Xoulek Nimza wei
Matai
byex o
Qayeeng wei la tax o
Xoulek Nimza wei Matai byex ne eno la tax en qapiya vey wei tul pavulek en lulul wei qandi wou Yesu gyeik ingwei lam dei lek tembuing o. Qapiya tine tul pavulek atax en lulul wei qandi myaxeeng gyeik Maria wou Yesu yo, me tul pavulek la tyip ingwei xel leis Yesu mey o, me qandi lek veil meyeing o, de la veil e xe xel me lek me la tyoung gheyapu nei.
Lul ngandoung ti Matai embei talex, eno nambei nye, Yesu wong ela teyei lek lulul wei Anutu neil zonghek takwei me xel byex eivek qokatu wei takwei yo o (Olpela Testamen). Anutu neil zonghek bei tyek bong tambiy ti bei e nam a qou xel Israel noumenam, de qapiya tiyon embei talex bei Yesu e tambiy tiyon. Eivek qapiya danghei valu wei Matai, eno qayeeng talex bei lulul wei Yesu wong eno la teyei lek qayeeng wei Anutu xe xel poropet neil takwei yo. Wei 1:22-23 me 2:4-6 me 2:14-15 me 2:23 me 4:13-16 me 8:16-17 me 12:15-21 me 13:34-35 me 21:2-5 me 21.16 me 26.24 me 26.31 me 26.54 me 27:6-10.
Lul ngandoung nge eno qapiya wei Matai yo neil, inyon tete lalei wei tyoung gheyapu yo o tete lalei wei Anutu yo. En xuk wei Yesu eno Anutu embei bo king zonghek wei xomaxoneing dalusateiv o, de embei xomaxoneing na mi betiwou woueing nalei wei e yo.
Eivek qapiya danghei lim wei Matai, eno qayeeng ding a ding wei Yesu neil o. Tiwei tax eno di yeip eivek sapta 5-7 eno inyon xel qayeeng wei Yesu neil lek lukendu ti yo. Qayeeng tiyon talex xel xomaxoneing wei mindei nambei Anutu xe xel zonghek o. Qayeeng ding a ding nge wei yuw eno di yeip eivek sapta 10. Qayeeng tiyon Yesu wong wou xel betiyeing en lulul wei xel bong gyeik ingwei xel na neil Yesu xe xoulek wou xomaxoneing bamba yo.
Qayeeng ding a ding tiwei yal eno di yeip eivek sapta 13, Yesu neil qayeeng pakeing bei talex wou xel xomaxoneing en Anutu xe tete lalei. Qayeeng ding a ding tiwei vey eno di yeip eivek sapta 18, Yesu neil qayeeng wei xomaxoneing embei mendei nambei e xe betiyeing zonghek o. De qayeeng ding a ding tiwei lim eno di yeip eivek sapta 24-25, Yesu neil qayeeng wei lulul embei qandi lek gyeik bouk loxyus o.
Qapiya tiyon venaxow eno se neil teyei bei tambiy eti byex qapiya tiyon. Ekom qapiya tiyon qou lei bei Xoulek Nimza wei Matai byex o. Inyon nambei nye, xel wou naleind en Matai tiwei mi qou takis wei di yeip eivek sapta 9:9-13.
1
Yesu buyeiw leind
1 Yesu Kilisi buyeiw leind wei yeip eivek qapiya eno inye eivek velei wei Dawit o, de Dawit on eivek velei wei Apraham o.
2 Apraham on Isaka ma,
de Isaka yon Yakop ma,
de Yakop on Yuda ma me liyeiw is,
3 Yuda yon Peres aluw Sela mend, de luw tend lei Tamar,
de Peres on Hesron ma,
de Hesron on Ram ma,
4 Ram on Aminadap ma,
de Aminadap on Nason ma,
de Nason on Salmon ma,
5 Salmon on Boas ma de ta lei Rahap,
de Boas on Obet ma de ta lei Rut,
de Obet on Jesi ma,
6 de Jesi yon king Dawit ma.
De Dawit on Salomo ma, e tiwei ta Yuria venei yo,
7 Salomo yon Rehoboam ma,
de Rehoboam on Abiya ma,
de Abiya yon Asa ma,
8 Asa yon Jehosapat ma,
de Jehosapat on Jehoram ma,
de Jehoram on Usia ma,
9 Usia yon Jotam ma,
de Jotam on Ahas ma,
de Ahas on Hesekia ma.
