yami nag̱ipagsatsat na tung kadaklan ang pulus tung bukli ang para mararanggaami ilem. Belag̱an pa ka enged kuntintu tung isip na tia, ang indi, nag̱adulangan na pa. Ay kung may mamansikaw̱ut da nganing ang mga putul tang pamagliliw̱utun, indi na ra ag̱asikasuen tung seled yang pamalay-w̱alay na ig yang dumang pangalelyag ang mamag̱asikasu mag̱ampalaren na pa. Ang pagkatapus kung mamag̱asikasu ra ka enged, ag̱ityapuiraen na ra ilem dayun tung sam pundaan.
Nag̱apaamanan Na Ang Indi Na Enged Usuyun Yang Malain, Kung Indi, Ya Ilem Yang Matinlu (11)
11 Ungkuy, indi ta enged usuyun yang malain, kung indi, yang usuyun tang pirmi ya ra ilem yang matinlu. Ay ya pa ag̱ari, yang taung pagpadayun tung pagburuaten nang matinlu yay maning pa tung inana ra yang Dios. Piru yang taung pagpadayun tung pag̱urubraen nang malain, indi pa ka enged nag̱apagpakirampil ang matuud tung Dios.
Nag̱akegngan Na Ti Demetrio Ug̱ud Risibien Ni Gayong Padag̱en-dag̱enan (12)
12 Kung natetenged tung ni Demetriong atiang pinapag̱ekelu yang sulat ang atia, tanya nag̱akegngan yang tanan ang mga kaputulan ta tani ig pati yang kamatuuran mismu, kung mapagbitala ilem, magkereng da ka tung anya ang yang mga pasais na talagang uyun tung pitik na. Pati yami enged, pagkerengami ka tung anya ig nag̱askean mu ra ka ang kung unu pay nag̱ipagpaingmatuud yamen natetenged tung sasang tau, talagang matalig̱an mung matuud.
Yang Pagtapusan Yang Sulat (13-15)
13 Ta nungaynang pag̱impisaw yang pagsurulatenu tung nuyu, duru pa ka rin ang nag̱aisipung ianing tung nuyu. Piru numaan anda ray gustuu ang ipabtangu pa tung sulat ang naa. 14 Kung indi, dakulung sarig̱u ang indi ra ilem buay mangayaw ra ka enged asan tung nuyu ug̱ud mag̱emetanita sing magkesen.
15 Buinu, yang nag̱ipag̱ampuu para tung nuyu, ungkuy, ang mas pang ikasadya mu yang kaampiran mu tung Dios ang naang baklu.
Yang mga ungkuy ta tani pamagpakikumusta ka tung nuyu asan. Asta yang mga ungkuy ta asan, panganingen mu ka sasa may sasa ang yuu pagpakikumustaw ka tung nira asan.
Ya ra ilem tia ay masulatu,
Juan ang pag̱aningen ang pagmaepet-epet