1 Lhakhat jouvin Ammon mi Nahash lengpa chun Israel khopi Jabesh-gilead dou dingin ahung kon'in ahi. Chuin Jabesh khoa cheng mijouse chun Nahash jah a, “Keiho toh kitepna khat sem uhitin chule nasoh kahi diu ahi,” tin atao tauve.

2 Hichun Nahash in, “Aphai, ahinla aumdan khat sem uhite, Israel pumpi kajumso theina dia namit changu jetlam cheh ka kaldoh ding ahi,” ati.

3 Hichun ama hon, “Achutile nisagi nei ngah un, Israel gamsunga mi sol uvinge, eikithopi diu koima ahung louva ahileh naheng uvah lut tauvinge,” tin Jabesh upahon adonbut tauve.

4 Thupoho Saul umna Gibeah ahunglhun phat un mijouse mitchang kaldoh ding thu ajahdoh phat in khopi sunga mijouse akapjah jeng tauvin ahi. 5 Hiche pettah a chu Saul chu louva konna ganchahon nunga hunga ahi, chule khopi ahunglhun phat in, “Ipi thilsoh uma hitam? Ipi jeh a mipite hitobang tah a khu kap a hiuvem?” tin adongin ahile ama hon Jabesh thupole ho thu chu aseipeh tauve.

6 Chuin Saul’in chuche thusoh ajah phat in, Pathen a konna lhagao achungah ahung chun, alung hanna chu ahung koujah jengin ahi. 7 Chuin bongchal ni athat in, achanbong bongin, Israel gamkai jousea ahom dingin thupole ho asol'in, “Samuel le Saul gal’a jui louva galkon lou jouse abongchal jouse hitia hi kichanpan ding ahi!” tin gihna jong aneijin ahi. Chule Pathen'in Saul lunghan chun mijouse akichat sah in, kilungkhat tah in ahung kikhom sohkeiyun ahi. 8 Chuin Saul’in Bezek mun’ah akhom khomin ahile Israel a kon mi 300,000, chule Judah a kon mi 30,000 akhom doh in ahi.

9 Saul in thupole ho chu Jabesh-gilead miho henga, “Jing sunkim le kithopina namu diu ahi!” tin thu ale thot in ahile hiche thusoh ajah phat un, khopi sungah kipana lentah ahung lhungin ahi.

10 Jabesh mihon agal mite ho kom'ah “Jing teng naheng uva kahung diu ahin, kachung uva nabol nom chan nabol theiju ahi,” tin aseipeh tauvin ahi. 11 Ahin, ajing jingkah matah in Saul ahung lhun’in, asepai te hopthum in ahom khen’in, khovah in amelma te ngahmun adelkhum’un, hiche jingkah sungse chun, Ammon mite athat in, ahingdoh chasun akithe cheh uvin, achang changin ajammang tauvin ahi.

12 Chuin mipi hon Samuel jah a, “Ipi jeh a Saul ichung uva leng chang ding ham? tia seiho chu hoilai um gam'u hitam? Neipedoh un, that gam uvinge!” tin angeh un ahi.

13 Ahin Saul in adonbut in, “Tunia hi mi khatcha kithat louding ahi, ajeh chu tuni hi Pakaijin Israel ahuhhing nikho ahi,” ati.

14 Chuin Samuel in mipi jah ah, “Hungun Gilgal ah cheu hitin, ilengpau gaphongdoh kit uhite,” ati. 15 Chuin mipite jouse chu Gilgal ah acheuvin, Pakai masang ah Saul chu Leng in asemdoh tahbeh tauve. Hiti chun Pakai angsung'ah chamna, kilhaina thilto gantha abol uvin, Saul jong Israel mite jong hapan akipah sohkei uvin ahi.