1 “Nikhat David in adongin, Saul insung mite khat beh ahing naum nalai uvem? Jonathan jal'a keiman khotona kamusah thei ding tin adongin ahile, ✡1 Samuel 20:15-17 2 Saul insunga soh natong ho lah a mi khat anaum khan ama chu amin Ziba akiti; Hichun lengpan jong amapa chu adongin, “Nang hi Ziba nahi hinam?” tin adongin ahi.

Hichun Ziba in jong adonbut in “Henge, keima Ziba chu kahinai,” ati.

3 Chuin lengpan adongin, “Saul insung mi khat beh ahingdoh um nalai louham? Aum leh keiman Pathen mi khotona chu kamusah nom uve,” ati.

Ziba'n jong lengpa ahin donbut in, “Henge, Jonathan chapa khat aum nalaije. Ama hi akengphang te ni chatmoa kibai ahi,” atipeh e. ✡2 Samuel 4:4

4 Chuphat in lengpan jong, “Ama chu hoiya umham?” tin ahin dong tan ahi.

Ziban lengpa chu aseipeh in, “Ama chu Lodebar khoa Ammiel chapa Makir in a um ahi,” ati.

5 Hichun David lengpan mi asolin, ama chu Makir in'a kon'in aga puidoh sah tai. 6 Hiti hin Saul tupa Jonathan chapa Mephibosheth kitipa chu David kom'a ahungin alu kunin jana apen ahi. Chuin David chun ahoupin, “Mephibosheth, atileh;

Mephibosheth in jong, “Keima nasohpa kahi,” tin adonbut’e.

7 Hichun David in akom'a hitin aseiye, “Kicha hih in, keiman napa Jonathan jal a nang hi kakhoto ding, chujongleh khatvei napu Saul nei le gou ana hikhasa jouse chu aboncha nangma kapeh kit ding nahi; chule nangman hiche leng ankong phunga hi keima toh an naneh khom ding ahiye,” ati.

8 Hichun Mephibosheth jong chun jana apekit in aseikit e, “Nasohpa kei hi ipi kahiya nangin hiche uicha thisa tobang chunga hi khotona nei musah khoh ding ham?” atitai.

9 David lengpan Saul sohpa Ziba chu akouvin akom'a hitin aseipeh’e, “Ipi hijongleh Saul thilkeo anei jouse leh ama insung mite nei jouse chu aboncha hiche napu chapa hi kapeh ahitai. 10 Hijeh a chu napu chapa hin anneh akimu jouna dinga nangma le na chapa te, chule nasoh ten ama dinga lou nabol peh dingu ahin, alousohga nahin pohpehji dingu ahi; ahin hiche Mephibosheth napu tupa vang hin keima ankong phunga an aneh jing jeng ding ahi,” tin thu apetai. Ziba kitipa hin chapa som le nga ana neijin, soh jong somni jen aneijin ahi.

11 Chuin Ziba in lengpa kom'a aseijin, “Kapu lengpan nasohpa keima nei thupeh bang-bang chun nasohpa hin gabol nange,” ati. Hiti chun hiche nikho apat chun Mephobisheth hin lengpa chate lah a khatpen bangin David ankong phunga chun an anejing jeng tan ahi.

12 Mephibosheth jong hin chapa gollhang khat aneijin, amin jong chu Mica ahi. Chu nikhoa pat chun Mephibosheth soh natong din Ziba insung mite abonchan apang tauvin ahi. 13 Hiti hin Mephibosheth akengphang teni kibaipa chu Jerusalem'a achengin, chule aniseh in leng ankong ah an anejing tan ahi.