11
Natetenged Tung Durua NGa Tauan Ang Pamangerengan Tung Dios Ang Pamagpaingmatuud Tung Mga Tau (11:1-14)
1 Taa numanyan, may sasang panukat ang maninga bastun ang ipinakdul tung yeen ang para ipanukatu. Pagkatapus dayunaw rang tinuw̱ul yang Dios ang inaning, “Ala, magpanawa ra. Sukaten mu ra yang pagtuuan tung yeen ang pinakalusu pati yang midyu lamisaan ang pagparataw̱ukan ta paamut duun. Bilangen mu ra ka yang kinadakel yang mga taung pamagtuu tung yeen duun. 2 Piru yang palayas na, indi mu ra iugpu ang sukaten. Kipurki tia, itinug̱utu ra tung mga taung anday pag̱intindi nira tung yeen. Asta yang siudad ang Jerusalem ang yay pag̱aningen ang sagradu, itinug̱utu ra ka tung nirang gaeman tung seled epat ang puluk may duruang bulan (42)*11:2 Yang lumirung atiang 42, ya ray ipinananglit ni Juan tung uras ang kaw̱utun ang yang mga tumatalig deeg-deeg̱an da ta mupia. Duun ngaeklay na tung sasang ipinaula yang Dios tung ni Daniel atiing tukaw natetenged tung malambeg̱an yang mga tauan na tung uri (Daniel 7:25-27). Ikumpalar ka tung Lucas 21:24.. 3 Dispuis may durua nga tauan ang mamagpaingmatuud tung mga tau ang pakdulanu ta katengdanan nirang magpalatay yang bitalaw tung seled san liw̱u may duruang gatus may enem ang puluk ang kaldaw (1,260)†11:3a Pariu ka ilem ta kantidad yang epat ang puluk may duruang bulan (42) ang sinambit tung 11:2.. Yang suut nira, aw̱el ang magig̱ilek‡11:3b Yang suut nirang atia pariu tung sinuut yang mga manigpalatay atiing tukaw ig yay pagpailala tung kapupungawen nirang pamanganugun tung mga taung pampakaw̱utan nira.,” ag̱aaning yang Dios tung yeen.
4 Naa pala yang duruang atia, mamanulad tung durua nga tauan atiing tukaw ang ipinananglit ni Zacarias tung duruang kapungul yang ayung pag̱aningen ang olibo may durua kang parabdungan ta kaas ang yag bebtang tung katalungaan yang Dios ang yay Makagag̱aem tung bilug ang kaliw̱utan§11:4 Yang pisan ay isinulat ni Zacarias atiing tukaw tung 4:1-14 natetenged ka man tung durua nga tauan ang paktelen yang Dios ta mupiang mamagdipindir tung nasyun nirang Israel tung timpung atii.. 5 May apuy ang lumua tung nganga nira ang ya ray ikalain yang kumpurming magkuntra tung nira. Purisu kung tinu pay malelyag ang manigbak tung duruang atia, maning tia yang dapat ang mapatayan nira. 6 Dispuis yang duruang atia, pakdulan yang Dios ta kagaeman nirang magsuspindi tung kuran ug̱ud indi kumuran mintras pamagparakaw̱utun pa tanira yang bitala yang Dios*11:6a Pariu tung kagaeman ang ipinakdul yang Dios tung ni Elias tiing tukaw ang yay napabtang tung Primirung Mga Adi 17:1 may 18:43-45 ig sinambit ka tung Lucas 4:25 may Santiago 5:17.. Yang pangyadwang kagaeman ang ipakdul na tung nira, yang mga wai puiding imuen nirang dug̱u. Yang pangyaklung kagaeman, maskin unu pang sarutay, puiding ipadalpet nira tung kaliw̱utan tung maskin unu pang urasay ang malelyag̱an nira†11:6b Pariu tung kagaeman ang ipinakdul yang Dios tung ni Moises atiing tukaw ang yay napabtang tung Exodo 7:14-25..
