1 Kapurisu yawang maskin tinua pang tauay ang kumpurming pagpakusalak tung belag̱an mga Judio natetenged ka man tung mga ubra-ubra nirang mga maning tiang nag̱asambitu, kung kaw̱utun da nganing yang uras ang ipagsintinsia yang Dios tung mga tau, pati yawa, india ra ka pasapayan na. Ay kipurki kung ay pa atiing nag̱ipakusalak mu tung nira, duun da ka nga pakusalakay mu yang sadili mu, natetenged yang dumang mga ubra-ubra nira ya ka man mismu ay nag̱abuat mu. 2 Nag̱akdekan ta ka ang kung sintinsiaan da nganing yang Dios tung kalainan yang belag̱an mga Judiong atiang kumpurming pagbuat yang mga maning tiang bag̱ay, talagang magkatamang pisan yang parusang ipadangat na tung nira. 3 Ayw̱a, yawang pagpakusalak tung dumang pagbuat yang mga maning tia, ang pagkatapus ya kay nag̱abuat mu, tung kalaum mu mapalikayan mu pa yang sintinsia yang Dios? 4 Muya ya ra ilem agbaliwalaay mu yang kaneeman ang atiang nag̱ipaita na tung nuyung durug dakul ang india pa nag̱asintinsiaan na, ang indi, yawa ra ilem kanay ag̱agwantaay nang magparurusay. Ayw̱a, indi pa ka enged agsakpen yang isip mu ang yang nag̱ipagpaita na ta kaneeman nang atia tung nuyu ay gustu na ra rin ang basi pa ra ilem ang asana ra ngaeyangay ta ipanligna mu tung mga kasalanan mu? 5 Piru ay pa w̱a? Belag yawag panligna, yawag pagpakateg̱as ang pagpadayun ka enged tung pagpakasalak mu. Purisu yang kaalimbawaan na, maning pa tung nag̱ipagluug mu rang nag̱ipagluug yang parusang dumangat tung nuyu tung uras ang ipagpaita ka enged yang Dios yang kasisilag̱en na ang ya ra kay uras ang ipagpabistu na kung unu pay luluaan yang pagsirintinsiaen na tung mga tau ang yay magkatamang pisan. 6 Ay tung uras ang atia magbales da tung tanan ang mga tau ang kumpurming unu pay mag̱atu tung mga binuat-buatan nira sasa may sasa. 7 Kung kisira may mga taung pagprusigir ta maderep tung mga pagburuaten ang matitinlu natetenged yang pag̱asikad nira ang tung uri tanira padengeg̱an da ta maayen yang Dios ang pabanalen, yang ibles na tung nira, tugtan na rang magpasapen tung anyang asta tung sampa. 8 Piru tung mga taung ya ilem yang sadiling kalelyag̱an nira ay pag̱asikad nira ig anda enged ay gustu nirang mananged tung kamatuuran natetenged tung pagkadios yang Dios, kung indi, pagpadayun ka enged tung mga pag̱urubraen ang belag tama, yang ibles na tung nira, parusaan na ta malbat ang pagparusa. 9 Bilang magkatinir da ta pinitinsia nirang duru yang kumpurming pagbuat ang pirmi yang malalain, kapin da enged yang mga Judiong pinamakdulan na ka man ta dakulung pabur atiing tukaw*2:9 Kumus dakulung pabur ang ipinakdul na tung nirang mga Judiong tukaw ang tanira binuat nang mga tauan nang sadili, yang ilyag nang ianing mas pang may turuw̱alen nira tung anya kay tung duma-rumang nasyun ang indi pinakdulan na ta pabur ang maning tia. pati yang belag̱an mga Judio. 10 Piru kung kisira rin may mga taung pagbuat ang pirmi ta matinlu, yang ibles yang Dios tung nira ya ray padengeg̱an na ta maayen ang pakdulan ta kalimengan kapin da enged yang mga Judio pati yang belag̱an mga Judio. 11 Talagang maning tia yang pagbaralesen yang Dios tung mga tau gated belag̱an ang mag̱aning ang yang pagkabetang yang sasang tau yay intindien nang magbales, kung indi, sulaminti ilem yang mga ubra-ubra na†2:11 Indiita ilem maglaum ang yag baliskaray ni Pablo yang pirming nag̱apabilug̱an na tung tanan ang isinulat na pati tung isinulat nang naa ang yang ipagtapnay yang Dios tung sasang tau belag̱an natetenged tung mga ubra-ubra nang matitinlu, kung indi, sulaminti ilem tung pagtalig na yang sadili na tung ni Jesu-Cristong magpatapnay. Yang pinabilug̱an ni Pablo taa tung 2:6-11 teed ilem tung pitik ang usuyun yang Dios ang magsintinsia tung mga tau ang yang intindien na sulaminti ilem yang mga ubra-ubra nira. Purisu sinambit na kung tinu pay pagprusigir ta maderep tung pag̱urubraen ang matinlu, bilang timlat ang pisan yang tanan ang mga ubra-ubra na, ya ray risibien nang magpasapen tung anyang asta tung sampa. Kasu ilem andang pisan ay taung masarang asan. Kung may masarang din, tay maning da rin tia yang ipakdul yang Dios tung anya..

