10
Isɔbu sɑ́útìi sɔkɛ́mɛ̀
N dɛmmu mufòmmu,
dɛɛ̀ te kɛ̀ n yóó nkù sɛ̀í,
n nɑ́ɑ́nnɛ̀ mɛyɛǹcɑɑ̀rìmɛ̀ mmɛ.
N yóó nɑ́kɛ́mu Kuyie nkɛ dɔ̀:
kù bɑ́ nni ntounko tinɑ́ɑǹtì,
kù n nɑ́kɛ́ kù n sɛ́í ntìì ĩ́nkɛ̀.
Kuyie nhɑ n fɛ̃́ũnko kɛ̀ dɛ̀ dɑ nɑɑtimɑɑ̀?
A sènkɛ̀rì mí nhɑ dɔ̀ɔ̀ wè nɛ̀ ɑ nɔu kɛ̀ dɛ̀ wennimɑɑ̀,
dɛ̀ wenni kɛ dò nhɑ́ dɔɔ̀ bɛyɛibɛ dɔ́ kɛ́dɔɔ̀ tɑ̀ɑ̀?
A mɔkɛ onìtì kó inuɔ nyɑɑ̀?
A wúó nhonìtì ti wúómmɛ̀ mmɑɑ̀?
A we kũpúrì onìtì kpɛyɛ kɔ̃mɛ mmɑɑ̀?
A bie ndònnɛ̀ onìtì kpɛyɛ dòmmɛ̀ mmɑɑ̀?
Kɑ̀ɑ wɑnti n kó mɛyetímɛ̀,
kɛ fɛintɛ n kó mɛyɛinɑɑ̀?
A yɛ̃́mu kɛ tú n yí cɑ̀ɑ̀rɛ̀ mùmɑmù.
Òmɔù nɛ́ mɛ nyí bomɛ̀ wèè bo n fietɛ ɑ nɔu miɛkɛ.
 
Fɔ̃́ɔ̃̀ m pìítɛ́ kɛ n dɔ̀ɔ̀ n kɔ̃̀ntì timɔu,
kɛ nɛ́ bo n kuɔ pɑ́í pɑ́íɑ̀?
Dentɛní kɛ dò nhɑ m pìítɛ́ tiyɑɑtì tɛ̃mɛ̀ mmɛ,
ɑ dɔ́ kɛ́wɛ̃tɛ kɛ́ n tɑnnɛ́ mutɑ̃́ɑ̃́ mmɑɑ̀?
10 A nh utɛ́ kɛ̀ nni ndò mmɛnɑɑmiɛ̀ mmɛ,
kɑ̀ɑ n kɑ̃ntɛ́ dinɑɑkɑ̃nnì kɔ̃mɛ.
11 Kɛ n dɑ̀tínnɛ́ tikɔ̃̀ntì nɛ̀ mɛmɑmbii,
kɛ nh ɑ̃nnɛ́ yɛkṹɔ̃̀ kɛ n detí icĩɛ̃.
12 Kɛ n dɔ̀ɔ̀ diwɛ̀ì kɛ m pɑ̃ mufòmmu,
ɑ dɑkɛmu n kpɛ́í ndɛɛ̀ te kɛ̀ n fòù.
 
13 Nɛ́ ntɛ tìì sɔ̀ri ɑ yɛ̀mmɛ̀ miɛkɛ.
N yɛ̃́mu tìì bo ɑ yɛ̀mmɛ̀ tiì tú:
14 A bo nni mpɑkɛ́mɛ̀ kɛ̀ n cɑ̀ɑ̀rɛ̀ ɑ m pĩ́,
kɛ̀ n yetɛ́ ɑ bɑ́ nni nwúónko.
15 Kɛ̀ n cɑ̀ɑ̀rɛ̀, n tùɔ̀ti icɛ nyi,
bɑ́ kɛ̀ n yí cɑ̀ɑ̀rɛ̀ m bɑ́ɑ́ nɑ kɛ́éu n yuu,
n nɛ́ di ifɛi nyi kɛ sɑ̀nnɛ̀ n diu n sémmɛ̀ miɛkɛ nkɛ.
16 Kɛ̀ n yɛ̃ m bo íi n yuu ɑ́ n fɛ̃nnɛ́ dicìrícìrì kɔ̃mɛ,
n yĩ́nkɛ̀ nkɛ ɑ bɛnkúmɛ̀ ɑ kpetì kɛ m puotì.
17 Tii nníí nyitóo kɛ̀ titɛtì tùɔ̀kɛní,
kɑ̀ɑ miɛkɛ dɔkɛ n yiɛ̀ kɛ yɛ́útí,
yɛhɑ̃ɑ̃pɔ̀ntĩ̀rɛ̀ yɛɛ̀ nɛ́ n duò kɛ sɛ́i.
 
18 Bɑ nnɛ́ te kɑ̀ɑ n dènnɛní n yɔ̃ pɔutì miɛkɛ?
N nɑ nku bɑ́ òmɔù mu n yí n yɑ̀.
19 Kɛ̀ dɛ̀ nɑ ndò n ketɛ́ kɛ í buotɛ́ kutenkù,
kɛ̀ n nɑ nyɛtìní n yɔ̃ pɔutì kɛ̀ bɛ̀ m pɛ̃nkɛ́nɛ̀ kufɔ̃ti.
20 N we tɛ̃́nkɛ í kpɑɑ́ kɛ sũ,
n yóu kɛ̀ m múnkɛɛ wei sɑ́m̀pɔ́.
21 Kɛ nɛ́ nɑ kɛ́kò mbɛ̀ kũũ̀ nkɛ̀ kɛ í wĩɛ̃tiní,
dibiìnnì kó dihɛì dɛ̀ dò nkɛ̀ bì,
22 dɛ kó dihɛì dɛ̀ ɔ̃ɔ̃ wentɛ́ kɛ́mbìmu,
dɛ bíɛ́kɛ̀ dibiìnnì diì kɛ̀ bo,
dɛ̀mɑrɛ̀ í kɛ̀ dò nsɛ́i,
kuyie ncuokɛ̀ dɛ̀ ɔ̃ ndò nkɛyènkɛ̀ nkɛ.