2
Yang Sulat Ang Nag̱ipaekel Ni Ginuung Jesus Tung Sam Pundaan Yang Mga Tumatalig Duun Tung Efeso (2:1-7)
1 Pagkatapus inaningaw si anyang “Buinu, Juan, magsulata ra kanay ta italig mu tung pangerengan tung sam pundaan yang mga tumatalig duun tung Efeso. Maning taa yang ipabetang-betang mu asan:
‘Yang may bitala taa ya ra yuung ti Jesus ang pagtapnay tung pitung bilug ang dumakel tung kalimaung naang tuu kag pagpanaw-panawaw tung kakngaan yang pitung parabdungan ta kaas ang purus bulawan. 2 Nag̱askeanu yang tanan ang pag̱abuat mi asan, yang pagpakabedlay mi may yang pag̱aragwantaen mi tung mga kaliwag̱an ang nag̱apasaran mi. Nag̱askeanu ka ang indiamung pisan pagkusintir tung mga taung mga malain. Ay tinuung mi ra nganing yang duma ang nag̱ambu ang tanira unu mga taralig̱anu bilang mga apustulu buat. 3 Nag̱askeanu ka ang yamu mainagwantaen. Ay maski may mga kaliwag̱an ang nag̱apasaran mi arangan da ilem tung yeen ang nag̱akegngan mi, piru indiamu ka enged pagpaluw̱ay. 4 Ug̱aring ilem, ya taa yang indi enged nag̱auyunanu tung numyu. Nanrusaw ra yang paggeregmaen mi tung yeen. Belag dang pariu atiing bakluamu pa ka ilem nagtalig tung yeen*2:4 Simpri pati yang paggeregmaan nirang magpurutul damay ra kang nanrusaw.. 5 Pademdeman ming pademdeman kung ya pa ag̱arig katinlu yang paggeregmaen mi tung yeen atii kanay ang ya ray nalagpakan mi. Ya ra kay dayun ay panlignaan mi yang pagkalagpak ming atia ang pagkatapus yang mga buat-buat ming atiing primiru, ya si ay pakatuan ming usuyun. Ay kung indiamu manligna, pamirisiaanamu ra yeen ay kuatenu ra yang parabdungan yang kaas tung kindengan na asan tung numyu. 6 Piru maskin nag̱apagbitalaw ta maning tia, may sasa kang dayawenu tung numyu. Aglalawayanamu ka tung ubra-ubra yang pamag̱usuy tung ni Nicolaus†2:6 Yang nag̱apapaktelan ni Nicolaus, maskin tumatalig unu, anday bali ang magpapsaw tung tanan ang kalelyag̱an na. ang ya kang pisan ay nag̱alawayanu.
7 Purisu kung nainu pay pamamati, kaministiran intindien da nira ta mupia kung unu pay nag̱ianing yang Espiritu Santo tung mga tumatalig ang pamagsaragpun-sagpun ang kada sam pundaan. Kung tinu pay magprusigir ka enged ang magpakatu tung primirung paggeregmaen na tung yeen ang durug kinit pati tung mga kaputulan na, yay tugtanung mamangan yang burak yang ayung pagpangabuian ta unaynay ang duun agbebtang tung kaismayaan tung katalungaan yang Dios‡2:7 Yang pananglit ang atia pinisik ni Juan tung Genesis 2:9; 3:22, 24 ig inulit na ka tung 22:2, 14..
 
