1 Judah gamsung Socoh mun'a chun Philistine mite galsat dingin akikhom’un, chule Socoh le Azekah kikah’a Ephes-dammim achun ngahmun asem tauvin ahi. 2 Chuin Saul le Israel te jong akikhom’un, Philistine te dounan Elah phaicham panga ngahmun akisem’un ahi. 3 Philistine te chu lhaangkhat ah akigol’un chule Israel te jong chu lhaangkhat ah akigol’un chule akikah uva phaicham khat in akhen un ahi.

4 Chule Philistine te mihat tah Gath khopia konna hungkon, amin Goliath kitipa chun Israel te sat dingin Philistine te ngahmun a kon'in ahung potdoh in ahi. Ama chu feet 9 val jenin asangin ahi! 5 Chule aman sum-eng lukhuh akhuh in, sum-eng a kisem ompho pounds 125 a gih aki-ah in ahi. 6 Akeng teni jong sum-eng’a kitomjol ahin, chule alengkouva ama sum-eng tengcha akipoh chu kitungdoh peh ahi. 7 Atengcha long chu tumbi tejen ahin, atengpeh jong thih jeng agihdan chu pound 15 a gih ahin, apho chu mikhat poh ahi.

8 Goliath a dingin Israel galsat miho jah a ahin samin, “Ipi dinga galsat dinga hung kigola nahiuvem, keima Philistine mihatpa kahin, nangho Saul sohte mai-mai nahiuve, ei kisatpi ding mikhat hung kilheng doh un,” atin ahi. 9 “Aman keima eitha le nasoh u kahi diu, ken ama katha le keiho soh nahi diu ahi,” ati. 10 “Tunia hi Israel galsat ho kachou nahiuve, kakisatpi ding pa chu hin soldoh un,” ati. 11 Chuin Saul le Israel mite jousen Plilistine mipa thusei ajah phat un, akicha lheh jeng tauvin ahi.

12 David kitipa chu Judah gam Bethlehem khopia Ephrah mi Jesse chapa ahin, hiche lai chun Jesse chu ateh lheh jeng tan chule aman chapa get jen aneijin ahi. 13 Jesse chapa alen thum Eliab, Abinadab, chule Shimea ho chu Philistine te sat dia Saul lengpa sepai a pang ahiuve. 14 David chu achate lah a aneopen ahi. David ute thum ho chu Saul sepaiho toh umkhom’a ahiuve. 15 Ahin David chu Saul inpia konna apa kelngoi chin kithopi dia Bethlehem a hung kile kitji ahi.

16 Ni somli sungin jingkah, nilhah seh leh Philitine mihat pan Israel sepai ho ahin naiyin achou jingin ahi.

17 Nikhat Jesse in David jah ah, “Hiche pucha a chang kanpoh hile changlhah lhon som hi choijin lang gangtah in na ute gapen. 18 Chule hiche bongnoiha a kisem lhon som hi sepaiho lamkaipa pen. Na ute iti nauvem gaven lang, thu nahin nungpoh kit ding ahi,” tin ana sollin ahi. 19 David ute ho chu Saul to umkhom'a ahiuvin, Israel sepaiho chu Elah phaichama gal mun’a um ahiuve.

20 Chuin David in akelngoiho chu avetup din mi khat angansen, jingkah matah in apan athupeh bangin thil ho chu apon, achen ahile sepaiho galsat dinga ngahmun dalha dinga akigot uva a-ao laitah un ngahmun chu agalhungin ahi. 21 Israel te le Philistine sepaiho gal kisat dia kidinte-a kimaitoa akigol laitah un, 22 David in thilkeo chingtup pa henga athilpoh ho chu adalhan, gangtah in a-ute ho chibai agabol tai. 23 Aman a uteho akihoulimpi laitah in, Gath mi Philistine mihatpa chu Philistine sepai ho lah a kon'in ahung potdoh in ana seingaiji bangin asamin, Israel mite chu ahin choukit tan ahile, hichu David in ajatan ahi.

24 Chuin Israel sepai ten hiche mipa chu amu phat un akicha behseh jengun ajam tauvin ahi. 25 Hichun alah uva mikhat in David jah a, “Hiche mihatpa chu namu em? Aniseh leh hitia khu hung potdoh a Israel sepai te achou-chou ji ahi, koi hileh ama thatpen pen khu lengpan kipaman lentah apeh ding, achanu khat jong aji ding’a apeh ding, chule Israel ten kai peh dingdol a kon'a jong a onthol sah ding ahi,” ati.

26 David in akimvel'a ding Israel sepai ho jah ah, “Hiche cheptanlou Philistine mahatpa that a, Israel mite achouna ngahsah mi chun ipi amu ding ham? Ipi hile iti hiche cheptanlou Philistine pan hingjing Pathen sepai te ajumso ding ham?” ati.

27 Chuin miho chun adonbut un, “Henge hiche mipa that pen-pen chu kipaman akisei chu peh ding ahi,” atiuve.

28 Ahinlah David ute ho lah a alenpen Eliab chun David thusei ajahdoh phat in alung ahang in, “Hichea hi ipi nahung bolle ham? Na kelngoi hon ho chu ipi itihen nati ham? Nakiletsahna le na jonchih na chu kahe nai, hichea kidouna ho venom mai maija hunga nahi bouve!” ati.

29 Hichun David in, “Ken tua chu ipi kabol em? Thudoh kagah nei mai-mai ahi,” tin adonbut in ahi. 30 Chuin amahoa kon'in adang ho langah akihei kit in athudoh ma-ma adoh a ahile, ama hon jong asei ma-ma aseikit un ahi. 31 David thudoh chu Saul lengpa kom agalhut un ahile Saul lengpan jong aheng’a ahin pui diuvin thu apetan ahi.

