SAMUEL
LEKHABU KHATNA
Samuel Lekhabu Khatna Sung Thu Umdan
Samuel lekhabu tenia hin, tukhang idin mun utoh kitoh in thil phabep aum in ahi. Hatsahna le lungsatna ato hou nasimdoh akon, nangman jong thil tampi nalam doh thei ding—chule hinkhoa hin Pathen beijin ima ahithei poi, ti nahetdoh ding ahi. Chujongleh Pakai, Pathen hi amite chunga akitah jinge, ti Samuel lekhabu khatna hin aphong doh e.
Hiche lekhabu nasim akon hi, Isralete chunga vaihom lamkai chu Pathen mi ham ahilouleh Pathen mi hilou ham ti, nahetdoh ding ahi. Hiche lekhabu hin, Saul lengpa le David, lamkai ahina lhon akibah louna aume ti kicheh tah’in aseijin ahi. Hinlah anitah lhon’a Pathen thaonu chang ahilhon in, chule thil tampi jong atongdoh lhon in ahi. Chujongleh anitah lhon in alosam kitlhon in, chonset achun alhalut lhon tai. Hiche lamkai teni kah’a akikheh nalhon hi ipi pen ham? Saul chun achonset asel mang kigon, David chun kisih a lunghei ding atin ahi.
Koima achamkim aumpon, ibonchaovin ilhasam soh keijun, ahin hiche lhahsamna chu hinkhoa thusim achaina ahipoi. David banga lungput dalha’a Pathen henga kile kit ding phajo ham, ahilouleh Saul banga mihem maivea chonset phongdoh lou ding phajo ham? Hiche teni lah’a hi, hoiche pen nalhen ding ham? Hiche ivetkah teniuva kon hi hoiche nalhen’a chule hoiche pen napeldoh ding ham?
Lekhabu Jihpa Chule Akijih Kum
Koipen in ajih ham ti, akimin phah pon ahi. Hinlah Samuel themgao, Nathan le Gad in hiche thucheng jouse hi anakhol khom uva (1Chro. 29:29), hichu Samuel Khatna le Samuel Nina’a kigom khom ahi.
Hiche lekhabu hi 925 BC vel’a kijih din ginchat ahin, chule solam le lhanglam kihop khen jou 930 BC vel’a ana kijih ahi.
1
Elkanah Le Ainsung Mite
1 Masang laiyin Elkanah kiti mikhat Ramah kho thinglhang gam molsang Ramathiam Zophim mun’ah anacheng in ahi. Ama chu Jeroham chapa, Elihu chapa, Tohu chapa, Zuph chapa, Ephriam mi ahi. 2 Elkanah in ji ni aneiyin, Hannah le Peninnah ahi. Peninnah in cha aneiyin, ahin Hannah vang'in aneipoi. 3 Elkanah hi kumseh leh Shiloh a Pakai van gam sepaite henga gan kilhaina maicham semdin acheyin ahi.Hiche lai chun Eli Pakai thempupan chapa ni aneiyin ahi, amani min chu Hopni le Phinehe ahilhone. 4 Elkanah hin gan kilhaina abolni tengle achan dingdol sachan chu Peninnah le achate apeyin ahi. 5 Chule Hannah angailut jeh chun, Pakaiyin anaobu akhapeh jeh chun, sachan chan khat bou apeyin ahi. 6 Chumale Pakaiyin Hannah chu anaobu akhapeh jeh chun, Peninnah in jong Hannah chu noise tah in alunghan han nadin totnopnan abolyin ahi. 7 Kumlhun seh leh abang bang ahiyingin-Hannah Pakai hou dinga Houin'a achetengle Peninnah kitinu hin phin lunghang jin , hijeh chun amanu akapin anjong aneji tapon ahi. 8 “Ipi jeh’a naka ham, Hannah?”
Elkanah in adongin,
“Ibola an nelouva umah nahim? Chule ibola lungkhama um nahim? Kei neinei hime-chapa somkhat neiho sanga kaphatchom joh louham? ati.