Ya ra ilem tia ay maaningu tung numyu.’ ”
Yang Sulat Ang Nag̱ipaekel Ni Ginuung Jesus Tung Sam Pundaan Duun Tung Esmirna (2:8-11)
8 Utru si, mag̱aning si ti Jesus tung yeen, “Buinu, Juan, magsulata si kanay ta italig mu tung pangerengan tung sam pundaan yang mga tumatalig duun tung Esmirna. Ya taa yang ipabetang-betang mu asan:
‘Yang may bitala taa ya ra yuung ti Jesus ang makagag̱aem tung tanan ang disti pa tung katebtew̱an ang asta ra ilem tung kauri-urian, andang pisan ay nag̱ainabu tung bilug ang kaliw̱utan ang lua pa tung kagaemanu. Napatayaw ang pagkatapus nabuiaw si kang uman. 9 Nag̱askeanu yang mga pinitinsiang nag̱apasaran mi. Nag̱askeanu ka ang maskin maliliwag̱enamu ka man, piru manggaranenamu tung nag̱auyunan yang Dios. Nag̱askeanu ka yang nag̱ipagbangdan tung numyu yang mga Judio asan ang para ya ray paglainan ta isip yang gubirnu tung numyu. Kumus tanira mga Judio ka man, pamansianing ang ultimu ilem unu tanira ay matuud ang mga tauan yang Dios ang pagkatapus belag ka. Kung indi, yang pagpaturuw̱ulunan nirang sam pundaan belag yang Dios ang katulad tung nag̱alaum nira, kung indi, ya ra ti Satanas mismu. 10 Indiamu enged mag̱eled tung maskin unu pang mga pinitinsiaay ang dapat magdarangat tung numyu ang indi ilem buay. Patentenen mi yang mga isip ming mag̱agwanta ay indi ra ilem buay, paiseg̱en da ni Satanas yang may mga katengdanan asan ang yang duma tung numyu ipakalabus da nira ug̱ud asanamu ra nga tag̱amay nira ta reg̱es ang para mamalpasamu ra tung yeen. Magkatiniramu ra ta mga pinitinsia tung seled sam puluk ilem ang kaldaw. Purisu magpadayunamu ra ka enged ta ustu tung pagtaralig̱en mi tung yeen, maskin yay magakdan mi ta kamatayen mi. Siguradung pakdulanamu ra yeen yang maning pa tung sasang primyung nag̱ipagpadengeg tung sasang nandeeg tung karira. Anday duma, ipagpasapenamu ra yeen tung Dios ang asta tung sampang anda enged ang pisan ay katapus-tapusan na.
11 Purisu kung nainu pay pamamati, kaministiran intindien da nira ta mupia kung unu pay nag̱ianing yang Espiritu Santo tung mga tumatalig ang pamagsaragpun-sagpun ang kada sam pundaan. Kung tinu pay magprusigir ang asta masalapayan na ka enged yang mga kaliwag̱an ang atia, indi ra enged sakpen yang sintinsiang atiang pag̱aningen ang yadwang kamatayen.
 
