1 अपोल्लोस कोरिन्थि होतितुइना पावल नाङयि छेत्रयि लाम्ला एफिससला लेप्सोङ। ख्युइ हतिया लोब्टु रेनला ठेसोङ। 2 ख्युइ हतिबाला नाइसोङ, “जब खि हिछे क्याइरे च्हि खेला पवित्र आत्मा खुसुइये?” हतिबे खोला नाइसोङ, “पवित्र आत्मा होतो नाङान ता ङि ता थोथोइबा याङ मेता।” 3 तेहि हति हतिबाला नाइसोङ, “तेहि खि च्हिरु बप्तिस्मा खेरते?” हतिबे नाइसोङ, “युहान्नायि बप्तिस्मा।”

4 तेहि पावलयि नाइसोङ, “युहान्नायि पिपिनि बप्तिसमाते घ्योप्पा कियापयि बप्तिस्मा ना। ख्युइ च्येला होङानयि मि, अर्थात येशुयि थोला हिछे कि नाइरे ख्युइ मितेबाला स्येसोङ।”19:4 मत्ति ३:११; मर्कुस १:४,७-८; लुका ३:४-१६; युहान्ना १:२६-२७ 5 धि तामबा थोइरे हतिबे प्रभु येशुयि मिनला बप्तिस्मा खेरसोङ। 6 जब पावलयि हतिबे थोला लाक्पा पोरसोङ, तेहि पवित्र आत्मा हतिबे थोला लेप्सोङ, राङ हतिबे स्यान क्येला ताम नाइसोङ राङ ङोन्सेखिलसोङ। 7 हतिबा हा:लाम च्युनङि झोम धु। 8 पावल यहुदि झोमसि खिमला स्युरे धा सुम थु कजसुबायि राज्ययि भारेला हतिबा ङ्याबो हा:म राङ ङ्याबो नारे क्याइसोङ राङ मितेबाला हो:कोयापला स्योकिन त्येसोङ। 9 हिन्नाङ जब रेनरेन राङढिया च्युङदे हिछे माक्याइसोङ, राङ धि सामजयि विरोधला मिझोमयि धुनला ताम नाला छेलसोङ, तेहि पावल हतिबाने कुरु त्येसोङ, राङ लोब्टुबाला ङ्याबो खेरते टुरान्नसयि स्कुलला नारे किताला छेलसोङ। 10 धि लाइ लो ङि थु चलि च्युङसोङ, राङ एशियायि त्योएङान मि पोरो, यहुदि राङ ग्रिक ङिकारयि प्रभुयि वचन ङ्यानसोङ।

11 कजसुबायि पावलयि लाने बारतैले कुरु हा:लाइयापयि लाइतेबा क्याइसोङ, 12 धि थु कि रुमाल आथावा भरकि स्हुला छुइ क्याइरे नाप्पातेबे तेहा खेरिनलो, राङ हतिबे स्हुने नाझातेबा ढुन राङ ढेतेबा याङ थोनिनलो। 13 हिन्नाङ रेनरेन फाला छुलो युङान यहुदि झाक्रितेबे ढे काकालातेबाला प्रभु येशुयि मिन धोनिन राङ जु नाइसोङ, “पावलयि टाइक्ये क्याक्याइबि येशुयि लाम्ला ङा ख्योएला आदेश तेरकिन होए।” 14 हतिया चि स्केवास मिन क्याक्याबि यहुदि घोबा पुजारियि पिजा तुनयि जु किनलो।

15 तेहि ढेति जवाक पिन्दे हतिबाला नाइसोङ, “येशुला ङाहि ङोस्येयिन, राङ पावलला याङ ङाहि ङोस्येयिन, हिन्नाङ खे सुना?”

16 हति ढे काकालि मि हतिबे थोला फाकिन राङ लेप्सोङ, राङ हतिबा पोरोला कबुला ख्योरे हतिबे च्येला लेप्सोङ राङ हतिबे हति खिमने च्येपटाका राङ नाप्पा च्युङदे टोइरे पुइसोङ। 17 धि ताम एफिससला त्योएङान, यहुदि राङ ग्रिकतेबाला हाङ चाङमा चाङक्याङ च्युङसोङ। तेहि हतिबा पोरोयि थोला झिटा च्युङसोङ, राङ प्रभु येशुयि मिनला छे त्येसोङ। 18 हिछे किङानतेबा लेइराङ लेप्सोङ, राङ हतिबे क्याक्याइबि लाइ अलतेबा पोरो स्विकार क्याइसोङ राङ हति थोङदु च्युसोङ। 19 हतिबे नाङने लेइराङ, सुगेसुगे जादु किन, राँ राँसि किताबतेबा रुरे ख्योसोङ, राङ पोरोयि धुनला मेला क्यापसोङ। हतिबे हति घो क्याकितुइना तोङ ङोपच्यु ङुलयि सिक्कायि हिसाब लेप्सोङ। 20 हति च्वरा क्याइरे प्रभुयि वचन फेलिन राङ क्योङबो हुन पुइसोङ।