7 Kung matapus da nganing tanira ta pagpaingmatuud nira tung mga tau, may sasang ayep‡11:7 Yay ipinananglit ni Juan tung gubirnu yang mga Romanen ang yay pinakamaiseg tung panimpung atiing ipinagsulat ni Juan. Belag̱an ilem tung gubirnu nira ipananglitay na, kung indi, tung mga panimpung magdarasun, yang kumpurming mga gubirnung magsug̱ut tung ug̱ali yang mga Romanen, maning ka tung sasang ayep ang durug iseg. Tung uri ta kaldaw ya ray mamagpakigbatuk ta mupia tung Dios may tung ni Ginuung Jesu-Cristo asta mga tumatalig. Yang pag̱aningen ang ayep ang atia, muya-muyang nainambit ni Juan (33 bisis). Purisu impurtanting tandaan ta ang para maintindian ta yang palaksu yang gustu ni Juan ang ianing. ang duun maglua tung bulalut ang atiing pinakaadalem ang yay magpakigkuntra ta maayen tung durua nga tauan ang atia ang asta deeg̱en nang pangimatayen. 8 Yang mga tinanguni nira asan da ilem aglalakday tung karsada yang siudad ang dakulu ang puiding ipananglit tung siudad yang Sodoma ubin yang banwang Egipto ubin yang siudad ang pinaglansangan tung ni Ginuu nira§11:8 Yang siudad ang atiang dakulu ang sinambit ni Juan, ya ray ipinananglit na tung sasang gubirnu ang durug kalain yang mga buat-buat na. Tung primiru ikinumpalar na tung Sodoma ang yay sasang banwa ang bantug ang durung pisan agkalalaway yang mga pag̱urubraen yang mga sakep na (Genesis 19:1-13). Pagkatapus ikinumpalar na ka tung banwang Egipto ang yang gubirnu duun durug kadeeg-deeg tung mga tauan yang Dios ang mga Israel atiing tukaw (Exodo mag̱impisa tung Kapitulu 1 asta Kapitulu 15). Pagkatapus ikinumpalar na ka tung siudad ang Jerusalem ay yang mga tau na durug kateteg̱as yang pagpakigkuntra nira tung ni Jesu-Cristo ang asta ipinalansang da ilem nira tung krus (Mateo 23:37-39).. 9 Pagkatapus tung seled tulung kaldaw may tenga yang mga tinanguni nira nag̱apaniiran da ta maskin unu pang nasyunay ta mga tau ang tag̱a maskin ay pang banwaay ang sari-sari ka yang mga bitala nira. Indi ra nganing mamagtug̱ut ang ipalg̱ud pa tung leyang. 10 Natetenged tung kamatayen yang duruang atia, pamanadyaan da ta duru yang mga taung pamagtinir tung bilug ang kaliw̱utan ang kumpurming pagpaguyud tung sistima nang kuntrang pisan tung Dios. Ya ra nganing ay silibraen nirang magparakdul-pakdulan ta mga rigalu. Ay ya pa ag̱ari, tanira durung pinitinsia ang nagmaan nira natetenged tung duruang atiang mga manigpadapat yang bitala yang Dios. 11 Kung mataklib da nganing yang tulung kaldaw ang atia may tenga, pamuien si kang uman yang Dios. Diritsyung mamagbungkaras. Kung maita si nganing yang mga tau, pamalayan da ta eled nirang duru. 12 Pagkatapus yang duruang atia, may magngel da nirang busis ang dakulu ang liit tung langit ang magbitala tung nirang mag̱aning, “Taniamu ra tung abwat!” Pagkatapus may panganud ang mag̱ekel tung nira tung langit ang ya kag dawalay yang mga kuntrariu nira. 13 Tung uras ang atia, mayegyeg da yang kaliw̱utan ta maktel. Tung sam puluk ang parti yang mga kabalayan tung siudad, sam parti yang magkaragew̱a. May magkaradamay kang pitung liw̱u nga tauan ang magkarapatay tung yegyeg ang atia. Yang kadaklan ang mga taung magkaralibri, pamalayan da ta eled nirang duru. Purisu dayun dang mamanligna tung mga kasalanan nira ang nunut da ka ta pagdarayawen nira tung Dios ang pagtinir tung langit.