Ya ra ilem tia ay maaningu tung numyu.’ ”
Yang Sulat Ang Nag̱ipaekel Tung Sam Pundaan Duun Tung Pergamo (2:12-17)
12 Utru si mag̱aning si ti Jesus tung yeen, “Buinu, Juan, magsulata si kanay ta italig mu tung pangerengan tung sam pundaan yang mga tumatalig duun tung Pergamo. Ya taa yang ipabetang-betang mu asan:
‘Yang may bitala taa ya ra yuung ti Jesus ang may maninga isi ta ispadang paglua tung ngangaw ang durug tarem yang lantip nang magtimbang. 13 Nag̱askeanu ang asanamu pagtinir tung lansangan ang atia ang yang kadaklan ang mga masigkabanwa mi nag̱akemkem ta mupia ni Satanas§2:13 “lansangan ang atia ang yang kadaklan ang mga masigkabanwa mi nag̱akemkem ta mupia ni Satanas.” Tung bitalang Giniriego “lansangan ang pagkarungan ni Satanas ang paggaem.” Nag̱aguuyan ni Juan ta maning tia ay natetenged yang lansangan ang atii yay pinakasintru yang pagturuuen yang mga tau tung bultu ni Adi Caesar tung uras ang atii.. Nag̱askeanu ka ang mapeg̱et yang pamges mi tung yeen. Ay indiamu ka enged nag̱ingwara tung yeen ang maning indiamu ra magpadayun tung pagtaralig̱en mi tung yeen ag̱ad inimatay pa yang aruman ming ti Antipas asan tung pag̱atiniran enged ni Satanas natetenged ilem tung pagtaralig̱en na tung yeen. Tanya sasang durug kapiadur ang nagpaingmatuud tung mga kaarumanan mi asan natetenged tung yeen. 14 Piru may mga bag̱ay ang pira pang bilug ang indi enged nag̱auyunanu tung numyu. May mga kaarumanan ming duma asan ang pamag̱usuy tung magkapariu tung ikinunsiu ni maepet ang Balaam tung ni Adi Balak atiing tukaw kung ya pa ag̱ari yang pagsunlug na tung mga Israel ang para mamanlipat da tung Dios ang mamagtuu tung belag̱an Dios. Ay yang ikinunsiu na tung anya ang maayen pang pangimbitaren na yang mga Israel ang mamagpasakep tung pista nirang mamagpakisaru tung nag̱isag̱ud nira tung belag̱an matuud ang Dios ang nunut da ka ta pagpakidalan nira tung maskin ninu pang baw̱ayay*2:14 2:20; Mga Bilang 22:1-5; 25:1-2; 31:16; Judas 11. 15 Yang pagpakigsaru yang mga Israel ang atii, anggid-anggid da tung mga ubra-ubra yang mga kaarumanan ming duma asan ang pamag̱usuy tung nag̱itulduk ni Nicolaus†2:15 Yang mga taung atii durung pagtag̱am nira ta sunlug tung mga tumatalig ang basi pa ra ilem maguyuran da nirang mamagtuu ka tung bultu ni Adi Caesar ang nunut da ka ta pagsag̱ud tung bultung atii ang duun da natenakan yang paggeregmaen nirang bug̱us pa rin tung ni Ginuung Jesus.. 16 Purisu magpamanmanamu ra yang mga isip mi. Ustu ra tiang pagkusintir mi tung mga kaarumanan ming atia. Ay kung indiamu magpamanman, angayenamu ra yeen tung makali ang para silutanu ra yang mga kaarumanan ming atia. Anday dumang ipagdaliu tung nira, ya ra yang ibitalaw tung nira ang yay maning pa tung isi ta ispadang paglua tung ngangaw.
17 Purisu kung nainu pay pamamati, kaministiran intindien nira ta mupia kung unu pay nag̱ianing yang Espiritu Santo tung mga tumatalig ang pamagsaragpun-sagpun ang kada sam pundaan. Kung tinu pay indi magpadeeg tung sistimang atiang pangkaliw̱utan, yay pakdulanu yang pag̱aningen ang manang itinaluk‡2:17a ‘manang itinaluk’ Atiing tukaw ang atiing alang-alang da yang pagkabetang yang mga Israel duun tung banwang kapas, inildawan yang Dios ang pinakdulan ta sasang pamangan ang ginuuyan nirang ‘mana’. Pagkatapus atiing anda ray kaministiran nira, nagkalalangan da yang Dios ang yang sa nga mangkukan yang mana ipabtang da nira tung sasang baul ang ya ray ipabtang nira tung pagtuuan nira tung anya duun tung kuartung pinakasagradu (Exodo 16:33-34). Pagkatapus tung kauri-urian da, yang pagtuuan nirang atii tung Dios diniadu yang mga kuntrariu nira. Pagkatapus tung kauri-urian da, may ibinalita yang mga pamagpakigmaepet ang yang mangkuk unung atii, ingkelan da unu ni Jeremias ang itinaluk tung sasang leyang duun tung bukid ang atiing pag̱aningen ang Sinai. Dispuis, kung magkaw̱ut da unu yang pag̱aningen ang Cristong pinilik yang Dios ang maggaraemen, yang mana unung atii, ya si unu ay ipapaan yang Dios tung mga tau. Purisu kung pasadsaran ta yang linegdangan yang inaning ni Ginuung Jesus ang naa natetenged tung pag̱aningen ang mana ang atiing itinaluk, ya ra yang tanan ang kaayenan ig kasadyaan ang nag̱ibaratu na tung mga tauan na duun tung baklung kaliw̱utan.. Dispuis pakdulanu ka ta maning pa tung batung kulit ang may aran ang baklu ang isinulat asan ang inding pisan nag̱aske-askean ta tau, kung indi, suluminting makdek asan, ultimu ilem yang pakdulanu§2:17b Yang ipinagsakuy ni Ginuung Jesus tung batung atia ay nag̱askean na ang yang kadaklan ang mga tau duun, pamag̱ekel-ekel ta mga panangga ang yang duma mga batu kang pariu ka tung sinambit na. Yang ilyag nang ianing ang anda rang pisan ay kaministiran yang mga tumatalig tung mga pananggang atiang dati gated tanya mismung pagpalandungan nira yay magsirbing pangultimung panangga nira..
 
