Qapiya wei
Xuk wei Sinaleyeiw
o
Qayeeng wei la tax o
Qapiya tiwei Xuk wei xel Sinale eno byex wou qayeeng wei Xoulek Nimza wei Lukas byex o. Lukas venaxow byex qapiya tine is. Eivek qapiya tine eno xey a xei Laweeng Vambuing talex sakwaing wou xel sinale me xel neil Yesu xe Xoulek Nimza nanghei "Yerusalem me Yudia me Samaria me e la teyei lek tembuing sapa" (wei 1.8).
Qapiya wei Sinale eno tul pavulek en xel (sios) wei Yesu eno qandi senghoing eivek xel Yuda, dekakom la wo ngandoung me la eivek tembuing danghei danghei nei is. Lukas embei talex is ambei nyon, xuk wei Yesu me mapieing wei xomaxoneing wei mi betiwou e yo eno la teyei lek qayeeng zonghek wei Anutu neil wou Israelyeiw takwei yo.
Lul ngandoung ti qapiya wei Sinale eno neil, inye xuk wei Laweeng Vambuing o, inyon Anutu xe Laweeng Vambuing on. Myaxeeng eno Laweeng Vambuing lam wou Yesu xe xel betiyeing lek bouk wei Pentikos o. Dekakom Laweeng Vambuing pepyawexe woueing nalei wei xel o me wong nikanzek wou xel.
Eivek qapiya tine eno xey a xei qayeeng ding a ding ngenong wei xel sinale neil gyeik ingwei xel embei neil wou xel amba en Xoulek Nimza wei Yesu xe yo. De xey a xei bei xomaxoneing ngenong betiwou Xoulek Nimza ne me xel wei Yesu eno (sios) nale nikanzek.
Qapiya wei Sinale eno pavulek wei sinaleyeiw ngenong eno di yeip eivek, ekom qayeeng ngenong di yeip eivek en lulul wei Petele me Paulus wong o. Petele yon xel betiyeing ti wei mi la is Yesu yo. Ekom myaxeeng eno Paulus se mi betiwou Yesu. Ma. Moxo mi wo xuk nikanzek me wo nol wou xel wei Yesu yo (sios). Ekom Yesu taxe Paulus me wong e wong ambei xukxe tiwei myaxeeng wei emi bong e xe xuk o.
Eivek qapiya danghei valu eno Lukas embei tul pavulek en lul wei qandi wou Paulus o, moxo neil lulul wei ''xa'' mi wong o. Xel wei lupeyei eno ngenong wou naleind bei Lukas mi ghavineeng bouk valu is Paulus, om neil embei "xa" eivek danghei tine.
1
Yesu lek me la eivek tyoung gheyapu
1 Tiopilas,
Eivek a xe qapiya nge tax, a byex myaxeeng en lulul dalus wei Yesu wong a tax me teyoxe xel o 2 me elam tyip bouk wei Anutu qou e lek la tyoung gheyapu nei, me eivek Laweeng Vambuing eno neil wou sinaleyeiw wei e beyal en xuk leimalei wei xel a mi bong o. 3 Ka e qou nimaying woy eno moxo talex xow yeip yaing wou moux ti beimambei ne bei toundei mapieing. Moxo belup wou xel lumama teyei lek bouk mepyeiyuw (40) me luk wou xel en tete lalei wei Anutu xe yo. 4 Ka e nanghei toundei is xel, me ya is xel eno moxo peti xel, “Xam sim ghe na veil Yerusalem, qe xam a mi mendei inye me daxe lul xeilala wei Mang neil zonghek bei bong o. Wei xam ghe ngo ingwei a luk en o. 5 Yoan lipek moux alis vex en memiing, ekom bouk di lam paviy en ingwei tyek xam ghe zipek en Laweeng Vambuing o.”
6 Om gyeik xel sinale me Yesu qekuma, xel teling wou e, “Tambiy Ngandoung, gweimbeeng lek bouk tine eno tyek wang nox me na piyexe tete lalei wei Israel o no?”