12 Kipurki, telengan mi ra ilem yang belag̱an mga Judio. Kumus belag̱an suitu yang mga katuw̱ulan ang atiing ipinagpiar yang Dios tung ni Moises, tanirang tanan ang pamaglampas tung kalelyag̱an na, mangablag da tung anya ang asta tung sampa. Ya ray malambeg̱an nira, maskin indi na ra buaten ang pitik yang mga katuw̱ulan ang atia ang para yay pagpasunairan na rin tung nira kung tinuman da nira u kung indi. Pati yang mga masigkanasyunung mga Judio, kumus suitu tanira yang mga katuw̱ulan ang atia, purisu tanira kang tanan ang kumpurming paglampas, sintinsiaan da ka yang Dios tung kalainan ang yang mga katuw̱ulan ang atia yay pitik ang pagpasunairan na tung nira kung tinuman da nira u kung indi. 13 Talagang sintinsiaan na ka tanira ay kipurki belag̱an ang mag̱aning ang yang mga taung pamati ilem tung mga katuw̱ulan ang atiang magbasaen tung nira ang asan da mag̱ing salu ra tung pagterelengen na, kung indi, sulaminti ilem yang mga taung pirming pagsepet yang tanan ang mga katuw̱ulan ang atia ya ra rin ay usgaran nang salu ra tung pagterelengen na. 14 Kipurki telengan mi ra ilem naang belag̱an mga Judio. Maskin anda ka man ay kaliw̱utan nira tung mga katuw̱ulan ang atia, piru kada matuman nira yang sasang linyang sinambit tung mga katuw̱ulan ang atia, duun da nga pruibaay ang may duun kang lag̱i tung mga isip nira kung unu pay magkatama kag belag, maskin indi ka man nag̱aintindian nira yang mga katuw̱ulan ang atia. 15 Ya ray pagpailala ang yang nag̱ipatuman yang Dios ang nag̱asambit tung mga katuw̱ulan, maning pa tung namarka rang lag̱i tung mga kinaisipan nira. Nag̱apruibaan dang matuud tia, ay tung laksu yang mga pag̱irisipen nirang sasa may sasa, kung kaisan mismu yang sadiling painu-inu nira yay pagbasul tung nira natetenged tung mga ubra-ubra nira, ig kung magkaisan, pagdipindir ka ngani. 16 Maning ang pisan tia yang mainabu tung uras ang ipagpatuw̱al yang Dios tung mga tau natetenged tung tanan ang nagkarabuat nira pati nagkaraisip nira maskin taluk pa simanyan. Italig na yang pagsirintinsiaen ang atia tung ni Jesu-Cristo. Yang tanan ang atiang nag̱ipag̱aningu lug̱ud tung Matinlung Balitang naang nag̱ipagpakaw̱utu tung mga tau.