Ya ra ilem tia ay maaningu tung numyu.’ ”
Yang Sulat Ang Nag̱ipaekel Ni Jesus Tung Sam Pundaan Duun Tung Tiatira (2:18-29)
18 Utru si, mag̱aning si ti Jesus tung yeen, “Buinu, Juan, magsulata si kanay ta italig mu tung pangerengan tung sam pundaan yang mga tumatalig duun tung Tiatira. Ya taa yang ipabetang-betang mu asan:
‘Yang may bitala taa ya ra yuung ti Jesus ang yay pag̱aningen ang Ana Yang Dios ig yang mataung temeleng durug kadekdek ang midyu tung apuy ang madkal, ig yang kakayu midyu tung saway ang pinabalaan tung apuy ang pagkatapus pinakintab ta maayen. 19 Nag̱askeanu yang tanan ang pag̱abuat mi asan, yang paggeregmaan ming magpurutul ang nunut ta pag̱arasikasuan mi sasa may sasa may yang pagtaralig̱en mi tung yeen ang mabaked may yang pag̱aragwantaen mi tung mga kaliwag̱an. Dispuis, nag̱askeanu ka ang mas nganing nagtinlu yang mga ubra-ubra mi kay tung atiing primiru ang bakluamu pa ilem nagtalig tung yeen. 20 Ug̱aring may sasang indi enged nag̱auyunanu tung numyu. Pagkusintiramu tung sasang baw̱ay asan tung grupu mi ang pagkapariung pisan ta ubra-ubra yang sasang raynang tukaw ang nag̱aranan tung ni Jezebel*2:20a Ti Jezebel ang atiang nasambit, yay kasawa ni Adi Ahab atiing tukaw duun tung banwang Israel. Ya kay nangguyud tung mga Israel ang para papaglaket-laketen da ilem nira yang pagturuuen nira tung ni Yawi may yang pagturuuen nira tung ni Baal. Kung gustu tang pasadsaran, duun ta nga basaay tung 1 Mga Adi 16:31-33; 18:4, 13; 19:1-2; 21:25.. Pag̱ambu ang tanya unu sasang pag̱atalig̱an yang Dios ang magpalatay yang bitala na buat. Ekel tung nag̱itulduk na tung mga turuw̱ulunu asan, nag̱adayaan nang magpakisadu tung nag̱isag̱ud tung belag̱an matuud ang Dios ang nunut da ka ta pagpakidalan nira tung maskin tinu pang baw̱ayay†2:20b Atii kanay duun tung Tiatira, may mga grupu yang mga manig̱ubra ang kada sang klasing pag̱urubraen. Kaministiran ang yang tanan ang mga lalii, luw̱us mamagpasakep tung grupu na kung unu pang ubraay. Kung indi magpasakep, asan da nga plekay ta ipagpangabui na. Dispuis kada grupu may nira-nirang ginuu-ginuung pag̱atuuan nira bilang patrun nira ang pagpistaan nira. Ubligadu yang tanan ang kinasakpan yang kada grupung mamagpasakep tung pista. Kapurisu kung may sasang tumatalig ang sakep yang sasang grupu, nag̱aregsanan ta mupiang magpasakep tung pistang magpakisadu tung nag̱isag̱ud tung patrun yang grupu na. Kung indi magpasakep, paliwag̱an da ta duru. Purisu ang kaisan may mga tumatalig duun ang nampauyun da ilem ang nagpasakep ang yang nag̱itulduk yang baw̱ay ang atii, yay nag̱apatielan nira ta katadlengan nira. Pagkatapus asan da ka tung pista nga bag̱asay nira yang maktel ang tuksung magpakituu tung belag̱an Dios ang nunut da ka ta pagpakidalan nira tung maskin tinu pang baw̱ayay asan.. 21 Tung bag̱ay, pinakdulanu ra ta lugar nang manligna, piru indi ka enged malelyag ang mamutwan tung pagturuldukun nang atia. 22 Iugtulu tung numyu, masapuan na ra ilem, pinadalpetanu ra ta laru nang matigbak. Pati yang mga katabyang nang pamagtulduk da ka ta pariu ka tung nag̱itulduk na, ya ka, damayenu ra kang padalpetan kung indi ra mamanligna tung mga ubra-ubra nirang atiang uyun tung nag̱itulduk na. 23 Asta yang kadaklan ang pamag̱usuy ra tung nag̱itulduk nang atia, supukunu ra ilem. Duun da ngaintindiay yang tanan ang mga tumatalig ang kada sam pundaan ang yuuy pagbilid tung mga kinaisipan nirang tanan kung unu pa enged ay pag̱asikad nira. Purisu sasa may sasa tung numyu, kumpurming unu pay mga buat-buat mi ya ra kay paatuanu ta iblesu tung numyu.
24-25 Piru ta yamung kadaklan asan tung Tiatira, nag̱askeanu ang indiamu ra nagpasanyug tung nag̱itulduk yang baw̱ay ang atia. Indiamu ra ka nagpakled tung pag̱aningen yang duma ang mga sikritung adaralem ang ya unu ay nag̱ipabunayag yang Dios tung nira buat ang pagkatapus anday dumang pagpabunayag tung nira, kung indi, ya ra ti Satanas mismu‡2:24-25 Yang katadlengan yang mga taung atii maning taa: kung pasubuan da unu nira yang mga ubra-ubrang makiklep, asan da unu magdulang yang pagkamataku nirang mas pa.! Purisu ya ra ilem taa yang nag̱aingaluku tung numyu. Kung unu pay nag̱abuat ming nag̱auyunanu ya ray prusigiran mi ta ustu ang asta maglekataw ra. 26-28 Kumpurming tinu pay indi magpadeeg tung akles ni Satanas ang pagkatapus yang nag̱ipatumanu tung anya yay nag̱apadanayan nang asta tapusun da yang Dios yang kaliw̱utan ang naa, yay pakdulanu ta katengdanan nang maggaraemen tung duma-rumang mga nasyun ang katulad ka tung ipinakdul ni Ama tung yeen ug̱ud kasiraanami ra kang maggaraemen tung nira. Durug kaigpit yang paggaraemen yamen tung mga taung atia ay tanira ipabtang da ilem yamen ang midyu tung mga urun ang panemek-temeken da ilem§2:26-28 Mga Karantaen 2:8-9. Dispuis, partianu ra ka yang kadengeg̱anu ang kung telengan maning pa tung Kalamrag̱anen ang madeet yang bananag na.
29 Kapurisu kung nainu pay pamamati, kaministiran intindien nira ta mupia kung unu pay nag̱ianing yang Espiritu Santo tung mga tumatalig ang pamagsaragpun-sagpun ang kada sam pundaan.
 
