1 Numanyan may sam bilug sing pananglit ang ipinagngel ni Jesus tung mga tauan na. Yang pag̱asikad na ang tanira pirming magpaderep ang mag̱ampu tung Dios, ang maskin magpanaw pa tung mabuay-w̱uay yang tuw̱al na, indi ka enged magpaluw̱ay yang mga kinaisipan nira. 2 Mag̱aning yang pananglit na, “Numanyan may sasang wis ang pagtinir duun tung sasang lansangan. Yang wis ang naa, anday pag̱eled na tung Dios ig anda kay panggalang na tung mga masigkatau na, maskin tinu pa. 3 Numanyan may sasang balung baw̱ay tung lansangan ang atii. Pirming pagpabalik-balik tung wis ang pagpataw̱ang enged ang mag̱aning, ‘Maginuung wis, taawaw si pagdangep tung nuyu, taw̱angay kang dipindiran tung taung atiing panlepes tung yeen,’ ag̱aaning. 4 Nabuay ra yang pagpabalik-balik na, piru indi ra ka enged sinapet yang wis. Numanyan atiing masyadu ra enged yang pagpataw̱ang yang balu, napag̱isip da yang wis. Pinapagkesen-kesen na ra yang isip nang maning taa: ‘Yuu, tung bag̱ay anday pag̱eleru tung Dios, pagpadamelaw ra ilem yang ityuraw tung mga masigkatauu. 5 Abaa piru magamu ra ilem tung kuluu yang pagpabera-w̱era yang balung naa tung yeen. Maayen pa dipindiranu ra ilem tung makali ang para mapalus da tung kuluu. Muya kung indi taw̱anganu, paluw̱ayanaw ra ilem anya ta pagpabalik-balik.’ ” 6 Numanyan mag̱aning ti Ginuu tang nagpasanag, “Ta, isipen mi ra kanay ta mupia yang inaning yang wis ang atiang durug kasayud ta ug̱ali. 7 Yang Dios pa kaya ang pulus tama yang pag̱abuat na, indi w̱a mas pang magdipindir tung mga tauan nang sadili ang yay pangambay tung anyang pagpataw̱ang kaldaw law̱ii? Ayw̱a kanisip mi tia paw̱aya-w̱ayaan na ra ilem tanira? 8 Iugtulu tung numyu, dipindiran na tia tung makali. Ug̱aring ilem, ta yeen ang pag̱aningen ang Maninga Tau, kung kaw̱utun da nganing yang uras ang ipaglekatu taa tung kaliw̱utan ang naa ang duru ka man agliwag yang nag̱apasaran yang mga tau, duru pa w̱asung kaw̱utanung pagpadayun pa ka enged yang pagtaralig̱en nira tung yeen*18:8 Gustu ni Jesus ang yang tanan ang mga tauan na bilug̱un da nira yang mga isip nira ang tanira mabilang da tung mga taung pagpadayun pa ka enged yang pagtaralig̱en nira tung anya ang asta tung uras ang ipaglekat na, maskin durug liwag yang nag̱apasaran nira.?”

9 Numanyan may sasa si kang pananglit ang ipinagngel ni Jesus. Yang rumbu na para tung duma asan ang pagtalig tung mga sadili nira ang tanira nagkabag̱ay ra tung pagterelengen yang Dios ang yang mga masigkatau nira yay nag̱alamku nirang teleb ta kasalanan. 10 Maning taa yang pananglit na, “Simanyan may durua nga tauan ang nanungul duun tung pagtuuan ang pinakalusu ang para magtuu tung Dios. Yang sam bilug Pariseo, yang sam bilug manigpanukut ta mga balayaran tung gubirnu. 11 Numanyan, pagkaw̱ut nira duun, naang Pariseo nagpaag̱es-ag̱es da tung kadaklan ang yay nag̱apamiruan na ang pagkatapus nag̱ampu ra ta maning taang pag̱arampuen ang ya ka ag̱ipagngelay na tung sam bilug. ‘Ampuanung Dios, pagpasalamataw tung nuyu ang yuu belag̱anaw pariu tung kadaklan ang mga manlelepes, mga mandaraya, mga maniglimbung, ang katulad da enged tung manigpanukut ang naang talagang teleb ang pisan ta kasalanan. 12 Ay ta yeen, tung seled san linggu may duruang kaldaw ngani ang ag̱ipamleku yang pagparanganenu. Dispuis yang tanan ang mga pangitaw pati yang tanan ang mga pruduktuu, luw̱us agparti-partienu ngani ta sam puluk ang parti ang para yang sam parti yay nag̱ikdulu tung nuyu†18:12 Atii kanay yang sam parting atiang nag̱ikdul na tung Dios, yay gastus yang mga pari may yang mga tumataw̱ang ang namagsirbisyu tung pagtuuan nirang mga Judiong pinakalusu duun tung Jerusalem.,’ ag̱aaning. 13 Taa numanyan naang manigpanukut tanya, duun da ilem ngakdeng tung alawid-lawid tung kadaklan ang pamagtuu ang yang anyang pag̱arampuen, indi ra nganing natingara tung langit, kung indi, ya ra ilem mamukpuk tung debdeb naang mag̱aning, ‘Ay Ampuanung Dios, duruaug kakinasalananen. Ildaway kang patawaren ug̱ud indiaw dangaten yang kasisilag̱en mu.’ ” 14 Numanyan mag̱aning ti Jesus ang nagpasanag, “Iugtulu tung numyu, yang taung naang sam bilug, baklu ra nandanek ang minulik tung balay na, ya ra kang lag̱i ay inusgaran yang Dios ang salu rang pisan tung pagterelengen na, belag̱an yang sam bilug. Kipurki kung tinu pay pagpaabwat tung sadili na, ya iparanekay yang Dios ang kaskasay. Piru kung tinu pay pagparanek tung sadili na, ya ipaabwatay nang tapnayay,” ag̱aaning.