17 Simanyan kung natetenged tung numyung mga masigkanasyunung mga Judio, pagpadayawamung talagang mga Judioamu ka man ang pulutiku. Durug dakul yang pagtalig mi ang indiamu ra sakpen yang sintinsia yang Dios gated yamuy pinakdulan na yang mga katuw̱ulan na. Nag̱ipagpabug̱al mi nganing ang yamu ilem ay ultimung mga tauan na. 18 Dispuis nag̱akdekan mi ra ka kung unu pay nag̱alelyag̱an na ang yay buaten mi, ig kumus ya ray nabadbaran yang mga isip mi yang napabtang tung mga katuw̱ulan na, nag̱askeamu ra kang magtimbang-timbang tung mga isip mi kung unu pay magkatamang buaten mi. 19 Yadwa pa, pagtalig̱amu ka ang matakuamu rang manuldukan tung mga taung tag̱a duma-rumang nasyun ang anda pay naerem nirang masyadu natetenged tung Dios. Bilang yamu ray nabtang ang mga manigpasanag tung nirang makiklep pa yang mga pag̱irisipen nira. 20 Maktel da ka yang mga isip ming pagpanadleng tung nirang pag̱atelengan ming indi pa nag̱akdek yang maayen may yang malain, maskeamu ra kang magpanugpat-sugpat tung nirang midyu tung may pagkamula pa yang pag̱irintindien nira tung kamatuuran natetenged tung pagkadios yang Dios. Tutal asan da ka tung mga katuw̱ulan ang atia nga bilug̱ay mi yang kamatuuran kung unu pay tamang pag̱irintindien tung Dios. 21 Panuldukanamu ka man tung duma, piru ayw̱a yang mga sadili mi indi mi ka pala nag̱atuldukan? Pagparakaw̱utunamu ka nganing tung mga tau ang tanira dapat ang indi manakaw, ang pagkatapus yamu panakaw ka. 22 Panganingen mi ka tanira ang dapat indi maglimbung tung mga kasawa nira ang pagkatapus yamu paglimbung ka. Aglalawayanamu ka ta duru tung mga bultung nag̱atutuuan ta duma, ang pagkatapus, anday dumang pag̱abuat mi, yang mga simbaan ang pagtuuan tung nira, ya pay nag̱apakleran ming nag̱apanakawan ang para mapakinaw̱angan mi yang mga mamaalen ang atiang pinamuat ang mga bultu. 23 Pagpabug̱alamu ang yamu ray pinakdulan yang Dios yang mga katuw̱ulan na, ang pagkatapus, asan da ka tung paglalampasen mi nga regmekay mi yang kadengeg̱an na. 24 Ayw̱a indiamu aningenu sipurki may sasang napabtang tung kasulatan ang nag̱atemeng dang pisan tung numyu ang mag̱aning,

25 Kung tung bag̱ay, yamung mga masigkanasyunung mga Judio, pinabuatanamu ta tanda tung mga tinanguni mi ang para maintindian dang lug̱uramu ra ka tung mga tauan yang Dios. May kantidad na tia basta pagtumanamu yang mga katuw̱ulan ang ipinagpasulat yang Dios tung ni Moises. Piru kung paglampasamu, katimbang nang indiamu ra pinabuatan ta tanda.

26 Ig disir kung pausuyanu tia, kung yang mga taung indi ra pinabuatan ta tanda nag̱apagtuman da yang magkatama ang katulad ka tung napabtang tung mga katuw̱ulan, belag bang yay bilangen yang Dios ang kuari binuatan da ta tanda? 27 Dispuis yang sasang taung dati ra kang lag̱i anday tanda tung tinanguni na piru pagtuman yang nag̱adapatan yang mga katuw̱ulan yang Dios, ya ray buaten yang Dios ang sasang mulidung pagpasunairan nang magsintinsia tung numyung mga Judio maskin pag̱epetamu tung kasulatan ang asan agbebtang yang mga katuw̱ulan, maskin binuatanamu pa ta tanda tung mga tinanguni mi. 28 Tutal tinu pa w̱asu ay ultimung Judio tung pagterelengen yang Dios? Belag̱an yang sasang taung may tandang binuat tung tinanguni na. 29 Kung indi, yang kumpurming binaklu yang kinaisipan nang taluk yay ultimung Judio. Yang natengeran yang pagbaklu na, belag̱an yang pagtuman na yang sasang urdinansa, kung indi, suluminti ilem natetenged tung inubra yang Espiritu Santo tung isip na. Yang sasang Judiong nagkamaninganan da ta maning tia, maskin indi dayawen yang mga kaarumanan na, dayawen ka enged yang Dios.