1 Saul in achapa Jonathan le asohte ho jouse toh David thana ding lunggel anei khompi tan ahi. Ahinlah Jonathan le David gol phatah ahi lhon jeh chun, 2 Jonathan in David jah a, “Kapan, jing jingkah le tha ding nagoi, chingtheiyin, loulai sunga kiselna ding mun khat kihol’in,” tin apa thilgon ho jouse chu aseipeh tan ahi. 3 “Chutengleh, keiman kapa chu munchom khatna puidoh ing kating, nachung chang thu kihoulimpi ing katin, kamudoh chengse chu nang ka seipeh ding nahi,” tin aseipeh kittan ahi.

4 Ajing jingkah in, Jonathan in David chung chang thu apa kom'ah aphatna le athilpha bol jeng aseipeh in ahi. Chule Jonathan in apa kom'a chun, “Lengpa chu asoh David douna a chonse louding ahi chule David in nangma dounan thil imacha abolpoi, aman ajochanin aphat jousen nakithopin ahi,” ati. 5 “Pathen thahatna jal'a Philistine mihatpa ana tha a Israel te dinga gal lentah eina jopeh u phatlai chu nasuhmil hitam? Hichea thilsoh chung changa chu nangma na-na kipa dehset hilou ham? Achutia ahileh imacha bolselou, mona neilou David chu ipi bolla tha ding nagot ham? Ajeh imacha aumpoi!” ati.

6 Hijeh chun Saul in Jonathan thusei chu phatah in angaijin chuin akihahsel’in, “Hingjing Pakai min pan’a kasei ahi, David chu kithat louding ahi,” ati.

7 Hiche jou chun Jonathan in David akouvin, thil ijakai aseipeh tan ahi. Chule aman David chu Saul kom'ah apuijin, amasa bangin David in leng inpi’ah na atong kit in ahi.

8 Chuin Philistine tetoh gal kisatna aumkit in, David in asepai te akipuijin Philistine tetoh akisat in, amaho nasatah in athat in ahile, amaho ajam tauve.

9 Ahinlah nikhat hi Saul in’ah atouvin tengcha akhut ah akichoijin ahile, Pathen a konna hungkon lhagao dihlou chu hetman louvin achungah ahung chukit in ahile, David in angai bangin semjang asai laitah in, 10 Saul in David chu atengcha choiya chun akhon, bangtoh khobeh ding agotna ahile, David in ana otdoh in, atengcha chu bang ah akibut lut jengin, hiche jan chun David akiseldoh tan ahi.

11 Chuin Saul in David ain langa avelhi dingin asepai te asol'in ahi. Asepai te jah ah, ajing jingkah teng ain a konna ahung potdoh tengleh natha dingu ahi, tin thu apen ahi. Ahinlah a inneipi Michal in David jah a, “Tujana nakiseldoh louva ahileh, jing jingkah leh nathi ding ahitai,” ati. ✡Labu 59 12 Chuin a inneipi Michal in kotcha neo langa kon'in akhai lhan, ajamdoh in, ahoidoh tai. 13 Hichun amanun milim khat alan, alupna ah ponsa khat asil peh’in, asam dingin kelcha mul asempeh in ahi.

14 Chuin sottol le ho ahung uva David mat ding agot uleh, a inneipin adam hih in athou joupoi tin alep in ahi.

15 Ahinlah Saul in asottol leho jah a thu apen, “Alupna a kon'in hin kaidoh un, katha ding ahi,” atin ahi. 16 Ahin alupna a konna kaidoh ding agot uva aponsil chu agah hodoh uva ahileh, milim kisemthu, alua kelchamul chu amudoh tauve.

17 Hijeh chun Saul in Michal jah a, “Ipi bolla hitia hi nei joulhep a, kagalmi keija konna na jamdoh sah ham?” atin ahile,

Michal in jong, “Aman nei kithopi louva ahileh katha ding nahi eiti jeh a kabol ahi,” tin ana donbut in ahi.

18 David ajamdoh in Ramah khopi ah achen Samuel to akimuto in, chule Saul in achunga itobang tah a na atoh ham ti aseipeh tan ahi. Samuel in David akilhonpin Ramah gamsunga Naioth mun’ah acheng tan ahi. 19 David Ramah gamsunga Naioth mun'a aum'e ti thulhut Saul’in ana jatan ahi. 20 Hichun aman David man dingin sottolle ho asoltan ahi. Ahinlah amaho agalhun phat un, Samuel lamkaina a themgao phabep in gaothu asei pet u atohkha uvin, Saul sottolle ho chu Pathen Lhagao achung uvah ahung chun, ama hon jong gaothu aseipan tauvin ahi. 21 Chuin Saul in hichu ajahdoh kit phat in, sottol dang ho asolkit in ahileh, ama hon jong gaothu aseiden kit tauvin ahi. Athumvei chan nan jong angai-ngai ahiuve. 22 Chuphat in, Saul ama tah Ramah kho jonin achetai, Secu a um twikul lentah phung ahin phah in, “Samuel le David hoiya um lhon em?” tin adongin ahile,

“Ramah gam'a Naioth mun ah aum lhon'e,” tin mi koiham khat in ahin donbut in ahi.

23 Ahin Ramah gam'a Naioth ajot chun, lampi ah Pathen Lhagao Saul chungah ahung chun, Naioth alhun kahsen gaothu aseijin ahi. 24 Saul in apon abotkeh in, akeochang in tollhang ah alumin, Samuel angsung’ah sun nilhum jan khovah in gaothu asei in ahi. Chuin mihon aveuvin, adatmo uvin, “Iti dana, Saul jeng jong themgao lah a jao hitam?” atiuvin ahi. ✡1 Samuel 10:11,12