7 Moxo neil wou xel: “Inye se yeip wou xam bei xam ghe boulek seivma o bouk wei Mang venaxow lax angya emaxow nikanzek o. 8 Ekom tyek xam a qou nimkanzek gyeik Laweeng Vambuing nam lek xam o, me vati wei xam ghe wei mamim wou woy eno tyek xam a neil a teyei eivek Yerusalem, me ena eivek Yudia dalus me distrik Samaria, me ena tyip wou tembuing myasepu nei.”
9 Ka Yesu neil qayeeng tine woy, Anutu qou e lek la gheyapu wou xel mendghalus de laxap sevun e om xel se yei e no.
10 Xel anghei di yei ingwei e la punei eivek tyoung gyeik e di la yo, lutika eno tambiy yuw byex teimb teleing me nale lip wou xel. 11 Luw neil wou xel, “Xam moux wei Galili yon, xam ghe toungale inye me ghe di domamim la wou tyoung en va? Yesu tiwei, Anutu qou veil xam me la eivek tyoung gheyapu nei, eno tyek noum me nam eivek sakwaing ambei kawei xam ghe wei e la eivek tyoung o.”
Xel beyal Matias bei e qou Yudas nimbeeng
12 Woyom xel betiyeing la veil lukendu wei xel mi taxe bei Oliv, me lox me la Yerusalem wei toundei paviy lukendu Oliv o, teyei lek ambei kilomita ti. 13 Gyeik xel la tyip, xel la gheyapu eivek xomek lalei wei xel embei mi mendei eivek o. Eti yeiw wei lam eno leind ambei nye, Petele, Yoan, Jems, me Andrias, Pilip me Tomas, Batolomiu me Matai, Alpias neu moux Jems me Simon wei Selot me Yudas on Jems neu moux. 14 Xel xouing dalus mi qekuma me toung laleind lekti de mi zeimemend taxombouk, xel vex lam is me Maria wei Yesu ta, me liyeiw moux is.
15 Eivek bouk tiyon Petele nale eivek xel wongeingis on senghoing (xel on teyei lek 120) 16 me neil, “Xam lingyeiw, xoulek wei yeip eivek qapiya ne eno embei bong neing lek ambei ingwei Laweeng Vambuing luk takwei nei eivek Dawit mya en Yudas tiwei talex sakwaing wou xel wei embei zeimaxoun Yesu yo. 17 Yudas on tambiy wei xey yo ti, me mi wo xuk is xey.”
18 (Yudas qou malew en sewokeing wei talex Yesu teyei yo, me moxo la xouv tembuing ti en inyon woy. Woyom moxo teibouyek lek tembuing me leis bambou tek de xeixay qapyex lam myayaing. 19 Xel dalus eivek Yerusalem eno ngo tine, om xel taxe tembuing tiyon lei eivek vyend bei Akeldama qes ambei nye bei Tembuing wei Gyand o.)
20 Petele neil, “En inye xel byex eivek qapiya lalo bei,
“ ‘Teyeimbei e beeng on mendei bandaing en xomaxoneing ti se mendei lek inyon,’ Qapiya Lalo 69:25
me,
“ ‘teyeimbei tambiy nge e qou e nimbeeng en xuk wei la tax en xel o.’ Qapiya Lalo 109:8
21 Om inyon nimza bei xey a beyal moux wei mi la me loum is xey bouk sapa gyeik Tambiy Ngandoung Yesu mi dei is xey yo, 22 lek bouk sapa wei Yoan lipek xel me elam tyip gyeik Yesu lek la gheyapu veil xey o. Om xey a beyal tambiy wei yeimawou woy eno nge en e neil Yesu xe qandieing lek teyei.”
23 Om xel beyal moux yayuw: Yosep wei xel mi taxe bei Balsabas (lei nye bei Jastus) me Matias. 24 Woyom xel zeimemend, “Tambiy Ngandoung, wang woulek xomaxoneing titi laleind. Talex wou xa bei luyuw ne nge na wang beyal, 25 bei e gyeiteyei xuk sinale, wei Yudas ghanaw me la wou e maxow xe sakwaing o.” 26 Woyom xel nex qakous dee, om qakous teila wou Matias, om moxo la is sinaleyeiw xoumeeng ti yon.