1 हतिने ढुन ताताताला येशुयि क्येने राङ काना झिला थोङसोङ। 2 ख्युइ लोब्टुबे खोला टिसोङ, “गुरुज्यु, सुइ तिक्पा क्याइरे, धि कि धिबे आके आमायि, राङ धि काना च्युङदे?” 3 येशुयि जवाक पिन्सोङ, “न त धि तिक्पा क्याइरे न त धि आके आमायि, हिन्नाङ धि चाला च्युङदे कि कजसुबे लाइ धि मि मिजेला सअ नाइरे। 4 जब थु ङिन होतो हति थु हु राङला चोङानयि लाइ कि कोयिन, छान स्यारिन दु स्यान सुइ याङ लाइ कि मिङ्युइबा। 5 ङा संसारला होएहोए थु ङा संसारयि होए ना।”9:5 मत्ति ५:१४; युहान्ना ८:१२

6 धि ताम नाइरे ख्युइ साला छिमा ताप्सोङ, राङ छिमायि साबे च्हिरे धाबा स्यिरे हति मिला कुइसोङ। 7 तेहि ख्युइ हतिला नाइसोङ, “कु, सिलोआमयि चाँचाँबि चिङला पुते स्योल।” हति पुते टिसो राङ थोङान च्युङदे लेप्सोङ। 8 हति खिमजे राङ हतिला लोङमा लोङान थोङानतेबे नाइसोङ, “ताते लोङान ते धि मानाइ च्हि?” 9 रेनरेनयि नाइसोङ, “धि हति राङ ना।” “स्यानतेबे नाइसोङ, माना, हति च्वरा थोङिन्दु।” हति नाइसोङ, “ङा हति राङ ना,” 10 तेहि हतिबे हतिला टिसोङ, “ख्युइ मि ख्योए च्हिरु क्याइरे थोङ ङ्युइङान च्युङसुइ?” 11 हति जवाक पिन्सोङ, “येशु नाङान मि झिकि साबि धाबा सोइरे थाहि मिला कुइरे ङाला नाइसोङ, ‘सिलोआमला कु राङ सोल।’ तेहि पुते ङाहि टिरे, तेहि ङा तोङान च्युङसोङ।” 12 हतिबे हतिला नाइसोङ, “खो का धुइ?” हति नाइसोङ, “ङाला छ्या मेता।”

13 तेकि काना होएता हति मितेला हतिबे फरिसिबे तेहा ख्योँदु सोङ। 14 काङ ङिन येशुयि साबि धाबा मिला कुइरे मि प्येसुइ हति ङिनते ङालसुइ ङिन हिना। 15 फरिसिबे हतिला टिसोङ, “ख्योए च्हिरु क्याइरे थोङान च्युङसुइ?” हति हतिबाला नाइसोङ, “ख्युइ ङाहि मिला साबि धाबा कुइसोङ, तेहि ङाहि स्यालदे राङ थोङान च्युङसोङ।”

16 फरिसिबे नाङने रेनरेनयि नाइसोङ, “हति मि कजसुबाने लेलेबा माना, चिचालानाना हति ङालसुइ ङिन मानि मिकिता” हिन्नाङ स्यानतेबे नाइसोङ, “च्हिरु क्याइरे तिक्पा किङान मिबे धि च्वरा हा:लाइयापयि लाइ किङ्युइ किन?” राङ हतिबे उइला पेयाला छेलसोङ। 17 हतिबे हति मि कानाला याङ टिसोङ, “ख्हुइ ख्युइ मि पेदु, ता ख्योए ख्युइ भारेला च्हि नाज्याइ?” हति जवाक पिन्सोङ, “खो ङोन्सेखिलङान मि ना।”

18 मि पेपेयि आके आमाला मा ख्योँरे मा टि थु यहुदिबे खो मि काना हिना राङ थोङान च्युङदे नाइरे हिछे मा क्याइबालो। 19 तेहि हतिबे हतिबाला टिसोङ, “च्हि धि खि च्यिबा हिनाइ स्यु काना क्येक्येबा होतो नारे खे नेन्दु? ता खो च्हिरु क्याइरे थोङान च्युङसुइ?” 20 हति आके आमायि हतिबाला नाइसोङ, “ङेला छ्या होतो धि ङाहि पिजा हिना, राङ काना राङ क्येक्येबा ना। 21 ता धि च्हिरु क्याइरे थोङान च्युङदे नाइरे ङेला छ्या मेता, धि मि सुइ पेरे ङेला छ्या मेता। ख्युइ लो छाँछाँ होतो खोराङ ला टि। खुरि भारेला खो खोराङ नाङान ना।” 22 ख्युइ आके आमायि धि ताम नाइसोङ, चिचालानाना हतिबा यहुदि आङकिङानला झियिनलो। चिचालानाना सुइ याङ हतिला ख्रिष्ट हिना नाइरे ङ्यान ना, हतिला यहुदि झोमसि खिमने धोन कोकिन नाइरे यहुदिबे तेकि राङ रुताम क्याइसोङ। 23 हतिचाला हति आके आमायि नाइसोङ, “ख्युइ हा:कोङान च्युङ छाछारा होतो, धि राङ ला टि।”