14 Kapurisu tung maning tiang mainabu, mataklib da yang yadwang pinanganugunan yang kanug*11:14 8:13. Piru kuidaw, yang pangyaklu makali ra ilem ang magkakaw̱ut.
Pag̱eyep Da Yang Pangyapitung Angil Yang Budyung Na (11:15-19)
15 Taa numanyan yang pangyapitung angil, ya si ay nag̱eyep yang budyung na. Pagkatapus may mga busis duun tung langit ang durug katutunul ang namagbitala ang mag̱aning,
“Talagang kaw̱utun da ka enged yang uras ang anda ray dumang may gaem tung bilug ang kaliw̱utan, kung indi, ya ra yang Dios mismung pangag̱alenan ta durua yang pag̱aningen ang Cristong pinilik nang magpapanaw tung paggaraemen nang baklu. Yay mamaggaraemen ang asta tung sampang anda enged ang pisan ay katapus-tapusan na,” mag̱aning.
16 Pagkatapus naang duruang puluk may epat nga mamaepetan ang kumarungan tung mga kakarungan nira tung katalungaan yang Dios, kung magngel da nganing nira yang bitalang atia, ya ra mamagparagpa ang mamagtuu tung anya. 17 Mag̱aning tanira,
“Pagpasalamatami tung nuyung yaway Dios ang makagag̱aem tung tanan ig disti pa tung katebtew̱an, asana ra kang lag̱i ang asta ra ilem simanyan. Yang nag̱apasalamatan enged yamen tung nuyu ta dakulung pagpasalamat ang yang kagaeman mung durug kapuirsa ya ra ka enged ay ipalua mung maggaraemen ang katulad ka tung pinangakuan mu.
18 Yang mga tag̱a duma-rumang nasyun ang indi kang lag̱ing pamananged tung nuyu, maskin pangasilag da ta duru tung nuyu may tung mga tauan mu, paunu pa ilem tanira kung uras dang paitaan mu ra nganing yang kasisilag̱en mu? Ay ya ray uras ang ipagpamui mu si kang uman tung mga taung nagkarapatay ra ang para insapuan mu tanira sasa may sasa.
Ya ra kay uras ang yang mga turuw̱ulun mung pinanalig̱an mung magpalatay yang bitala mu ya ray pamakdulan mu ta maning pa tung primyung pag̱ipakdul tung sasang nandeeg tung karira. Pati yang kadaklan ang binuat mu ra kang mga tauan mung sadili, bilang yang kumpurming naggalang ta ustu tung nuyung nag̱usuy tung nag̱auyunan mu, ya ka, ya ra kay pamakdulan mu. Maskin aranek ta pagkabetang maskin abwat, parariu ka ilem ang pamakdulan mu.
Ya ra kay uras ang ipagsintinsia mu tung kalainan ang anday katapus-tapusan na yang kumpurming nagpaligna tung sistima yang mga tau tung maskin ay pang banwaay tung bilug ang kaliw̱utan ang asta namanlipat da tung nuyung namagtuu tung ipinakli nira tung nuyu,” mag̱aning duun yang mga mamaepet.
19 Numanyan diritsyu rang nabukaan yang pagtuuan tung Dios duun tung langit†11:19a Kung natetenged tung pagtuuan tung Dios duun tung langit, matinlung balikan ta yang pasanag tung 6:9.. Purisu bistu ra duun yang baul ang sasang pinananglitan yang dating ipinagpakigpaig̱u na‡11:19b Ipinabistu ra nganing yang Dios ay ug̱ud duun da nga paktelay na yang isip yang mga tauan na bilang mga tumatalig tung ni Ginuung Jesus ang talagang kegngan na ka enged agyapun yang tanan ang pinangakuan na tung nira.. Pagkatapus, diritsyu rang nag̱intra kidlat may duldul ang paglelpaken ang nunut da ka ta yegyeg yang kaliw̱utan ig may mga yilung darakulu ang mabiw̱ilug ang nagkarabungsad da tung katanekan.

