1 Tun Solomon lengpa hin gamchom mi numei tamtah ana ngailu tan ahi. Pharaoh chanu ana kichenpi kalval in jong Moab numei, Ammon numei, Edom numei, Sidon numei leh Hit numei ho jong akichenpi in ahi. ✡Danbu Ni Na 17:17 2 Pakaijin Israel mipite chu kicheh tah a, “Hiche namdang mite chu nakichenpi lou diu ahi, ajeh chu ama hon a pathen ho hou dia na lungthim’u aheilut diu ahi,” tia ana hilchah ahi. Ahinlah Solomon in amaho chu ana ngailu thou-thou in ahi. ✡Potdohbu 34:16; Danbu Ni Na 7:3,4 3 Aman leng chanu te jeng 700 ana kichenpi in chuleh thaikem 300 ana neije. Atahbeh in amaho hin alung hi Pakaiya kon'in ana puimang tauvin ahi.

4 Solomon chu ahung teh phat in, alungthim hi semthu pathen dang hounan ana heilut tauvin, apa David bangin a Pakai a Pathen ah kitah tah in pan ana lajou tapon ahi. 5 Solomon in Sidon mite semthu numei-pathen Ashtoreth leh thet umtah Ammon mite semthu pathen Molech chu ana hou tan ahi. 6 Hiti hin Solomon in Pakai mitmu’n thilse tah chu anabol tan ahi.

7 Jerusalem solam, Olive molchung ah, aman thet umtah Moab te semthu pathen Chemosh leh thet umtah Ammon mite semthu pathen Molech houna dingin doiphung ana tungdoh tan ahi. 8 Solomon in gamchom numei akichenpi aji ten asemthu pathen ho kom'a kilhaina pumgo thilto abolna diu leh gimnamtui ahalnamna diuvin doiphung ana tundoh peh in ahi.

9 Pakai chu Solomon chunga ana lunghang lheh jeng tan ahi, ajeh chu Pakai Israel Pathen ahenga nivei tah ahung kilah nunga, aman alungthim Pakaiya konna aheimang jeh ahi. 10 Aman Solomon hi pathen dang ahou louna dia kicheh tah a ana gihsalsa ahin, ahinla Solomon in Pakai thupeh chu ana nahsah tapon ahi. 11 Hijeh chun tun Pakaijin akom'ah hiti hin thu asei tan ahi, “Nangin henasasa a ikitepna na suhkeh jeh leh ka Danthu nanit lou jeh in, keiman lenggam hi nang’a konna ka lahdoh a nasohte lah a khat kapeh ding ahitai. 12 Ahinlah napa David jal’a nahinlai sunga hichu kabol louding, nachapa leng vaipoh akon a bou ka lahdoh ding ahi. 13 Ahinlah keiman lenggam pumpi chu ka lahdoh louding, ka lhachapa David jal le ka lhentum khopi Jerusalem jal’a phungkhat vang ka dalhah peh ding ahi,” ati.

14 Hijeh chun Pakaijin Edom mite leng insung a kon'in, Hadad kitipa chu Solomon kidoupi dingin ana tungdoh tan ahi. 15 Kum phabep masanga chu David in Edom mite hi gal anajo ahi. Asepai lamkai Joab chu Israel sepai galmun’a thiho chu avui ding’a anaum den’ah ahi. Hichea aum sung chun Edom pasal ho chu ana that gam’in ahi. 16 Joab leh Israel sepai te chu lha gup sung ana umden u ahin, hiche sung’a chu Edom mite chu ana tha gam’u ahi.

17 Ahin hiche thilso lai chun, Hadad leh apa insunga natong pipuiho chu Egypt lang’a ana jammang’u ahi. (Hiche phat laiya chun Hadad chu chapang cha ahi nalaiye.) 18 Amaho chun Midian adalha uvin Paran ajon’un, Paran ahin mi phabep in ahinbe uvin ahi. Hichun Egypt geiyin akitol’un lengpa henga acheu le aman Hadad gam leh in apen, neh le chah jong anape un ahi. 19 Pharaoh in Hadad chu angailu lheh jengin, aman ajinu Lengnu Tahpenes sopinu chu aji dingin ana pen ahi. 20 Amanu’n chapa khat ahinpeh in amin Genubath asah tan ahi. Tahpenes lengnun Pharaoh leng inpi’ah, lengpa chate toh anavah khanglen in chule ana khoukhah in ahi.

21 David leh asepai lamkaipa Joab chu athitai kiti thu chu Egypt alhun phat in aman Pharaoh heng’ah, “Keima ka gam lang’a kile tang’e neisol tan,” atin ahi.

22 Pharaoh in, “Ipi dingin em? Hiche a hi ipi lhinglel nasah a na inlang’a nakile nom ham?” ati.

“Ima avat aumpoi, hijongleh lungset tah in ka inlam’a nei kile sah tan,” ati.