24 हतिबे हति मिला सु क्येने राङ काना होतो, याङ लक्ते सह नाइरे, हतिला नाइसोङ, “कजसुबायि धुनला नाक्योल कि ख्योए तेम्बा ताम नाज्याइ! ङेला छ्या होतो कि हति पिजा सुइ ख्योएला थारका सोइरे हति राङ तिक्पा किङान ना।” 25 हति जवाक पिन्सोङ, “खो तिक्पा किङान हिना कि माना ङाला छ्या मेता। ताम झि मात्रा ङाला छ्या होतो कि ङा काना होतो, हिन्नाङ ता थोङान च्युङसोङ।” 26 तेहि हतिबे खोला नाइसोङ, “हति ख्योएला च्हि क्याइ सुइ? ख्हुइ ख्युइ मि च्हिरु क्याइरे पेसुइ?” 27 हति हतिबाला जवाक पिन्सोङ, “ङाहि खेला तेकि राङ नाइछारते, हिन्नाङ खि माङ्यानसोङ। ता याङ चिचाला ङ्यान्सोम हुन्दुइ? खे याङ ख्युइ लोब्टु होङ सोम हुन्दुये कि च्हिरु?”

28 हतिबे हतिला ङारकिन राङ नाइसोङ, “ख्योए पु ख्युइ लोब्टुना, हिन्नाङ ङेता मोशायि लोब्टु ना। 29 ङेला छ्या होतो मोशा ङ्याबो कजसुबे ताम नाइरे, हिन्नाङ ङेला छ्या मेता धि मिते सुना।” 30 हति मि हतिबाला जवाक तेरिन राङ नाइसोङ, “हा:लाइयापयि ताम! खो काने लेलेबा ना ता खेला छ्या मेता हिन्नाङ ङाहि मि ख्युइ प्येसुइ। 31 ङेला छ्या होतो कि कजसुबे मि तिक्पा किङानयि ताम मिङ्याना हिन्नाङ कजसुबाला झिङान राङ ख्युइ धोप्पा ङ्यानङानयि मि ताम कजसुबे ङयान किन।9:31 हितोपदेश १५:२९ 32 संसार सुरु च्युङने राङ थाल्ला थु क्येने राङ कानायि मि पेपेयि ताम नामयाङ माथोइ। 33 तेम्बारे धि मि कजसुबाने लेलेबा अर्थात धि च्याङ कि मिङ्युइबा।” 34 हतिबे खोला जवाक तेरिन राङ नाइसोङ, “ख्योए ता तिक्पाला राङ क्येक्येबाना, राङ च्हि ता ख्योए ङेला लोप्सोम हुनदुये?” तेहि हतिबे खोला फिला तोन्सोङ।

35 हतिबे हतिला फिला तोन्सोङ नाङानयि ताम येशुयि थोइसोङ, राङ हतिला ठाते नाइसोङ, “च्हि ख्योए मि पिजि थोला हिछे किनाइ?” 36 हतिला जवाक तेरिन राङ नाइसोङ, “प्रभु, खो सुना? ङा ख्युइ थोला हिछे किच्याइ?” 37 येशुयि हतिला नाइसोङ, “ख्युइ खोला थोथोङा होतो, तेहि ख्योए ङ्याबो ताम नाङान हति राङ ना।” 38 तेहि हति नाइसोङ, “प्रभु, ङा हिछे किन,” राङ हति खोला काङबाला छ्या क्याइसोङ। 39 तेहि येशुयि नाइसोङ, “ङा ल अल भेयापयि चाला धि संसारला लेप्ते, कि मिथोङानतेबा थोङान राङ थोङान तेबा मिथोङान हुन नाइरे।” 40 धि ताम थोइरे ख्युइ धुनला होएता फरिसि रेनरेनयि नाइसोङ, “च्हि ङे हाङ काना हिनाइ च्हि?” 41 येशुयि हतिबाला नाइसोङ, “खे काना हिन नाता तिक्पि दोषि होङान माना ना, हिन्नाङ ङि थोङिन दु, नेन्दु, हतिचाला खि तिक्पा ताताति ताताता किन।”