10 Hesekia yon Manase ma,
de Manase yon Amon ma,
de Amon on Yosia ma.
11 De Yosia yon Jekonaia*1:11-12 Jekonaia, lei nge bei Jehoiakin. ma me moxo lis liyeiw mindei gyeik xel Babilon lam wo vevek me zeimaxoun xel Israel de qou xel me la Babilon.
12 Ka xel la Babilon:
Woyom Jekonaia yon Seatiel ma,
de Seatiel on Serubabel ma.
13 De Serubabel on Abiut ma,
de Abiut on Eliakim ma,
de Eliakim on Aso ma.
14 De Aso yon Sadok ma,
de Sadok on Akim ma,
de Akim on Eliut ma,
15 de Eliut on Eliesa ma,
de Eliesa yon Matan ma,
de Matan on Yakop ma.
16 De Yakop on Yosep ma, de Yosep on Maria leya, Maria wei qou Yesu wei xel mi taxe bei Kilisi yo, moux on Anutu beyal bei e qou moux alis vex wei e yo noum.
17 Inyon nambei 14 neumambu wei Apraham me ela Dawit o, de 14 neumambu nanghei Dawit me ela tyip ingwei xel la xeitueing anghei Babilon o, deka xel la xeitueing anghei Babilon eno 14 neumambu me ela tyip wou bouk wei Yesu Kilisi†1:17 Qes wei lei Kilisi eno nambei nye: tambiy wei xel taw wel lek e lu. Ekom eivek kwa wei Yudayeiw takwei eno xel mi taw wel lek moux nambei dee wei Anutu beyal bei em bale me natax en e xe xomaxoneing. Natax en ingwei Yesu lam o xel ngenong di axe e en xel embei gyei lek mend nanghei inye me nanghei inyei en xel wou naleind bei tambiy vako ti tyek nam devind xel veil nimaying. Xel taxe tambiy tiyon Kilisi. Eivek qayeeng wei Hibru eno xel neil, Mesia. Qes, tambiy wei Anutu beyal bei e qou xomaxoneing noum o. yo.
Yesu Kilisi umbek
18 Tine inye pavulek en ingwei Yesu Kilisi umbek o: Moxo ta Maria eno xel beyal bei e mendei wou Yosep, luw se ghei dei lekti ekom vexo xei qou veil en Laweeng Vambuing nikanzek. 19 Maria leya Yosep on tambiy wei bombek om embei se bong niyalenyeing wou vexo eivek xel moux alis vex dalus mend, om embei na veil e xupekeing.
20 Ekom Yosep nanghei di wounalei en tine, Tambiy Ngandoung xe angela lam wou e eivek maviing me neil, “Yosep wa velei wei Dawit o, wa seng gwaleeng qe wa qou Maria nambei veneim, en yak tiwei tumi eivek e yon inye lam wou Laweeng Vambuing. 21 Tyek vexo bou neu moux ti, yond wa taxe e lei bei Yesu, en tyek devind e xe xel veil xel xe sewokeing.”
22 Lul dalus tine la teyei lek ambei ingwei Tambiy Ngandoung neil eivek poropet mya yo:
23 “Wei, vexawo wei paleveeng o ti tyek xei qou veil me bou neu moux ti, de tyek xel taxe e bei Imanuel.” Yesaya 7:14
Qes ambei nye, “Anutu toundei is xey.”
24 Ka Yosep qandi lek de moxo wong ambei kawei Tambiy Ngandoung xe angela neil wou e yo, me qou Maria nambei e venei. 25 Ekom moxo se yeip is e qe ka Maria qou neu moux woy le. De moxo taxe neu lei Yesu.
*1:11 1:11-12 Jekonaia, lei nge bei Jehoiakin.
†1:17 1:17 Qes wei lei Kilisi eno nambei nye: tambiy wei xel taw wel lek e lu. Ekom eivek kwa wei Yudayeiw takwei eno xel mi taw wel lek moux nambei dee wei Anutu beyal bei em bale me natax en e xe xomaxoneing. Natax en ingwei Yesu lam o xel ngenong di axe e en xel embei gyei lek mend nanghei inye me nanghei inyei en xel wou naleind bei tambiy vako ti tyek nam devind xel veil nimaying. Xel taxe tambiy tiyon Kilisi. Eivek qayeeng wei Hibru eno xel neil, Mesia. Qes, tambiy wei Anutu beyal bei e qou xomaxoneing noum o.