1 Judah mipi ten Josiah chapa Jehoahaz chu Jerusalem'ah leng chang din thao anu tauve.

2 Jehoahaz hin Judah te lengmun ahinlo chun kum somni le thum alhing tan ahi. Ama hin Jeruselam'ah lhathum bou vai anahom'e.

3 Egypt lengpa Neco in gal-hingin ana man in chuleh Judah ten dangka pounds 7,500 chuleh sanapounds 75 kai apeh diuvin thu apen ahi.

4 Egypt lengpan Eliakim chu atungdoh in, Jehoahaz sopipa ahin ama chu Judah le Jerusalem'a aban a leng ding ahi, chule aman amin Eliakim chu Jehoiakim in akhelpeh in ahi. Chuin Neco in Jehoahaz chu Egypt songkul'a akhum tan ahi. ✡Jeremiah 22:11,12

5 Jehoiakim chu Judah te lenga ahung pan chun kum somni le nga alhing tan, aman Jerusalem'ah kum som le khat sung vai apon ahi. Ama hin Pakai a Pathen dounan chonset ana bollin ahi. ✡Jeremiah 22:18,19; 26:1-6; 35:1-19

6 Babylon lengpa Nebuchadnezzar chun Judah te chunga gal ahin bollin Jehoiakim chu amanin thih kollin Babylon geijin akaijin ahi. ✡Jeremiah 25:1-38; 36:1-32; 45:1-5; Daniel 1:1,2 7 Nabuchadnezzer chun Hou-Ina kon'in thil tamtah jong apodoh in, Babylon a lengte inpia akoiyin ahi.

8 Jehoiakim thilbol ho jouse leh kidah umtah thilse ana bol ho jouse chu Israel Leh Judah Lengte Thusimbu a akijihlut sohkeijin ahi. Ama hi achapa Jehoiachin in akhel'in leng ahung changin ahi.

9 Jehoiachin Judah te leng ahung chan chun kum som le get ahung lhing tan, chuleh ama hin Jerusalem'ah lha thum leh ni som vai anahom'in ahi. Ama jong hin Pakai dounan chonset ana bollin ahi.

10 Chavang ahung lhun phat in lengpa Nabuchadnezzer in Jehoiachin chu gal-hingin ana manin Hou-In sunga thil manlutah ho Babylon a apolutnin ahi. Hiti chun Nabuchadnezzer in Jehoiachin pangah Zedekiah chu Judah le Jerusalem chungah vaihomin ana pansah in ahi. ✡Jeremiah 22:24-30; 24:1-10; 29:1,2; Ezekiel 17:12; Jeremiah 37:1; Ezekiel 17:13

11 Zedekiah Judah te lenga ahung pan chun kum somni le khat alhing tan, ama Jerusalem'ah kumsom le khat ana vaihomin ahi. ✡Jeremiah 27:1-22; 28:1-17 12 Aman Pakai dounan chonset ana bollin Pakaiya konna thu phondoh ho jong ana nahsah pon ahi. 13 Zedekiah chu Nachadnezzer lengpan ama thuneina noija kitah a pan lajing dinga Pathen min'a ana kitep sah ahin, ahivangin ama dounan na ahin tong tan ahi. Ama hin Israel Pathen Pakai anga kilekitna kisuhnem ding ana nompon ahi. ✡Ezekiel 17:15

14 Hiche tilouvin jong Judah lamkaiho leh thempu ho chuleh amipi teu chun avel uva cheng namdang ho chonset bol ajuijun doiphung ahouvun Pakai ama tah in ana suhtheng Hou-In jong chu ana suboh un ahi.

15 Apu apa teu Pakaijin amaho gihsal dingin athemgao hou ahinsol jingin ahi. Ajeh chu aman amite Hou-In chu athenga aum ding akhohsah ahi. 16 Ahinlah ama hon Pathen thuhil chu anahsah pouvin athupeh adoudal un athemgao ho anuisatnun Pathen lunghanna achung uva achuh a ahoidohna diu abeihel tokah in Pathen doumah abol'un ahi.

17 Hijeh hin Pakaijin achung uvah Babylon lengpa anokhum sah jin ahi. Lengpan Judah khangthah te ho chu Hou-Insung geijin athatnin ahi. Aman khangdong leh tehse numei pasal, adam le adamlou khotona aneipon ahi. Pathen'in lengpa khut a hin apedoh gamun ahi. ✡Jeremiah 21:1-10; 34:1-5 18 Babylon lengpan Hou-In sunga thil manlu tah-tah ho lengpa leh anoija natong lamkai ho nei le gou ho jouse chu achom'in Babylon langah akinung letan ahi. 19 Aman Hou-In leh khopi chu ahallhan, leng inpi ahin anei agou ho jouse ahin achom'in khopi pal jong avolhu jengin ahi. ✡1 Lgt 9:8 20 Aman mipi ahingdoh ho jouse chu Babylon a atollut in hiche achun ama hon ama leh ason apah ho geijin soh a ahin man diuvin Persia lenggam ahung kile doh kahsen akoijin ahi.

21 Pathen'in Jeremiah themgao kom'a ana phondoh: “Agam chu kum somsagi sunga ahomkeova hung kijam ding – cholngahni ana nitlou nau kumho chu ana sahdoh sah got ahi. ✡Jeremiah 25:11; 29:10

22 Persia lengpa Cyrus chu leng ahung chan kum masapenin Pakaijin themgao Jeremiah ana seidoh sah chu ahin guilhun sah in ahi. Aman Cyrus chu hiti hin thupeh ahin neisah in hichu agamsung pumpia kithong tah a simdoh tho dingin ana jihtho in ahi: