TIMOTHY
HENGA
PAUL LEKHA THOT NINA
Thiding kon Lekhathot
Paul'in achaina dia thutah vengbit le peson dinga Timothy angeh
2 Timothy lekhabu sung thu
Thil hahsatah dinmun'a kon achaina Solchah Paul in ajih ahi. Paul dinga angailut aseijui henga dinmun hahsa jouse nunga alekhathot ahi. Paul in lainatah'a ahilchahna a kon Timothy bitkeiya ahung kilena hi eiho jouse dinga vetton umtah ahi. Kipaman simjou lou—Gospel Thupha dihtah le ngailutna keoseh, hahsatna jouse thoh, Pathen in ahaikhum athuhinga kisong in Gospel Thupha alhangsam jingin ahi.
Lekhathot jihpa chule ajih kum
Solchah Paul in Timothy henga ajih ahi, hichu AD 66-67 sunga Rome songkul anivei channa atan laiya ajih ahi.
Thusim chedol
Solchah Paul ani-channan songkul atang in, anung jui ho ding chun avel'a akilhadoh kit ding chu kinepna beihel ahitai. Nero khut'a kon in tahsan cha tamtah suhgimin aumtan, Paul dingin leiset hinkho chu sotta lou ding ahitai, ti ahetan ahi. Dinmun hahsatna ho, atundoh Houbung ho chule angailut Timothy hicheng ho jouse dinga achaina athucheng ho ahi.
1
Salam thu
1 Hiche hi Yeshua Christa solchah hidinga Pathen lunglhaina-a lhendoh a um Paul lekhathot ahi. Keima Christa Yeshua tahsan a kon hinna athutep seiphong dinga eikisol'ah ahi. 2 Kangailuttah kachapa Timothy dinga kajih ahi. Pa Pathen le I-Pakaiyu Yeshua Christa ngailutna le khotona chuleh lungmon na chun naumpi hen.✡Act 16:1
Jachat louding
3 Timothy, kapu kapaten apom banga selepha hetna lunggel thengtah puma kapom Pathen chu nang jal'in kathangvah e. Asun ajan in kataona a nangma kageldoh jinge. 4 I-kikhen a namitlhilon chu kageldoh in, nangma kamukit nom lheh jenge. Chule iumkhom kit tengleh keima kipana a dimset ding kahitai. 5 Natahsan dihtah chu kageldoh e, ajehchu napi Lois leh nanu Eunice a anaumdim masa tahsan chu nachan khompi ahi. Chule hiche tahsan chu nang'ah dettah in aum jinge ti kahen ahi.✡Act 16:1 6 Hichejeh achu, nachunga kakhut kangap a Pathen in lhagao thilpeh napeh chu nasuhlang jing dinga kahin geldohsahkit nahi. 7 Ajehchu Pathen in tijatna le meisanna Lhagao eipepouve, amavang thohhatna, ngailutna chule kitimthemna joh eipeuve.
Pakai jachatpi lou ding
8 I-Pakaiyu chung thu midang seipeh ding jahcha hih beh-in, chuleh ama jeh a songkul katan jeh hin keima jong neijachatpi hih in. Pathen in napeh thahatna chu kengin lang hiche kipana thupha jeh a hi thohgimna toh dingin kigosan um'in. 9 Ajehchu Pathen in eihuhdoh uva hinkho thenga hing dinga eikouvu ahi. Hichehi eiho ichandiu lom a eibolpeh-u ahipon, amavang phat kipat masangpeh a ama tohgon dungjuia abol ahibouve, amikhotona Yeshua Christa a kona eivetsah nom jal u ahi. 10 Tun eihuhhingpau Yeshua Christa ahung kilah chun hiche hohi eihet chetsah u ahitai. Aman thina thahat chu asumangin athupha hi mangchan thithei louna leh hinna lampi chu eisalvah peh tauvin ahi. 11 Chule Pathen in hiche kipana thuphahi hillhangle dinga solchah khat'a eilhendoh ahitai.✡1 Tim 2:7 12 Hichejeh-a chu, keiman hiche songkul'a hi kathohgim ahi. Ahinlah keima kajah achapoi, ajeh chu keiman katahsan chu kahechenin chuleh ama ahungkit kah-a achunga kakingap lhahna dungjuiya hi eikaihoi jing ding ahi ti katahsanin ahi.
Tahsan det
13 Keima a kona nahet thuhil dihtah Yeshua Christa a nanei tahsan le ngailutnaa kisemdoh chu chepin. 14 I-sunguva chengah Lhagao Theng thaneina a kon chun nangman nakingansena thutah manlutah chu chingthei tah in kichin tup in. 15 Nahet ngaima bangin Asia gamkaiya kona hungho jouse Phygelus le Hermogenes changei chun eidalhagam tauvin ahi. 16 Pakaiyin ahepina giltah chun Onesiphorus leh ainsungmite umpi hen ajehchu aman eihung vil in eihung tilkhou jinge. Kabul put jongchu aman eijachat pipon ahi. 17 Ama Rome a ahung chun eihung mudoh kahsen muntin'ah eihol len ahi. 18 Pakai chu ahung kilekit nileh angailutna giltah chun umpi hen, chuleh Ephesus mun a chu itobang tah a phachom'ah hitam nangman nahesohnai.
DRAFT COPY