THESSALONICA
MITE HENGA
PAUL LEKHA THOT NINA
Tuhchah in
Christa hungkitna ding hin mipeng thahho thohhat ding atilkhouve
2 Thessalonica sung thu umdan
Kikhel jing leiset'a um hijongleu hen, hiche lekhathot hin tonsot thu ding akikhel theilou ding thudol aseiye. Hiche lekhathot sunga Paul in vannoi kichai ding kimano phat ahijeng vanga, tonsot'a hinding kinepna nei hon Christian dou ho lah'a nitin hinkho kinepna neiya hinthei ahi thudol eihil-uve.
Bung khat sung hin Christian gimbol hesoh thoh hon, hahsatna athohsunguva tilkhouna Solchah Paul in aneina akisunin ahi.
Bung ni le thum sung hin ninunung chu hunglhunga chule hichu kichaiya ahitai, tia thuhil dihlou choiho thusei imudoh un ahi. Hiche bungteni hin Pakai Yeshua hungkit masanga thil soh ding phabep umho chu aseidoh in, chule Pathen in ahuhdohna tohgon chu thonlouva ahin suhbulhit ding ahi ti aseichen in ahi. Hijeh chun Houbung chu thohhat ding chule lungneng dinga tilkhouna anei ahi. Pakai Yeshua hungkit masang sea tahsan umtah'a gunchule thanom'a Pakai na itohjing diuvin, eitilkhou un ahi.
Lekhathot jihpa chule ajih kum
Solchah Paul'in 2 Thessalonica hi AD 50 ahilouleh 51 kum kichaikon lam'a ajih ahi.
Ipi dinga ajih ham?
Paul'in Thessalonica khopia mipengthah ho chu atahsan-u lunglhadah'a aum louna diuva Pakai nikho thu ahilchetpeh ahi. Hiche Thessalonica lekhathot nina sim jousen Pakai ngailutna le thohhat tah'a Pakai hungna ding kat-jinga umna eihil'u thudol kihoumatna a thu kisei kingai lha tobanga kisun ahi.
1
Lemna Thu
1 Hiche lekhathot hi Paul, Silas chule Timothy a kon ahi. Keiho hin I-Pau Pathen le Pakai Yeshua Christa a hi ho Thessalonica houbung henga kahinsut u ahi.✡Act 17:1 2 I-Pau Pathen le Pakai Yeshua Christa chun lungsetna le cham-lungmon napeuhen.
Christa hungkit teng thutanna
3 Sopi deitah teho, keihon nangho jal in thangvahna kanei jingui, ajeh chu natahsanu akhangtou jingin chule nangho khatle khat nakingailutnau akhangtou cheh cheh in ahi. 4 Keihon nangho gimbol hesoh nathohnau jouseuva tahsan naumnau thu chule hahsatna natou thudola thohhat le tahsan naumnau thu chu kisonpi tah in Pathen houbung dang ho koma kaseiyuve. 5 Chule Pathen in hiche gimbol hesoh thohna hi athutan dihna avetsahnom hintin, chule a Lenggama dinga loma nasemuva, hichena dinga chu thoh hahsa nathoh u ahi. 6 Athutan dihna jal a aman gimhesoh a nabolhou chu alethuh ding ahi. 7 Chule Pathen in nangho gimbol hesohna thoh ho le keiho dinga I-Pakaiyu Yeshua vana kona ahung kilah tengleh kicholdona eipeh dingu ahi. Ama Avantil thahattah ho to hung kilang ding ahiuve. 8 Pathen sei ngailouva chule IPakaiyu Yeshua Christa Kipana Thupha joplou ho chunga meikou jejua thutanna ahinlhut dingu ahi. 9 Amaho chu Pakaiya kona kikhendoh dingu chule aloupina thaneinaa kona a-i-tih a dinga tonsot gimbolna a mahthah dingu ahiuve.✡Isa 2:10 10 Ama chuche nikhoa ahung teng chuleh Aman amithengtea kona loupina amuding-atahsan ho jousea kona vahchoina akimu ding ahi. Chule hichea hin nangho jong najao uve, ajeh chu nanghon Ama thudol kaseipeh u chu natahsan tauve. 11 Hitia hi i-Pathen u chun Ama kouna totoh'a hinkho namansahna dinguva keiho hi nangho dinga taojoma kahiuve. Nanghon natahsan Pau chun thilpha natohsah jouseu chu nabulhit molsona dinguvin thaneina napeuhen. 12 Chutengleh i-Pakaiyu Yeshua chu nahinnau dung juiyin jabolin umintin, chule amatoh jabol a naumtha dingu ahitai. Hiche ho jouse hin hisah theiya um chu i-Pathen u lungsetna le Pakai Yeshua Christa jal ahi.
DRAFT COPY