23 Pathen'in Eliada chapa Rezon jong chu Solomon dou dingin ahin tildoh in ahi. Rezon chu apupa Zobah lengpa Hadadezer a konna hung jamdoh ahi. 24 Hijeh a chu galbol loikhat lah a lamkaija hung pang’a ahi. David in Hadadezer chu gal’a akisatpia ajo phat chun Rezon le amite chu Damascus lama ajam’un hiche achun leng in ahung pang tan ahi. 25 Rezon hi Solomon vaihom achaina geijin Israel ten akidoupi akhoh penin ahung pang peh in, Hadad bangin boina ana sem jengin ahi. Rezon hin Israel te hi ahot lheh jengin, hiti chun Aram gamsunga leng in ana pang den tan ahi.

26 Solomon noiya natong pipui khat Nebat chapa Jeroboam jong hi adouho lah a lamkai khat ahi. Ama hi Ephraim gam Zeredah khopi’a kon ahin anu hi Zeruah kiti meithai nu chu ahi.

27 Hiche hi ama doubol ho hung kipatna thusim chu ahi. Solomon hin inlen pang’a in neocha chaho ana sahphat a chule apa David khopi pal ho chu ana semphat ahi. 28 Jeroboam chu thilbol theitah gollhang khat ahi ti ahin hedoh tan, chule apottho dan ho chu Solomon’in amu doh phat in, Joseph chateni Ephraim leh Manasseh phung’a konna engbolna-a natong ho chung’a vaihom in ana pansah tan ahi.

29 Nikhat hi Jeroboam chun Jerusalem adalhah a ahung potdoh leh Shiloh a konna hung Ahijah themgaopa chun lampia ahung chu amun ahi. Ahijah chu ponchol athahbeh a ana kivonin, amani changseh chu gamlah a ana kimuto lhon'in ahi. 30 Ahijah chun asangkhol chol thahleh chu asattel in boh som le ni ason ahi. 31 Chuin Jeroboam jah a, “Hiche ponhal som hi kilah in, ajeh chu Pakai Israel Pathen'in, ‘Solomon khut a kon’a Lenggam hi lahpeh ing kating, phungsom hi nang kapeh ding ahi,’ 32 Ahinla, keiman Israel gam pumpia konna ka lhendoh khopi Jerusalem jeh leh ka lhachapa David jeh a Solomon hi phungkhat vang kakhen peh ding ahi. 33 Ajeh chu Solomon in keima einungsun in Sidon mite numei pathen Ashtoreth ahouvin, Moab mite semthu pathen Chemosh ahouvin, Ammon mite semthu pathen Molech ahouvin ahi. Aman ka lampi ajui tapon chuleh ka mitmua ka lungdei abol tapon chukitleh apa David in eijui bangin eijui pon ka chonna dan ho leh ka dan sem ho jong anit tapon ahi.

34 Ahinlah keiman tu tadi a hi Solomon a kon'a alenggam hi abon'a ka lahdoh louding ahi. Keiman kana lhendoh, ka lhachapa David in kathu angaija ka dan ho anit jeh in, ama jal in Solomon hi ahinkho lhumkeiya lamkaija kakoi jing ding ahi. 35 Ahinlah achapa a konna lenggam hi ka lahdoh a phungsom hi nang khut a ka pehdoh ding ahi. 36 Achapa hi phungkhat vang chang ding ahi. Hitia chu David chilhah khat vang'in kamin loupina dinga ka lhendoh hiche Jerusalem a hi thaomei vah bang’a vah jing ding ahi. 37 Keiman nangma hi Israel te leng mun’a hi ka tousah ding chuteng nangman lungna chim’a vai nahop ding ahi. 38 Nangin kathu na ngaiya chule ka lunglhaina a neijuiya, ka lhachapa David bang’a ka Dan sem najuiya, ka thupeh nanit jing’a ahileh, Keiman kaumpi jing ding ka sohpa David kabol peh bang’a keiman nang ding’a jong na chilhah te hi amang theilou dinga ka tundoh peh ding chule Israel hi nangma kapeh ding nahi. 39 Solomon chonset jeh a hi keiman David chilhah tehi ka engbol ding ahinlah hichu phat chomkhat a ding bou ahi,” ati.

40 Hijeh hin Solomon in Jeroboam chu tha ding agon ahinla Jeroboam Egypt lengpa Shishak kom'a ajamlut in Solomon thi kahsen aga um tan ahi.

41 Hiche hin Solomon vaihom sunga thil abol ho leh anatoh ho chule achihna ho chu Solomon natoh ho kijihlutnsa Lekhabu a akijihlut sohkei jin ahi. 42 Solomon in Jerusalem ah kum somli vai ana hom e. 43 Ama athi phat in apa minna kisah David khopia ana kivui tan ahi. Chu jouvin achapa Rehoboam chu ama khel in leng ahungchang tai.