Ya ra ilem tia ay maaningu tung numyu.’ ”

*2:4 2:4 Simpri pati yang paggeregmaan nirang magpurutul damay ra kang nanrusaw.

†2:6 2:6 Yang nag̱apapaktelan ni Nicolaus, maskin tumatalig unu, anday bali ang magpapsaw tung tanan ang kalelyag̱an na.

‡2:7 2:7 Yang pananglit ang atia pinisik ni Juan tung Genesis 2:9; 3:22, 24 ig inulit na ka tung 22:2, 14.

§2:13 2:13 “lansangan ang atia ang yang kadaklan ang mga masigkabanwa mi nag̱akemkem ta mupia ni Satanas.” Tung bitalang Giniriego “lansangan ang pagkarungan ni Satanas ang paggaem.” Nag̱aguuyan ni Juan ta maning tia ay natetenged yang lansangan ang atii yay pinakasintru yang pagturuuen yang mga tau tung bultu ni Adi Caesar tung uras ang atii.

*2:14 2:14 2:20; Mga Bilang 22:1-5; 25:1-2; 31:16; Judas 11

†2:15 2:15 Yang mga taung atii durung pagtag̱am nira ta sunlug tung mga tumatalig ang basi pa ra ilem maguyuran da nirang mamagtuu ka tung bultu ni Adi Caesar ang nunut da ka ta pagsag̱ud tung bultung atii ang duun da natenakan yang paggeregmaen nirang bug̱us pa rin tung ni Ginuung Jesus.

