Xoulek Nimza wei
Malaka
byex o
Qayeeng wei la tax o
Qayeeng ti tax wei Malaka yo neil ambei nye, ''Tine Xoulek Nimza wei Yesu Kilisi Anutu Neu yo.'' De eivek qapiya tine eno xey a xei Yesu bei e nikanzekta me lei laeing wei mi wong xuk leimalei yo. Xey a xei e xe nikanzekta me lei laeing gyeik ingwei mi teyoxe xomaxoneing o me gyeik ingwei mi tiy laweeng nol o me gyeik ingwei mi semaleeng sewokeing wei xomaxoneing o. Yesu taxe emaxow bei ''Xomaxoneing Neu Moux,'' de neil embei lam bei bong e maxow xe mapieing me dexouv xomaxoneing ngenong noumenam 10.45.
Malaka tul pavulek ngenong en Yesu xe xuk, ekom se tul pavulek ngenong en lukeing wei Yesu neil me teyoxe xomaxoneing o. Myaxeeng eno Malaka tul pavulek en Yoan Lipekeing xe xuk me ingwei Yesu qou lipekeing o me ingwei Sandang tyoxe e yo. Dekakom xey a xei ingwei lalei pyaxow en xomaxoneing wei qalei nimaying leimalei yo, me teyoxe xel. Myaxeeng eno xel betiyeing se wou lek lulul tiyon qes wei Yesu di wong on, dekakom xel di wou lek kaka.
Xey a xei bei xel xomaxoneing wo vevek wou Yesu me wo nimaying ngenong wou e. De Xoulek Nimza danghei ti yus wei byex eno Malaka tul pavulek en ingwei Yesu mey me qandi lek veil meyeing o.
1
Yoan Lipekeing menyexwou sakwaing
1 Inye Xoulek Nimza wei myaxeeng en Yesu Kilisi, Anutu Neu Moux o eno nambei, 2 Poropet Yesaya byex eivek xoulek eno nambei nye,
“Wei! Tyek a bong a xe nenyalesana ti natax en wang,
me tyek e menyex wou wa xe sakwaing.” Malakai 3:1
3 “Vya taxeing ti lam anghei myayaing wei tembuing bandaing nei,
‘Menyex wou sakwaing en Tambiy Ngandoung,
me wong sakwaing e wo bombek en e.’ ” Yesaya 40:3
4 Om Yoan Lipekeing lam lipek xel eivek tembuing bandaing me neil xoulek bei xel pekwi xow en Anutu e semaleeng xel xe sewokeing veil en talex lek bei xel pekwi xow. 5 Me danghei wei Yudia nei eno xel dalus is xel dalus wei Yerusalem eno la wou e me neil xel xe sewokeing teyei. De Yoan lipek xel eivek memiing Yorodan. 6 Yoan mi byex teimb wei xel menyex wou en kamel nivlus o me vex let wei leliy ninavi yo vivekwou xeikatu. Me mi ya zevak me beyexta nilouk wei qeis lalei yo. 7 De inye e xe xoulek, “Tambiy ti tyek nam yus en ay eno e xe nikanzek ghanaw ay. A se teyeimbei dundek me na tul yis wei e xe vaxalambes. 8 A lipek xam en memiing, ekom moxo tyek zipek xam en Laweeng Vambuing.”
Yoan lipek Yesu
9 Lek bouk tiyon Yoan di lipek xel eno Yesu lam anghei Nasaret wei Galili nei me Yoan lipek e eivek memiing Yorodan. 10 Ka Yesu leklam veil memiing woyom moxo yei tyoung dembu me tax, me Laweeng Vambuing lep me lam lek e nambei menek beliy ti. 11 De vya ti lam anghei tyoung gheyapu me neil, “Wang on a Neung, wei a laleing vind o. A laleing wo nimza wou wang.”
Sandang wo axeing wou Yesu
12 Se denlek en Laweeng Vambuing wong Yesu la eivek tembuing bandaing, 13 me Yesu la mindei eivek tembuing bandaing on teyei lek bouk xoumeeng vey (40), me Sandang wo axeing wou e. Moxo mindei is leliy leliy bemeeng de angelayeiw mi vind e.
Yesu wong e xe xuk tiwei tax o
14 Ka xel toung Yoan eivek xeitueing, woyom Yesu la eivek Galili, me neil Xoulek Nimza wei Anutu xe yo. 15 E neil, “Bouk wei Anutu neil atax eno wo neing lek. Me Anutu xe tete lalei lam paviy. Om xam pekwi xow me ghe bongis Xoulek Nimza!”
Yesu taxe xel vey bei xel betiwou e
16 Ka Yesu di tupwou lounyeing Galili vi, moxo yei Simon me li Andrias. Luw di nex lewek eivek lounyeing, en luw mi wong xuk wei qoueing woing o. 17 Yesu neil, “Muw betiwou ay, me tyek a bong muw ghe bo xuk wei qoueing xomaxoneing o.” 18 Lutika eno luw ghanaw luw xe lewek dom betiwou e.
