1 Dɛ mɔ̀nnì kɛ̀ ti Yiɛ̀ nKuyie mbɛnkɛ kumɑ́ɑ̀ Abɑrɑhɑmmu dibòrì bɛ̀ tu dì Mɑmmudee kó dɛtie mborɛ̀, kɛ sɔ̃́ ndiyiè còḿmú yɛyɔ kɛ̀ kuyiìnkù bo, kòò kɑ̀ri kutouku bòrìnùù, 2 kɛ́yɑ̀ bɛnìtìbɛ̀ bɛ̀tɑ̃ɑ̃ti kɛ̀ bɛ̀ còḿmú o tɑkɛ́. Kòo ítóo kɛ́ bɛ̀ co kɛ́nínkú kɛ́sĩ́nnɔ́ɔ bɛ ììkɛ̀, 3 kɛ́nɑ́kɛ́ bɛ kóò mɔù kɛ dɔ̀: Di bɑ́ɑ́ pɛ̃ɛ̃tɛ́ mí nhɑ kóo tɔ̃ntì n cĩ́ɛ̃̀tɛ̀. 4 Yóunɛ̀ kɛ̀ bɛ̀ɛ wɑɑnní mɛniɛ nkɛ̀ dí ɔ́ú di nɑɑ̀cɛ̀i, kɛ́om̀pɛ̀ mutie muu ntɑkɛ́. 5 M bo wɑɑ́ mmudiì kɛ́ di duɔ́ nkɛ̀ dí di, kɛ́pɛ́tɛ́ muwɛ̃rímú, kɛ́nɑ kɛ́sɔɔtɛ́ di cɛ, di bɑ́ɑ́ pɛ̃ɛ̃tɛ́ n cĩ́ɛ̃̀tɛ̀ mɛmmɛ. Kɛ̀ bɛ̀ dɔ̀: Dɔɔ̀ ɑ bɛ́i ntì.

6 Kɛ̀ Abɑrɑhɑmmuu cokɛ́ mɛcɑ̃ɑ̃ nkɛ́tɑroo kutouku Sɑrɑɑ borɛ̀, kóò nɑ̀kɛ́ kɛ dɔ̀: Wɑɑ́ mmuyuo mmù yó nsɑ̀nnɛ̀mɛ̀ kɛ́ɑ̃ntɛ kɛ́dɔɔ̀ tipɛ̃́mpɛ̃ńtì tìtɑ̃ɑ̃ti mɛcɑ̃ɑ̃.

7 Dɛ kó difɔ̃nkúò kɛ̀ Abɑrɑhɑmmuu cokɛ́ kɛ́pĩ́nní dinɑɑdɑbii dìì wenni, kɛ ɑ̃ mɛkùɔ̀ nkɛ́duɔ́ nho kóo n tɔ̃ntì mɔù kòo dì kùɔ kɛ́bénnɛ́ mɛcɑ̃ɑ̃. 8 Imɑɑ mbi dìì mɔ̀nnì kòo ì tùótɛ́ kɛ́wɑɑ́ mmɛnɑɑmiɛ̀ mmɛ̀ɛ̀ kɑ̃ntɛ́ nɛ̀ mɛ̀ɛ̀ ũmmú bɑ̀mbɑ̀ nkɛ́ bɛ̀ ĩ̀ńnɛ́, kɛ̀ bɛ̀ nyo nkòò còḿmú bɛ tɑkɛ́, kɛ dírí mutie. 9 Kɛ̀ bɛ̀ɛ bekɛ Abɑrɑhɑmmu kɛ dɔ̀: A pokù Sɑrɑɑ borɛ? Kòò dɔ̀: Ò bo kutouku miɛkɛ. 10 Kɛ̀ Kuyie ntɔ̃rɛ̀ kó dìmɑrì dɔ̀: Dɛ̀ yɑ̀ɑ bo nkɑ̃́ɑ̃́kɛ́ miɛ, kɛ̀ nní nwɛ̃tiní ɑ cĩ́ɛ̃̀tɛ̀ kɛ sɔ̃́ nhɑ pokù Sɑrɑɑ pɛitɛ́ dɛnitidɑbirɛ ndɛ.

