1 लाजारस मिन क्याक्याइबा नाप्पा मिझि होतो। हति मरियम राङ ख्युइ इझि मार्थायि युल बेथानियायि हिना।11:1 लुका १०:३८-३९ 2 प्रभुला अत्तर कुइरे ख्युइ काङबा फिङान मरियम धि राङ हिना। हति भाइ लाजारस नाप्पा हिना।11:2 युहान्ना १२:३ 3 हति इझि ङिबुइ येशुयि तेहा जु नाइरे लोन कुरसोङ, “प्रभु, सुला ख्योए करि किन, हति नाप्पा दु।”

4 हिन्नाङ धि थोइरे येशुयि नाइसोङ, “धि नानाइबि सिरु काल थु मिखेरा, हिन्नाङ धि कजसुबे छे धेयापयि चाला ना, तेहि धि ने कजसुबे पिजायि छे तेतेका होङ।” 5 येशुयि मार्था, मुइ भैनि राङ लाजारसला करि किनलो, 6 हति हिन्नाङ लाजारस नाप्पा होतो नाइरे थोइरे हाङ खो काँहा होतो, हतिया, तरह ङिन ङि येशु हतिया राङ तातेलो। 7 हतिच्येला ख्युइ लोब्टुतेबाला नाइरेलो, “ल, ता याङ हु यहुदियाला लक्ते क्यु।” 8 लोब्टुबे खोला नाइसोङ, “गुरुज्यु, थाल्ला काँहा यहुदिबे ख्योएला टोउ क्याकच्याइ प्येसुइ, राङ च्हि ख्योए याङ हतिया राङ ढो च्युइ फाकिनाइ?”

9 येशुयि जवाक पिन्सोङ, “च्हि ङिनला घण्टा च्युनङि मिहाइ? ङिम्मु ढोज्याइला नातो मिक्याका, चिचालानाना हति धि संसारयि होए थोङिन। 10 हिन्नाङ छाम्मु फाला छुलो किच्याइला नातो क्याकिन, चिचालानाना हति मिला साल्बो मिहा।” 11 हतिच्येला येशुयि हतिबाला नाइसोङ, “हुइ रबो लाजारस ङि टोदुलो, हिन्नाङ ख्युइ ङि सोतु ङा हतिया ढोज्याइ।” 12 लोब्टुतेबे खोला नाइसोङ, प्रभु, “खो ङि टोदु नाइना खो टाकिनाइ।”

13 येशुयि हति स्यिस्यियायि भारेला नानाइबा हिना, हिन्नाङ हतिबे च्युका उलतोएला च्वरा ङि टोटुवा हिना नाइबा क्याइसोङ।

14 येशुयि हतिबाला ल क्याइरे नाइरेलो, “लाजारस स्यिदु। 15 खि हिछे क्यायोङ नाइरे खि चाला ङा हतिया मेता ला ङा क्याका होए, च्हि हिन्नाङ हु हतिया ढो।”

16 तेहि दिदुमास नाङान थोमायि खुरि तुमयि लोब्टुतेबाला नाइसोङ, “ल, हुङ ढो, राङ खो ङ्याबो स्यिया।”

17 जब येशु क्योपते, तेहि लाजारसला तुरला पोरते ङिन सि पुइतु। 18 बेथानिया यरुश्लेमयि धुला हा:लाम किलोमिटर सुम घ्याबोला धुलो। 19 यहुदि लेइराङ मार्था राङ मरियमयि तेहा हतिबे भाइयि भारेला मोला छिमा फिक्तु लेप्तुलो। 20 येशु हुनतेतु नाइरे थोइरे मार्था पुइसोङ, राङ खोला ठातेलो। हिन्नाङ मरियम खिमला राङ तातेलो।