*11:2 11:2 Yang lumirung atiang 42, ya ray ipinananglit ni Juan tung uras ang kaw̱utun ang yang mga tumatalig deeg-deeg̱an da ta mupia. Duun ngaeklay na tung sasang ipinaula yang Dios tung ni Daniel atiing tukaw natetenged tung malambeg̱an yang mga tauan na tung uri (Daniel 7:25-27). Ikumpalar ka tung Lucas 21:24.

†11:3 11:3a Pariu ka ilem ta kantidad yang epat ang puluk may duruang bulan (42) ang sinambit tung 11:2.

‡11:3 11:3b Yang suut nirang atia pariu tung sinuut yang mga manigpalatay atiing tukaw ig yay pagpailala tung kapupungawen nirang pamanganugun tung mga taung pampakaw̱utan nira.

§11:4 11:4 Yang pisan ay isinulat ni Zacarias atiing tukaw tung 4:1-14 natetenged ka man tung durua nga tauan ang paktelen yang Dios ta mupiang mamagdipindir tung nasyun nirang Israel tung timpung atii.

*11:6 11:6a Pariu tung kagaeman ang ipinakdul yang Dios tung ni Elias tiing tukaw ang yay napabtang tung Primirung Mga Adi 17:1 may 18:43-45 ig sinambit ka tung Lucas 4:25 may Santiago 5:17.

†11:6 11:6b Pariu tung kagaeman ang ipinakdul yang Dios tung ni Moises atiing tukaw ang yay napabtang tung Exodo 7:14-25.

‡11:7 11:7 Yay ipinananglit ni Juan tung gubirnu yang mga Romanen ang yay pinakamaiseg tung panimpung atiing ipinagsulat ni Juan. Belag̱an ilem tung gubirnu nira ipananglitay na, kung indi, tung mga panimpung magdarasun, yang kumpurming mga gubirnung magsug̱ut tung ug̱ali yang mga Romanen, maning ka tung sasang ayep ang durug iseg. Tung uri ta kaldaw ya ray mamagpakigbatuk ta mupia tung Dios may tung ni Ginuung Jesu-Cristo asta mga tumatalig. Yang pag̱aningen ang ayep ang atia, muya-muyang nainambit ni Juan (33 bisis). Purisu impurtanting tandaan ta ang para maintindian ta yang palaksu yang gustu ni Juan ang ianing.

§11:8 11:8 Yang siudad ang atiang dakulu ang sinambit ni Juan, ya ray ipinananglit na tung sasang gubirnu ang durug kalain yang mga buat-buat na. Tung primiru ikinumpalar na tung Sodoma ang yay sasang banwa ang bantug ang durung pisan agkalalaway yang mga pag̱urubraen yang mga sakep na (Genesis 19:1-13). Pagkatapus ikinumpalar na ka tung banwang Egipto ang yang gubirnu duun durug kadeeg-deeg tung mga tauan yang Dios ang mga Israel atiing tukaw (Exodo mag̱impisa tung Kapitulu 1 asta Kapitulu 15). Pagkatapus ikinumpalar na ka tung siudad ang Jerusalem ay yang mga tau na durug kateteg̱as yang pagpakigkuntra nira tung ni Jesu-Cristo ang asta ipinalansang da ilem nira tung krus (Mateo 23:37-39).

*11:14 11:14 8:13

†11:19 11:19a Kung natetenged tung pagtuuan tung Dios duun tung langit, matinlung balikan ta yang pasanag tung 6:9.

‡11:19 11:19b Ipinabistu ra nganing yang Dios ay ug̱ud duun da nga paktelay na yang isip yang mga tauan na bilang mga tumatalig tung ni Ginuung Jesus ang talagang kegngan na ka enged agyapun yang tanan ang pinangakuan na tung nira.

© 2008 WBT