Kɛ̀ Sɑrɑɑ còḿmú kutouku bòrìnùù Abɑrɑhɑmmu fɔ̃nkúò kɛ yo. 11 Abɑrɑhɑmmu nɛ̀ Sɑrɑɑ bɛ̀ do kòtɛ́ mɛdiɛ̀ mmɛ, bɑ́ Sɑrɑɑ tɛ̃́nkɛ í nyuɔ. 12 Kɛ̀ Sɑrɑɑ dɑɑ́ omɑ́ɑ̀ borɛ̀ kɛ dɔ̀: N kòtɛ́mu n tɛ̃́nkɛ í yuɔ, kɛ̀ n dɔù múnkɛ kòtɛ́. 13 Kɛ̀ ti Yiɛ̀ nKuyie mbekɛ Abɑrɑhɑmmu kɛ dɔ̀: Dɛ̀ yĩ́mɛ kɛ̀ Sɑrɑɑ dɑɑ́, kɛ tú ò kòtɛ́ kɛ pɛ̃ɛ̃tɛ́ ò bo pɛitɛ́mɛ̀ dɛbirɛ? 14 Dɛ̀mɑrɛ̀ bo ti Yiɛ̀ nKuyie nyĩɛ̃kú dɛ̀ɑ̀? Dɛ̀ yɑ̀ɑ bo nkɑ̃́ɑ̃́kɛ́ miɛ nkɛ̀ nní nwɛ̃tiní ɑ cĩ́ɛ̃̀tɛ̀ kɛ sɔ̃́ nSɑrɑɑ pɛitɛ́mu dɛnitidɑbirɛ.

15 Kɛ̀ Sɑrɑɑ kɔ̃m̀bùɔ̀tìi do, kòo nɛnni kɛ dɔ̀: N yí dɑɑ́. Kɛ̀ ti Yiɛ̀ nKuyie ndɔ̀: A dɑɑ́mu.

16 Kɛ̀ dɛ kó bɛnìtìbɛ̀ɛ ítɛ́ kɛ́cuó nSodɔmmu bíɛ́kɛ̀, kɛ̀ Abɑrɑhɑmmuu bɛ̀ cíe. 17 Kɛ̀ ti Yiɛ̀ nKuyie mbɛ́i nkɛ dɔ̀: M bɑ́ɑ́ sɔnnɛ Abɑrɑhɑmmu n yóó dɔɔ̀ tì. 18 O kó kubotí yóó dɛukɛ mɛdiɛ̀ mmɛ kɛ́nkpeńnì. Weè yó nte kɛ̀ ibotí imɔuu pɛ́tɛ́ mɛsɑ̀ɑ̀. 19 N we ntɑ̃ɑ̃tɛ́ kɛ bo duɔ́ nkòo bí nɛ̀ o yɑɑ̀bí kɛ̀ bɛ̀ nyíé n kuɔ́, kɛ̀ i borimɛ ńwenni kɛ̀ ì dɔ̀ɔ̀ri n dɔ́mɛ̀, kɛ̀ dɛ̀ɛ yie nkɛ̀ nh ò dɔ̀ɔ̀ mɛsɑ̀ɑ̀ n yɛ̃ n yóó ò dɔ̀ɔ̀ mɛ̀.

20 Kɛ̀ ti Yiɛ̀ nKuyie nnɑ́kɛ́ Abɑrɑhɑmmu kɛ dɔ̀: Bɛnìtìbɛ̀ kuɔ̀nnɛ̀ Sodɔmmu nɛ̀ Komɔɔ dɛ kɔbɛ mɛdiɛ̀ mmɛ, bɛ cɑɑ̀rìmɛ̀ dɛumu. 21 M bo kɔtɛ kɛ́síékɛ́, kɛ̀ bɛ̀ mɛ̀nkɛ cɑɑrimu n yɑ̀.