Hannah Chapa Dia Ataona
9 Amahon Shiloh’a gan kilhaina anneh, twidon achaiphat’un, Hannah akipatdoh in taoding in achetai. Eli thempu chu Pakai houin khombul khatna touna chunga touva ahi. 10 Hannah vang chu lhase beh seh jengin, Pakai henga ataovin, lhasetah in akapjah in ahi. 11 Chule amanun kitepna khat aneiyin, “O Van gam Sepaite Pakai, gentheiya ka kana neihin velhin lang kataona neihin ngailhah peh inlang ‘chapa khat neipetan,’ ” ati. ✡ Minbu 6:5 12 Amanu Pakai henga ataopet’in Eli thempun ane phunchu ana mulhin ahi. 13 Anephu achaloh chu amun, ahinlah ataogin aw chu ajapoi, ageldan in amanu hin ju adonkham hinte ati ahi. 14 Aman Hannah jah’a “Hilai munna hi jukham puma nahung ham? Najukham chu paidoh loijin,” ati. 15 “Kahipoi, kapu!” tin adonbut’e, “Keiman ju kadonpoi, chule khamnathei ho jong kadonpoi, ahinlah kei hi numei genthei chungnung kahi, Pakai agsunga hi kahinna pumpia thuseijoh kahibouve,” ati. 16 “Keima numei phalouvin neigel hihbeh in! Ahinlah lung genthei puma taojing jengjoh kahibouve,” ati. 17 Hiche chung thu ahin Elin hitin ana seipeh in ahi, “Lungmongin chetan,
Israel Pathen in nathilthum jouse chu nasan peh intin phatthei naboh hen.”
18 Hannah in jong, “Oh hepu kakipah e!”
atin, akinunglen an anepantai, alungkham tapon ahi.
Samuel Ahungpen Le Akilhandohna
19 Ajingkah khovah matah’in ainsung pumpi athouvun, Pakai houkit dingin ache tauve. Chujou’in ain’u Ramah ah ahung kile kit tauvin ahi. 20 Chule Hannah chun aphat chan, naosen pasal khat aneitai. Amanun jong amin Samuel asahtai, ajeh chu “Ama ding’a hi Pakai koma kathum ahi,” ati. 21 Akum kit’in Elkanah le ainsung mite jouse kum kichaiya gan kilhaina-a Pakai hou ding in akitol kit tauve. 22 Ahinlah Hannah chu anache tapon ahi. Ainneipu komah hitin aseiyin, “Naosen aletdom kahsen ngah hitin kumkit tengle keiman hinpui ingting, imatih chana dingin Pakai toh umden tante,” ati. 23 Nasei chu aphaselle tin Elkanah in pha asatai. “Tutadin hichea hin uminlang, Pakaiyin nakitepna bang in napanpi hen.” Hijeh chun amanu inah aumin, naosen aletdom kahsen aumpin ahi. 24 Chuin naosen ahunglet domphat in, Hannah in Shiloh a pon-in ah ahinpuiyin ahi. Amahon bongchal kumthum lhingsa khat toh ahinpui thauvin, changbong neldisel Ephah dimkhat toh apon lengpitwi peng thei khat dimset toh akidop’in naosen chapang chu Shiloh khoa Pakai houna in ah ahin puilut tai, naosen chu chapang chabou ahi nalaiye. 25 Bongchal atha jou phat’un amahon naosen chu Eli thempu kom ahin puilut tauve. 26 “Kapuu, neigeldoh em?” tin Hannah in adong in ahi. “Keima kum tampi hilai muna Pakai henga anatao jing numei nu chu kahi,” ati. 27 “Pakai koma hiche chapa hi eipeh dia ana taojing kahin, Pakaiyin kataona eidonbut pen tan ahi,” ati. 28 “Tun keiman amahi Pakai henga kahin pehdoh ahitai. Ahinkho lhumkeiya dinga kapehdoh ahitai. Hichun amahon hikoma chun Pakai chibai aboh tauve.
DRAFT COPY