15 Taa numanyan maskin mga mamulang gereg̱esye, pag̱apangkelan da yang mga ginikanan nira duun tung ni Jesus ang para pampabisaen da nira tung anya. Piru pagkaita yang mga taung atiang nag̱apangugyatan ni Jesus, diritsyu rang sinambeng nira. 16 Piru ti Jesus tanya, anday dumang binuat na, yang mga mamulang atia ginuuyan nang mamagpadayun da ka enged tung anyang mamagpalenget. Pagkatapus dayun na rang inaning yang mga taung nag̱apangugyatan na ang “Eey, yang mga mamulang atia, paw̱ayaan mi ra ilem ang mamagpalenget da tani tung yeen. Indi mi ra enged pagsagangen, ay kipurki kung tinu pay may pagtalig nira tung Dios ang katulad ka tung pagtaralig̱en yang mga mamulang naang bug̱us tung mga ginikanan nira, lug̱ud da tung mga taung pamagpagaem dang bug̱us tung Dios. 17 Iugtulu tung numyu yang kamatuuran, kung indiamu ra magpakbung tung mga mamulang mapinagparanek tung mga may idad tung nira, tay puis, indi mi ra enged maispirinsiaan tung mga sadili mi kung unu pay palaksu yang paggaraemen yang Dios tung pagpangabui mi.”

18 Numanyan may sasang taung may katengdanan duun tung banwang atii ang ya ray nagbugnu tung ni Jesus ang mag̱aning, “Ameey, nag̱askeanu ang yawa sasang maayen ang tau. Kung mga sarang tung nuyu, may gustuu rin ang talimaanenu tung nuyu. Unu pay dapat ang buatenu ang para mapagpasapenaw tung Dios ang anday katapus-tapusan?” 19 Mag̱aning ka ti Jesus ang nagtimales, “Muya indi mu ilem nag̱askean kung unu pay linagpakan na atiing inaningaw ra nuyung maayen. Anday dumang sarang ang maaning mung maayen kung indi ultimu ilem yang Dios. 20 Yang mga katuw̱ulan na, nag̱askean mu ra ka siguru. Ulitenu ra kanay ang ipademdem tung nuyu. ‘India maglimbung tung kasawa mu, india mangimatay tung masigkatau mu, india manakaw, india manistigus ta bukli tung katalungaan yang ustisia, ig galangen mu ti tatay mu may ti nanay mu.’ ” 21 Ag̱aaning ka yang taung atiang nagtimales, “Piru elat kanay, Ameey. Yang tanan ang atiang mga katuw̱ulan ang sinambit mu, luw̱us dang nag̱atumanu mag̱impisa pang atiing paran-paranaw pa.” 22 Pagkagngel ni Jesus yang tuw̱al na, mag̱aning tung anya, “Ya ra ilem taa yang pagkakulang tung nuyu. Mulika ra kanay. Yang tanan ang kamanggaran mu ipaalang mu ra. Yang kabayaran nang kuarta ipamakdul-pakdul mu ra tung mga maliliwag̱en. Kung yay tumanen mu, ay tia simpanana ra yang Dios ta kamanggaran mu duun tung langit. Pagkatapus ta pamakdul-pakdul mu, magbalika ra ka tani ang magpaugyat tung yeen,” mag̱aning. 23 Numanyan pagkagngel na tia inampayan da ta kapupungawen nang duru. Ay ya pa ag̱ari, durung kamanggaran na.