‡2:17 2:17a ‘manang itinaluk’ Atiing tukaw ang atiing alang-alang da yang pagkabetang yang mga Israel duun tung banwang kapas, inildawan yang Dios ang pinakdulan ta sasang pamangan ang ginuuyan nirang ‘mana’. Pagkatapus atiing anda ray kaministiran nira, nagkalalangan da yang Dios ang yang sa nga mangkukan yang mana ipabtang da nira tung sasang baul ang ya ray ipabtang nira tung pagtuuan nira tung anya duun tung kuartung pinakasagradu (Exodo 16:33-34). Pagkatapus tung kauri-urian da, yang pagtuuan nirang atii tung Dios diniadu yang mga kuntrariu nira. Pagkatapus tung kauri-urian da, may ibinalita yang mga pamagpakigmaepet ang yang mangkuk unung atii, ingkelan da unu ni Jeremias ang itinaluk tung sasang leyang duun tung bukid ang atiing pag̱aningen ang Sinai. Dispuis, kung magkaw̱ut da unu yang pag̱aningen ang Cristong pinilik yang Dios ang maggaraemen, yang mana unung atii, ya si unu ay ipapaan yang Dios tung mga tau. Purisu kung pasadsaran ta yang linegdangan yang inaning ni Ginuung Jesus ang naa natetenged tung pag̱aningen ang mana ang atiing itinaluk, ya ra yang tanan ang kaayenan ig kasadyaan ang nag̱ibaratu na tung mga tauan na duun tung baklung kaliw̱utan.

§2:17 2:17b Yang ipinagsakuy ni Ginuung Jesus tung batung atia ay nag̱askean na ang yang kadaklan ang mga tau duun, pamag̱ekel-ekel ta mga panangga ang yang duma mga batu kang pariu ka tung sinambit na. Yang ilyag nang ianing ang anda rang pisan ay kaministiran yang mga tumatalig tung mga pananggang atiang dati gated tanya mismung pagpalandungan nira yay magsirbing pangultimung panangga nira.

*2:20 2:20a Ti Jezebel ang atiang nasambit, yay kasawa ni Adi Ahab atiing tukaw duun tung banwang Israel. Ya kay nangguyud tung mga Israel ang para papaglaket-laketen da ilem nira yang pagturuuen nira tung ni Yawi may yang pagturuuen nira tung ni Baal. Kung gustu tang pasadsaran, duun ta nga basaay tung 1 Mga Adi 16:31-33; 18:4, 13; 19:1-2; 21:25.

†2:20 2:20b Atii kanay duun tung Tiatira, may mga grupu yang mga manig̱ubra ang kada sang klasing pag̱urubraen. Kaministiran ang yang tanan ang mga lalii, luw̱us mamagpasakep tung grupu na kung unu pang ubraay. Kung indi magpasakep, asan da nga plekay ta ipagpangabui na. Dispuis kada grupu may nira-nirang ginuu-ginuung pag̱atuuan nira bilang patrun nira ang pagpistaan nira. Ubligadu yang tanan ang kinasakpan yang kada grupung mamagpasakep tung pista. Kapurisu kung may sasang tumatalig ang sakep yang sasang grupu, nag̱aregsanan ta mupiang magpasakep tung pistang magpakisadu tung nag̱isag̱ud tung patrun yang grupu na. Kung indi magpasakep, paliwag̱an da ta duru. Purisu ang kaisan may mga tumatalig duun ang nampauyun da ilem ang nagpasakep ang yang nag̱itulduk yang baw̱ay ang atii, yay nag̱apatielan nira ta katadlengan nira. Pagkatapus asan da ka tung pista nga bag̱asay nira yang maktel ang tuksung magpakituu tung belag̱an Dios ang nunut da ka ta pagpakidalan nira tung maskin tinu pang baw̱ayay asan.

‡2:24-25 2:24-25 Yang katadlengan yang mga taung atii maning taa: kung pasubuan da unu nira yang mga ubra-ubrang makiklep, asan da unu magdulang yang pagkamataku nirang mas pa.

§2:26-28 2:26-28 Mga Karantaen 2:8-9

© 2008 WBT