21 तेहि मार्थायि येशुला नाइसोङ, “प्रभु, ख्योए ङिहा होतो नाना ङाहि भाइ मास्यि होएरो।” 22 हिन्नाङ ङाला छ्या होतो, ख्युइ कजसुबाला च्हि लाँ, कजसुबायि हति तेरकिन। 23 येशुयि मोला नाइसोङ, “ख्युइ भाइ याङ सोम्बो हुन।”

24 मार्थायि खोला नाइसोङ, “ङाला छ्या होतो, कि सिनि ङिनयि चाला याङ सोम्बो च्युङदे लाँयिन।”11:24 प्रेरित २४:१५

25 येशुयि हतिला नाइसोङ, “स्यिरे लाँङान राङ मिजे ङाराङ ना। ङाला हिछे किङान स्यि नाङ सोम्बो हुन। 26 तेहि सोनङान राङ ङाहि थोला हिछे किङान नामयाङ मिस्यिया। च्हि ख्योए धि हिछे किनाइ?” 27 मुइ येशुला नाइसोङ, “प्रभु, ङा हिछे किन, ख्योए संसारला होङान ख्रिष्ट, कजसुबे पिजा ना।”

28 होचोम नाइरे मार्था पुइ छारसोङ, राङ मुरि भैनि मरियमला चामाना क्ये ताङदे नाइसोङ, गुरुज्यु; लेप्छारसोङ, “राङ ख्योएला क्ये तोङिन्दु।” 29 धि थोइरे मरियम हो:प्तामेला लाँरे ख्युइ तेहा पुइसोङ। 30 हति थुहाङ येशु युलाला लेप्छाछारा मेतालो, हिन्नाङ खो हतिया राङ धुलो काँहा मार्थायि खोला ठातु लेप्सोङ। 31 खिमला छिमा फिक्तु होङान यहुदिबे मरियम हो:प्तेमेला लाँरे फिला पुपुता थोङसोङ, मो हति तुरला ङुरु पुते नाइबा क्याइरे, मुइ च्येला पुइसोङ।

32 जब मरियम येशु होएते साला लेप्ते, राङ खोला थोङसोङ, तेहि जु नेनराङ ख्युइ काङबाला टाला च्यार सोङ, “हे प्रभु, ख्योए ङिया होतो नाना ङाहि भाइ मास्यि होएरो।” 33 जब येशुयि मो राङ मो ङ्याबो होङान यहुदिबा ङुङान थोङसोङ, तेहि ख्युइ सम याङ तुसोङ तेहि सम अल च्युङसोङ। 34 ख्युइ हतिबाला टिसोङ, “खि खोला काँहा पोरते?” हतिबे खोला नाइसोङ, “प्रभु, लेप्ते तोइ।” 35 येशु याङ ङुइसोङ। 36 हतिचाला यहुदिबे नाइसोङ, “तेहि, ख्हुइ ख्योएला चोम करि किन्दुइ।” 37 हिन्नाङ रेनरेनयि नाइसोङ, “च्हि कानायि मि भेङान धि मिलाङ स्यिस्यियाने सोम्बो सो ङ्युइकिनाइ?”

38 तेहि याङ येशुयि लेइराङ सम तुक्ते तुरला पुइसोङ। हति तुर ते फु झिला धुलो। हति खा टोउ झिकि क्यापतु। 39 येशुयि नाइसोङ, “टोउ फाला कि।” स्यिस्यियायि मिति इझि मार्थायि खोला नाइसोङ, “हे प्रभु, धि भेला थु ता हति टिमा खाला छेल होएरो, चिचालानाना खो स्यिरे ङिन स्यि पुइछारसोङ।” 40 येशुयि हतिला नाइसोङ, “च्हि ङाहि खेला नानाइबा मानाइ च्हि, ‘खि हिछे क्याइना कजसुबे छे तेतेका थोङान ना?’ ” 41 हतिबे टोउ फाला क्याइसोङ। तेहि येशुयि मि क्येल्ला क्याइरे नाइसोङ, “हे आके, ङा ख्योएला कटिनक्या नाज्याइ, चिचालानाना ख्युइ ङाहि स्युवा ङ्यन्सोङ। 42 ङाला छ्या होतो, ख्युइ ङाहि स्युवा बारतै ङ्यानकिन। हिन्नाङ ङिया लाँरे ताताता मि झोमयि चाला ङाहि धि नानाइबाना, तेहि ख्युइ ङाला चाँचाँबा हिना नाइरे खि हिछे कि।” 43 तेहि धि ताम नाइ छारते ख्युइ क्ये छेया क्याइरे क्ये ताङसोङ, “लाजारस, फिला थोन।” 44 हति स्यिस्यिया मिते हति लाक्पा काङबा राइयि तातामा राङ च्ये कोहिलायि तुतुमा राङला फिला थोन्दे लेप्सोङ। येशुयि हतिबाला नाइसोङ, “खोला तातामाते ठोल, राङ हतिला ढोरु छ्यु।”