24 Numanyan pagkaita ni Jesus tung anyang magpungawen da, dayun dang nagbitala tung mga tau ang mag̱aning, “Durug liwag ang yang sasang manggaranen magpalamtuk yang pundu yang kinaisipan nang magpagaem ta bug̱us tung Dios. 25 Kung maliwag ngani ang yang kamilyu pumuyuk tung buli yang tingway, mas pang maliwag ang yang sasang manggaranen magpalamtuk yang pundu yang kinaisipan nang magpagaem ta bug̱us tung Dios,” ag̱aaning. 26 Atii, yang nangagngel tung inaning ni Jesus ang atia, namag̱araning-aningan da, “Tay, kung maning tii pala ang maski nganing yang mga manggaranen ang kanisip tang alenget tung Dios, indi nganing pala matapnay, ya pa yang kadaklan ang mga tau?” 27 Mag̱aning ka ti Jesus ang nagtuw̱al, “Yang indi kayanan ta mga tau, yay kayanan yang Dios,” ag̱aaning. 28 Atii, ti Pedro ya ray nabngang mag̱aning, “Teed mu, Ameey, ta yaming pagpaugyat tung nuyu, pinalpasan da yamen yang tanan ang nabtang tung pudir yamen basta magpakignunutami ra ilem tung nuyu.” 29-30 Mag̱aning ti Jesus ang nagtimales tung nirang tanan, “Iugtulu tung numyu, kumpurming tinu pay namutwan tung sadiling pamalay-w̱alay na ubin tung kasawa na, ubin tung mga putul na, ubin tung mga ginikanan na, ubin tung mga ana na man arangan da ilem tung pagparakaw̱utun na tung mga tau natetenged tung paggaraemen yang Dios ang naang baklung pag̱atukuru, ya ray pakdulan na ta kapakli yang tanan ang atiang pinamutwanan na ang pira-pira rang dubli numanyan tung panimpung naa ig tung baklung panimpung kaw̱utun tung uri, magpasapen da ka tung Dios ang asta tung sampa,” mag̱aning.

31 Numanyan yang mga tauan ni Jesus ang atiang sam puluk may durua, pinampaligbin nang pinampasanag̱an ang inaning, “Ta, taawita rag panungul ang panganing duun tung Jerusalem. Muya maberengamu tung ianingung naa tung numyu. Kung kumaw̱utita ra nganing duun, magkamatuud da yang tanan ang nagkarasulat yang mga manig̱ula natetenged tung yeen ang pag̱aningen ang Maninga Tau. 32-33 Kipurki iintrigaaw ra tung pudir yang belag̱an mga masigkanasyun ta ang anda enged ay pag̱intindi nira tung Dios. Buatenaw ra nirang sasang kayaman, deeg-deeg̱anaw ra ka nirang lawayan yang mga tinanguniu ang pagkatapus pikadaanaw ra ka nira ta burdun bakluaw ra imatayay nira. Piru tung pagkaw̱ut yang yaklung kaldaw, pabungkarasenaw ra ka enged yang Dios,” mag̱aning. 34 Piru yang mga aruman nang pinag̱aning na, midyu tung anda ray naerem. Midyu tung sasang pasig̱em ang indi enged nira namaresmesan kung unu pay nag̱adapatan na.

35 Numanyan atiing alenget da tanira tung Jerico, may sasang buray ang yag kakarung tung binit yang dalan ang pagpalimus. 36 Numanyan, pagkasinti na ang may mga taung buntun ang pamagtaklib da, nagtalimaan da tung mga taung katepad na kung unu pay nag̱adapatan na. 37 Mag̱aning ka yang dumang nagtimales, “Ti Jesus ang atiang tag̱a Nazaret magtataklib da.” 38 Pagkagngel na ang ti Jesus da tia, dayun dang nagkekendalen ang mag̱aning, “Jesus, yawang manubli ra tung paggaraemen ni Adi David, ildaway ka!” 39 Numanyan yang mga taung atiang pamagtukaw tung nirang sam paluyug̱an, ya ray namagsambeng tung anyang mag̱ipes da. Piru belag ya mag̱ipes, kung indi, mas pang ya magkekendalen ang magkekendalen ang mag̱aning, “Yawang manubli ra tung paggaraemen ni Adi David, ildaway ka!” 40 Numanyan diritsyu rang nagtadeng ti Jesus ang nagkalalangan tung mga tau ang yang buray guyuran da kanay duun tung anya. Numanyan pagkaw̱ut yang buray, dayun dang tinalimaan ni Jesus ang inaning, 41 “Ta, unu pay gustu mung buatenu para tung nuyu?” Mag̱aning yang buday ang nagtuw̱al, “Ay Ameey, gustuu rin ang maitaw si.” 42 Ag̱aaning ti Jesus ang minles, “Ala, maitaa si! Natetenged itinalig mu ra tung yeen yang sadili mu, naulikan da tia!” 43 Atii, lag̱i-lag̱ing naita si ka man. Pagkatapus dayun dang nagpakignunut tung ni Jesus ang sigi-sigi ra ilem yang pagdarayawen na tung Dios. Asta yang tanan ang mga taung nangaita tung nainabung atia, duru kang pagdarayawen nira tung Dios.