22 Kɛ̀ bɛ̀dɛ́bɛ̀ɛ kétɛ́ kɛ́nkɔri Sodɔmmu bíɛ́kɛ̀ kɛ̀ ti Yiɛ̀ nKuyie nní nkpɑɑ́nɛ̀ Abɑrɑhɑmmu.

23 Mɛm̀mɛ kɛ̀ Abɑrɑhɑmmu tɔ́ɔ́nko ti Yiɛ̀ nKuyie mborɛ̀ kɛ́ kù bekɛ kɛ dɔ̀: A bo yie nkɛ́wɛ̃nnɛ́ onitisɑ̀ù nɛ̀ oyɛiwe kɛ́kuɔɑ̀? 24 Kɛ̀ bɛnitisɑ̀ɑ̀bɛ̀ bo Sodɔmmu sipísìnùmmù, ɑ bo bɛ̀ wɛ̃nnɛ́nɛ̀ kɛ́kuɔɑ̀? A bɑ́ɑ́ bɛ̀ cĩ̀ɛ̃́ nkɛ́yóu dihɛì bɛ kpɛ́ínɑ́ɑ̀? 25 Bìtì! A bɑ́ɑ́ yie nkɛ́ mɛ̀ dɔ̀ɔ̀. A bɑ́ɑ́ yie nkɛ́túótɛ́ onitisɑ̀ù kɛ́wɛ̃nnɛ́nɛ̀ oyɛiwe kɛ́kuɔ, kòò sɑ̀ùu cɔutɛ́ oyɛiwe kó tiyɛ̃ĩti. Fɔ̃́ nwèè bekùnɛ̀ kutenkù kumɔu, ɑ bɑ́ɑ́ yóu ɑ bo dɔɔ̀mɛ̀ dɛ̀ɛ̀ wenni. 26 Kɛ̀ ti Yiɛ̀ nKuyie ndɔ̀: Kɛ̀ ǹ yɑ̀ bɛnitisɑ̀ɑ̀bɛ̀ sipísìnùmmù Sodɔmmu miɛkɛ m bo cĩ́ɛ̃́ ndihɛì dimɔu bɛ kpɛ́í. 27 Kɛ̀ Abɑrɑhɑmmu dɔ̀: Yóu kɛ̀ n yíɛ́ dɑ bɛ́innɛ̀ n Yiɛ̀ nKuyie mí nwèè tu mutɑ̃́ɑ̃́ nkɛ tú mutɑ́pɛí. 28 Kɛ̀ bɛ̀ í tùɔ̀kɛ sipísìnùmmù, kɛ bo sipísìnɑ̀ɑ̀ nɛ̀ bɛ̀nùmmù ɑ́ pɔntɛ dɛ kó dihɛìɑ̀ɑ̀? Kɛ̀ ti Yiɛ̀ nKuyie ndɔ̀: Kɛ̀ n yɑ̀ bɛ̀ɛ̀ wenni kɛ̀ bɛ̀ bo sipísìnɑ̀ɑ̀ nɛ̀ bɛ̀nùmmù, m bɑ́ɑ́ pɔntɛ dihɛì. 29 Kɛ̀ Abɑrɑhɑmmuu yíɛ́ kɛ́bɛ́i nkɛ dɔ̀: Kɛ̀ bɛ̀ɛ̀ wenni kɛ̀ bɛ̀ nɛ́ bo sipísìnɑ̀ɑ̀ tɑ́? Kɛ̀ ti Yiɛ̀ nKuyie ndɔ̀: Kɛ̀ bɛ̀ bo sipísìnɑ̀ɑ̀ m bɑ́ɑ́ pɔntɛ dihɛì. 30 Kɛ̀ Abɑrɑhɑmmu dɔ̀: A miɛkɛ bɑ́ɑ́ pɛikɛ n dɑ bɑ́ɑ́mmu, kɛ̀ bɛ̀ bo sipísìtɑ̃ɑ̃ti tɑ́? Kɛ̀ ti Yiɛ̀ nKuyie ndɔ̀: Kɛ̀ bɛ̀ bo sipísìtɑ̃ɑ̃ti m bɑ́ɑ́ dì pɔ̀ntɛ. 31 Kɛ̀ Abɑrɑhɑmmu dɔ̀: N dɑ bɑ́ɑ́mmu yóu kɛ̀ n yíɛ́ kɛ́bɛ́i, kɛ̀ bɛ̀ bo sipísìdɛ́ tɑ́? Kɛ̀ ti Yiɛ̀ nKuyie n dɔ̀: Kɛ̀ bɛ̀ bo sipísìdɛ́ m bɑ́ɑ́ pɔntɛ dihɛì. 32 Kɛ̀ Abɑrɑhɑmmu yíɛ́ kɛ́bɛ́i nkɛ dɔ̀: N Yiɛ̀ nKuyie nhɑ bɑ́ɑ́ nh ɔunɛ̀, n yóó bɛ́i mmɛsɔmmɛ mmɛ. Bɛ̀ɛ̀ wenni kɛ̀ bɛ̀ bo tɛpíítɛ̀ tɑ́? Kɛ̀ ti Yiɛ̀ nKuyie ndɔ̀: Kɛ̀ bɛ̀ bo tɛpíítɛ̀ m bɑ́ɑ́ pɔntɛ dihɛì.

33 Bɛ̀ nɑ̀kɛ́ mɛmmɛ kɛ́deè, kɛ̀ ti Yiɛ̀ nKuyie nyítɛ́, kɛ̀ Abɑrɑhɑmmuu kò nho cĩ́ɛ̃̀tɛ̀.