45 मरियमयि तेहा लेलेबि यहुदि लेइराङयि येशुयि क्याक्याइबि लाइ थोङसोङ हिछे क्याइसोङ। 46 हिन्नाङ हतिबे नाङने रेनते फरिसिबे तेहा पुइसोङ, राङ येशुयि क्याक्याइबि लाइतेबा स्येसोङ। 47 तेहि घोबा पुजारि राङ फरिसिबे झोमसा छेयायि स्दस्यतेबाला क्ये ताङदे हतिबाला नाइसोङ, “ता हु च्हि किच्याइ? चिचालानाना धि मिनि लेइराङ हा:लाइयापयि लाइ तोनिन्दु। 48 धिला चुका ताङना पोरोयि धिला हिछे किङान ना राङ रोमि आङकिङानबा लेप्ते हुइ मोनलाम क्यासि खिम राङ हुइ मि देश ङिकार मासि लोङान ना।” 49 हिन्नाङ हतिबे नाङने च्हि, कैयाफा, काङते हति लोयि घोबा पुजारि हिना, ख्युइ हतिबाला नाइसोङ, “खि च्याङ मिस्येबा! 50 लेइराङ राष्ट मासि होङयापले जनताबे चाला मिझि स्यियाप राङ खि चाला ल हुवा नाइरे खि हा:मिकुवा धुये।” 51 धि खुरि चाने नानाइबा माना, हिन्नाङ धि लोयि घोबा पुजारि च्युच्युवाति राष्टयि चाला येशु स्यि कोइ नाइरे ङोन्सेखिलदे नानाइबाना। 52 राष्टयि चाला मात्रा ख्युइ धि नानाइबा माना, हिन्नाङ कार च्युङच्युङला होएते कजसुबायि सन्तनला लाम्मा झिला ङ्याबो स्योएयापला नानाइबा ना। 53 हतिचाला हति ङिनने यहुदि आङकिङानबे येशुला हतिबे सोयापयि टपि क्याइसोङ। 54 हतिचाला याङ येशु यहुदिबे उइला मनस्याङ क्याइरे फालाछुला माक्याइबालो, हिन्नाङ सा थोवाला धुनला होएता एफ्रइम नाङान भजारला पुइसोङ, राङ हतिया लोब्टुतेबा ङ्याबो त्येसोङ। 55 यहुदिबे निस्तार कालापसोल धुनला धुलो, राङ युलयुलने लेइराङ रेँ राङला चाङमा सोरु ताङला यरुश्लेमला पुइसोङ।11:55 २ इतिहास ३०:१७ 56 तेहि हतिबे येशुला पातेलो, तेहि हतिबा मोनलाम क्यासि खिमला लाँरे तोतितुइना खोरे नाङला नारे क्याइसोङ, “खेला च्हि लागि हुनधुइ, च्हि खो कालापसोङला लेबोङङे?” 57 घोबा पुजारि राङ फरिसिबेते येशुला सुङज्याइ नाइरे खो काँहा धुइ नाइरे सुलाङ छ्या होएना लोन कुर नाइरे आदेश पिपिना होतो।