1 Judah a lengpa Jehoshaphat bittah a in alhun chun, 2 Hanani chapa themgao Jehu chu lengpa toh aga kimuton ahi. “Miphalou panpi leh Pakai doujing ho langa pan lah hi dih nasah hinam?” tin lengpa chu adongin ahi. “Hijeh chun na chunga Pakai alunghang tan ahi. 3 Ahijeng vang'in na chunga hin na phatna phabep akimudoh in ahi, ajeh chu nangin mipi hon ana hou u Asherah doilim thinga kisem ho na paidoh in chuleh na lungthim in Pathen lung deilam holnomna na neijin ahi,” ati.

4 Hiti hin Jehoshaphat hi Jerusalem a apansan, chule ama hi akipatdoh in Beersheba a kon'in Ephraim lhang geijin aga cheuvin, hiti chun mipi ho chu apu apa teu pathen henga apuilut kit in ahi. 5 Hiche jou chun Jehoshaphat in kul kikai khum khopiho jousea chun, thutan vaihom ho akoisoh keijin, 6 aman thutan vaihom ho chu ahilchah in, “Nakin natoh nauva hin chingtheijun, ajeh chu nangho mihem adia thutan nahi pouve, Pathen dinga joh thutan nahiu ahi. 7 Pathen na jana neitah le chingthei tah in tongun, ajeh chu I-Pathen uhin joulhepna, langneina chule nehguh bol hi athet ahi,” ati.

8 Jerusalem achun Pakai dan sukeh ho chunga thutan dingin, Jehoshaphat in Levi ho leh thempu ho chule Israel mipa ho lah a athupi cheh Jerusalem a hung kile ho chu apansah in ahi. 9 Hiti chun aman thupeh aneijin: “Nanghon Pathen jana neitah leh lungthim kitahna neija thu natan diu ahi. 10 Khopi mi nachen khompi khopi khat a konna tolthat thu hihen lang dan khattou leh thupeh khattou sukeh hijongleh, Pathen douna a chonset abol louna dinga chingthei tah a pan alahna dingin thupeh aneijin ahi. Hitia chu nabol louva ahileh, nachung uva Pathen lung hanna chuding ahi. Amavang natoh diudol phatah a natoh uva ahileh themmo nachan lou diu ahi,” atipeh e.

11 “Houlam thudol jousea thempulen Amariah hi thaneipen hi ding ahi. Judah gam vaipo Ishmeal chapa Zebadiah hi mipi ho lah a thutan dia athaneipen hi ding ahi. Levi te hin thu kitanna jouse hi iti chelhah hinam ti avetsui diu ahi. Hangsan tah in thu kapeh hi tong doh un, Pakaijin thudih a thu kitanna jouse apanpi ding ahi!” ati.