21 हति घटनातेबे च्येला, पवित्र आत्मायि प्रेरणाला पावलयि माकेडोनिया राङ अखैयायि लामयि लाम्ला यरुश्लेमला ढोयापयि थाकच्योए क्याइसोङ। ख्युइ नाइसोङ, “हतिया क्योप छारते ङा रोमला ढोकोइराङ हुन।” 22 ख्युइ स्यापच्यि स्युङान ङि, तिमोथि राङ इरास्तला ख्युइ माकेडोनियाला चाँसोङ, हिन्नाङ खो खोराङते ङिन रेन एशियाला राङ त्येसोङ।

23 हति भेलाला राङ हति लामयि भारेला लेइराङ हलचल च्युङसोङ। 24 चिचालानाना डेमित्रियस मिन क्याक्याइबि मिझि ङुलयि शिल्पकारयि श्यिङयि लाइ किङानयि आर्तेमिस खाडोमि ङुलयि टिमाटिमा मोनलाम क्यासि खिम सोइरे स्यिप होएतातेबा लेइराङला लाइ तेरिनलो। 25 तेहि हतिबाला राङ स्यान हति च्वरा लाइ होएतातेबाला हति जम्मा क्याइरे नाइसोङ, “भाइबा, खेला छ्या होतो माने, कि धि छोङने हुला कमाइ ल हुन। 26 खे थोङिन्दु राङ थोयिन्दु, कि एफिससला मात्र माना, हिन्नाङ हा:लाम एशिया पोरोला लाक्पि सोसोइबि खाडोमा राङ लाते च्याङ माना नाइरे पावलयि मितेबे तुम लेइराङला हा:क्येरु च्युक्ते घो ख्याम्दु च्युच्युका होतो। 27 हतिचाला ङि छोइयि ना छेया मात्रा माना हिन्नाङ हा:छेया खाडोमा आर्तेमिसयि मोनलाम क्यासि खिमबा याङ फान मेता हुन, राङ एशिया पोरो राङ संसारयि मानि किन लेलेबि खाडोमि रेँ ना छ्याछ्याता च्वरा हुन।”

28 हति थोइरे हतिबा स्येताङ लाङदु, राङ “एफिससयि आर्तिमिस हा:छेया ना।” नाइरे क्ये धोनाला छेलसोङ। 29 भजार पोरोला हल्ला च्युङसोङ राङ हतिबा पोरो छ्या झि च्युङदे पावल ङ्याबो ढोङान माकेडोनियाला त्योएङान गायस राङ अरिस्तार्खसला सुङदे थाङ छोम्मुवाला ढुकिन राङ खेरसोङ। 30 पावल मि झोमयि उइला ढोसोम क्याइसोङ, हिन्नाङ लोब्टुतेबे खोला ढोरु माच्युसोङ। 31 एशियायि चोम राङ घोबा मितेबे पावलयि रुवा च्युङसोङ। हतिबे पावलला थाङ छोम्मुवायि नाङला माढो नाइरे स्युवा क्यापसोङ। 32 तेहि हतिबा क्ये करुकुरुला ताम नेन राङ क्ये धोनाला छेलसोङ। चिचालानाना हति मिझोमला हल्ला होङाला छेलसोङ, राङ मि लेइराङयि त हतिबा चिला झोझोमा ना सो हति याङ छ्या माच्युवा। 33 मिझोमयि मि चोम राङयि अलेक्‍जेन्‍डरला धुनला ख्योसोङ, सुला यहुदिबे लाँलाँङाना। अलेक्‍जेन्‍डरयि लाक्पि ता तान्दे मितेबे धुनला क्योपयापयि चाला चिगा नासोम कियापयि ताम पोरसोङ। 34 हिन्नाङ हतिबे हति ता यहुदि हिना नाङान हा:कोरे पोरोयि क्ये झिला हा:लाम घण्टा ङि झोम “एफिससतेबे आर्तेमिसयि हा:छेया ना” नेनराङ क्ये तोनसोङ।

35 ङ्यालबि हाकिमयि मितेबाला शान्त सोइरे नाइसोङ, “एफिससयि मितेबा, एफिससयि भजारते हा:छेया अर्तिमिसयि मोनलाम क्यासि खिम राङ पान्नाङने ङिङला ख्युइ कु क्योपङान ना नाङानयि ताम सुला छ्या मेता?” 36 खेला छ्या होतो धि ताम जवाक क्यामिङ्युइङान धु, हतिचाला खे शान्त होङकोइ हुन राङ च्याङ आत्ति क्याक्याबि लाइ किच्याइ मिहा। 37 चिचालानाना खि ख्योख्योबि धि मि मोनलाम क्यासि खिम लुटि क्याक्याइबा मेता राङ खाडोमि ना च्याच्याता याङ मेता। 38 हतिचाला तेम्बारे डेमेत्रियस राङ हति ङ्याबो होएता श्यिप होएतातेबे विरोधला चिगा उजुर होएना अदालत खुलाला राङ होतो, राङ ल अल भेङानतेबा याङ धु राङ धु, हतिबे चिकि चियि विरोधला मुद्दा चे। 39 हिन्नाङ धि अर्थात स्यान भारेला लोङसोम होएना ता हति थाकच्योए बारतैयि झोमसाला हुन। 40 चिचालानाना तिरिङयि धि मिझोमयि ठुझियि दोष हुइ थोला फयापयि खतरा धु। चिचालानाना धि मनङि छ्युनङि मेते ठुझियि च्याङ च्याङक्याङ ङि तेर मिङ्युइबा। 41 झोम नाइरे ख्युइ मिटिङते क्येतु च्युसोङ।