19 Gyeik Yesu dula nayaka eno yei Sebedi neu moux Jems me li Yoan toundei eivek bot me di senzi luw xe lewek. 20 Moxo taxe luw lutika me luw ghanaw ma Sebedi eivek bot is e xe xukxe wei xouveing o dom betiwou e.
Yesu tiy laweeng nilaxes veil tambiy ti
21 Xel la tyip Kapenaom, me gyeik bouk wei Sabat o lam eno Yesu la eivek xomek qekueing ama me di teyoxe xoulek wou xel. 22 Xel xomaxoneing on etek en qayeeng wei e di teyoxe wou xel on, en se teyoxe xel ambei xel putoung wei petieing o, qe nambei tambiy wei luk is nikanzek o. 23 Se denlek en tambiy ti wei laweeng nilaxes toundei eivek e, me toundei eivek xomek qekueing ama is xel eno nyayek ngandoung bei, 24 “Yesu wei Nasaret, wa being bo vati wou xa? Wang lam bei semaleeng xa veil? A woulek bei wang on eti. Wang on vambuing tiwei Anutu yo!”
25 Yesu neil e, “Tip lukeing. De lam myayaing veil tambiy yon!” 26 Laweeng nilaxes on bimexe moux on nikanzek, de nyayek me lam myayaing veil tambiy on.
27 Xomaxoneing tambak on dalus etek en inyon me xel teling ama, “Tine inye vati? Inye teyoxeing vako ti is nikanzek me neil laweeng nilaxes dom xel betiwou e vya.” 28 Pavulek wei e yo la wo tambak daing eivek tembuing danghei dalus wei Galili yon.
Yesu neil dom gying ma veil Simon yeing avexta
29 Xel la veil xomek qekueing ama eno lutika xel la is Jems me Yoan bei na xomek wei Simon me Andrias o. 30 Simon yeing avexta wo gying om di yeip lek zek, me se wo lululek eno xel neil wou Yesu en vexo. 31 Om moxo la wou e, me zeim e mema de vind vexo dei ghey. Gying on la veil e dom vexo qandi me di yeiwou yaeing wou xel.
Yesu wong xel ngenong wo nimzalek
32 Ka sayeiv teila me di wo mangamong eno xomaxoneing qou xel dalus wei vanei yo me memo nilul wei dei eivek o me la wou Yesu. 33 Xel beyeeng dalus on qekuma wou xomek mya, 34 me Yesu yeiwou xel ngenong wei xe vanei leimalei eno ma. Moxo tiy memo ngenong is ambei nyon, ekom se wong memo yon luk, en xel woulek bei e eti.
Yesu zeimema nanghei ingwei xel ma veil o
35 Satiboukeing lulayang wei di wo matektekeing, eno Yesu qandi lek me lam veil xomek me la ingwei xel ma veil o, me la di zeimema. 36 Simon me e xe laxousyeiw la bei na gyimexe e, 37 me gyeik xel yeiwou e, xel neil wou e, “Xomaxoneing dalus di yimexe wang!”
38 Yesu neil elox, “Xey ambei na beyeeng bamba wei paviyeing nei, en kandek a neil xoulek anghei inyon is. Qes tiyon om a lam.” 39 Om moxo ghavineeng la eivek Galili, me la neil xoulek eivek xel xe xomek qekueing ama me tiy xel memo.
Yesu wong tambiy tiwei vanei lepa eno wo nimzalek
40 Tambiy tiwei vanei lepa yon lam wou Yesu me ev vaxa qatu eivek dom tay wou e, “Wangwei wa laleim e devind nei, yond wang bong am bo vako.”
41 Yesu lalei pyaxow en moxo, yom tatei mema la me axlek moxo. Me neil, “A laleing vind. Wang bo vako!” 42 Lutika eno lepa la veil e dom moxo wo vako.
43 Yesu wong moxo la lutika dom peti e nikanzek, 44 “Wang gweiteyei en wa se neil inye wou xelti. Ekom la talex xow wou lumuki me wong da la nambei ingwei Mose wo qayeeng petieing o bei neing ayang wang wo vako no, inye nambei pavulek ti wang bong ambei nyon en tyek xel boulek bei wang nimzalek.” 45 Ekom ma, tambiy on la myayaing me neilteyei wou xel tambakateiv on, om qayeeng la wo sapa en vati wei e wong o. Om nambei nyon Yesu se teyeimbei na eivek beyeeng yanyateiv, om moxo mindei myayaing eivek beyeeng wei xel ma veil o. Ekom xomaxoneing nanghei di lam wou e nanghei beyeeng danghei danghei nei.