32 “Hiche Philistine mipa chunga khun boi tahih un, kache ding kaga kimaitopi ding ahi,” tin David in Saul jah a aseijin ahi.

33 Saul in, “Angol nahim! Nangman hiche Philistine mihatpa nasat a najona ding lampi aum theipoi, nangma chapang cha bou nahin, ama akhangdon laiya kipatna galsat mi ahi,” ati.

34 Ahinlah David in, “Kapa kelngoi ho leh kelcha ho jong kana vetkol ahin, nasohpa hin kapa kelngoi kana chinna a chun keipi bahkai le vompi ahunga kelnou ho ahung lhohmang ding got tengleh, 35 anung kadellin, kakidalpin, akamsung’a kon'in ka huhdoh jin ahi, chule keima tha dia eigot tengleh akha ah kaman in kathat jitai. 36 Keipi le vompi ani nia hitia chu kabolji ahin chule tua jong Philistine chep tanlou pa jong chutia chu kabol ding ahi, ajeh chu aman hingjing Pathen sepai ho ajumso jeh a hitia chu bol ding ahi. 37 Pakai keipi bahkai le vompi khutphanga konna eihuhdoh pa chun tunia jong hiche Philistine mihatpa a konna eihuhdoh tei ding ahi, ” atin boltei agoi.

Hichun Saul in achaina in lunggel lhahna aneijin, “Aphai nakigot bang chun boltan chule Pakaijin naumpi jing tahen,” ati.

38 Chuin Saul in agalvon David apen, alukhuh sum-eng a kisem akhuhpeh in, thih sangkhol a-ahpeh tan ahi.

39 Hichun David in agalvon chunga chun achemjam akoijin, kal khat agah son le galvon ho akivon khahlou jeh in, achethei tapon ahi. Hijeh chun aman Saul jah a,

“Hiche ho pumin chethei ponge, ajeh chu hiche ho hi kamang theipoi,” atin, asut lhatai. 40 Hichun David in vadung songchang jolsel chang nga akilopan, akelngoi chinna sakhao neovah akikon, chuin akelngoi chinna tenggol le sailungchang kapna gophel akichoijin, Philistine mihatpa umna phaicham ajontai.

41 Goliath jong ahung potdoh in David lam ahin jontai chule agalvon popa chu ahung masan ahi. 42 Goliath in David chu phatah a avettoh phat in, chapang mel-hoi cha bou ahinah laijeh in, asit behseh jeh in alung ahang tai. 43 David jah a lunghang tah in, “Keima uicha kahia mol kichoija kaheng'a hung nahim?” ati. Hichun Philistine mipa chun, apathen ho min pan in David chu agaosap tai. 44 Goliath in David chu achouvin, “Hilam ah hungin, keiman natahsa chu vachate le gamsa te kapeh ding ahi,” atin ahi.

45 David in Philistine mipa chu adonbut in, “Nangma chemjam le tengcha choiya hung nahin, ahinlah keima vang van gam sepai galsat te Pakai min'a hung kahi. 46 Tunia hi Pakaijin najo ding, keiman nang katha a nalu katan ding, natahsa thisa chu vachate le gamsate kapeh ding chule leiset pumpin Israel Pathen khat aum'e ti ahet diu ahi,” ati. 47 “Chule hichea hung kikhom jousen Pakaijin chemjam le tengchan ahuhhingpoi ti ahet dingu ahi. Ajeh chu galsat hi Pakaiya ahin, aman nangho kakhut a eipehdoh diu ahitai,” ati.

48 Goliath ahung kipatdoh a David henglam ahin jot phat in, David chu kintah in Philistine mihatpa toh kisuto dingin alhaisuh tan ahi. 49 David in akhut in asakhao sung asoh in, song chang khat aladoh in, ah-songse’a chu asea ahile, Philistine mipa chalpang ah achun, songchang chu alut in, Goliath tol-lhang'ah alhutan ahi.

50 Chuti chun David in chemjam pang louhellin, songchang khat seh le ah-songse in Goliath ajoutan ahi. ✡2 Samuel 21:19 51 Chuin David in adellut paiyin, Goliath chemjam chu asatdoh in, ama chemjam ma-ma chun alol atan tan ahi.

52 Chuin Israel te le Judah miho akipat un, a-aovun, phaicham le Ekron kotpi aphah kah seuvin Philistine mite nung adel’un ahi. Chule Philistine mipi ho chu Shaaraim lam lhong lhungin thilong akijam thang’un, Gath le Ekron chan geijin athilong u chu alum thang sohkei jengin ahi. 53 Chuin Israel chaten Philistine mite anungdel uva kon'in ahung kinung leuvin, angahmun hou chu asumang’un achom tauvin ahi. 54 Chuin David in Philistine mihatpa luchang chu alan Jerusalem ah ahin potai; ahin galvon vang apon in’ah akoitai.

55 David Philistine pa sat dinga akondoh chun Saul in agalvon popa Abner jah ah, “Hiche gollhang pa khu koi cha ham? tin adongin ahile

Abner in jong, “Atahbah in kahepoi,” tin ana donbut e.

56 Hichun lengpan jong, “Aphai, koiham hinkhol chen’in,” ati.

57 David in Goliath ahin tha jouva ahung lhun in, Abner in Philistine mihatpa luchang chu Saul kom'ah ahin lhut tan ahi. 58 Hichun Saul in, “Gollhang, napa koiham nei seipeh in,” atin ahile

David in adonbut in, “Kapa min Jesse ahin, Bethlehem a um kahiuve,” ati.