AMOS
THEMGAO LEKHABU
Amos Themgao Lekhabu Sung Thu Umdan
Israel lenggam Jeroboam in lengvai apoh sung chun, imalam jousea khantou machalna aumin ahi. Hiche phatsung chu Israel lenggam’a Sanakhang tin akihen ahi.
Hitia nei le gou, Sana dangka a akhantou tul tul-u chu, agamsunguva Pathen douna thil tampi boldohnan aneilo tauvin ahi. Gamsung chu doihouna maicham phung adim tan, huh leh jonna adim in, adeh in vaicha gentheite engbolna adimtan, thu adih’a kitanna ana um tapoi.
Hijeh’a chu, Pakaiyin Israel douna-a Amos chu themgao thilmu amusah’a, Israel mite gihsalna thu aphondoh sah ahi. Gam haosatah leh thaneitah hijongleu, a Pakai a-Pathen’u asuhmil tah jeh’un, Pakai achunguva alungdam tapon, anam pumpiuva lung ahei’uva akisih lou u’leh, achunguva gotna nasatah Pakaiyin achuhsah ding koncha ahitai, ti aphondoh sah ahi.
Lekhau Sung Kihop Khenna
Khatna, Pathen in Israel mite chunga alunghanna thutanna leh gotna ahinpeh ding phondohna ahi. Amahon Pathen toh akitepnau apalkeh un, Pakai doumah jeng aboltauve. Hijeh a chu ato diu gotna chu khohse tah hiding ahi (1:1-2:16).
Anina, Israel chateseh chunga hilouvin, akimvel’a cheng namdang ho chunga jong, Pathen in thutanna abolkhum’a, gotna apeh ding ahi. Ajeh chu amahon, Pathen mite Israel chate chu asugentheijun, noise tah’in aboluvin ahi. Israelte jong chule namdang ho chunga jong vahom’a pang ahi dan, Pakaiyin aphondoh ahi (3:1-6:14).
Achainan, Pathen in Israel mite gihna leh douna gaothu nga aseina lah’a, amite Israel khotonan nivei anungchon in, alung akhel in ahi. Akhonnan, Pathen in Israel avel’a atundoh kit ding aphong doh in ahi (7:1-9:15).
Lekhabu Jihpa Chule Ajih Kum
Amos, amin umje dan chu, “Pohgih-poh” tina ahi. Ama hi, Judah gamsunga khopi neocha Tekoa khomi ahi. Amahi themgao tahbeh ahipon, kelngoi ching’a pang anahi. Hiche lekhabu hi, Amos in ajih ahi. Ajihna phatsung hi, alhangpin 760-750 BC sung ahi. Hiche phatlai hi, Israel gamsung’a Jeroboam lengvaipohlai ahi.
1
Israel Gam Kimvel’a Cheng Ho Chung’a Thutanna
1 Juda gam’a, Teko’ah kho’a cheng kelngoi ching hat, Amos kitipa heng’a, hiche thuhi ana lhung e. Judah gam’a Uzziah lengvaipoh lai chuleh Israel gam’a Jehoash chapa Jeroboam lengvaipoh laiya, ling kiho masang kum nina-a chu, hiche thuhi Amos in themgao thilmua anamu ahi. ✡2 Lengte 15:1-7; 2 Thusimbu 26:1-23; 2 Lengte 14:23-29 2 Aman hitin aseije, “ Pakai ogin gimnei tah chu, Zion lhanga kon a hung kitum ding, chuleh Jerusalem khopia kon’a gamtin thong leuva hung ging ding ahi. Chuleh kelngoi ching ho hamhing dum jouse goplha ding, Carmel lhang’a hamhing ho geija goplha-a thigam dingu ahi.” ✡Joel 3:16 3 Pakaiyin hitin aseiye, “Keiman Damascus khopi talen manlouva ka lha louhel ding ahi. Ajeh chu amiten chonset abol bol jing uvin, anga deh pouvin ahi. Amahon Gilead mun’ah kamite chu thih kangkuiya chang kikui bangin abol’un, ahi. ✡Isa 17:1-3; Jeremiah 49:23-27; Zechariah 9:1 4 Hijeh’a chu Keiman Hazael lengpa inpi meiya kahal lhah ding, chuleh Ben-hadad lengpa kulpi jong kasuhmang ding ahi. 5 Keiman Damascus khopi kotpi ka tumboh ding, chuleh Aven phaicham a cheng miho katha gam ding ahi. 6 Pakaiyin hitin aseije, “Gaza khopi talen manlouva kalha louhel ding ahi. Ajeh chu amiten chonset abol bol jeng’un, anga deh pouvin ahi. Amahon kho jousea miho abon’un sohchang in atolmang un, Edom gam’a soh in ajohdoh gam tauvin ahi. ✡Isa 14:29-31; Jeremiah 47:1-7; Ezekiel 25:15-17; Joel 3:4-8; Zephaniah 2:4-7; Zechariah 9:5-7 7 Hijeh’a chu Keiman Gaza khopi bang ho meiya kahal lhah ding, chuleh akulpi jouse jong kasuhmang ding ahi. 8 Keiman Ashdod mite ka suhgam ding, chuleh Ashkelon lengpa jong ka suhmang ding ahi. Chuteng Ekron douna-a keiman ka khut kalha ding, Chuleh Philistine mi ahing doh amoh chengse jong thigam diu ahi,” tin Hatchung nung Pakaiyin aseiye. 9 Pakaiyin hitin aseiye, “Tyre khopi talen manlouva kalha louhel ding ahi. Ajeh chu amiten chonset abol bol jengun, anga deh pouve. Amahon Israel toh sopi unao hina akitepnau asukeh’un, khojousea miho abon’un Edom gam’a soh chang in ajoh doh gam tauvin ahi. ✡Isa 23:1-18; Ezekiel 26:1—28:19; Joel 3:4-8; Zechariah 9:1-4; Matt 11:21,22; Lk 10:13,14 10 Hijeh’a chu, Keiman Tyre khopi bang ho meiya ka hallhah ding, chuleh akulpi jouse jong ka suhmang ding ahi,” ati. 11 Pakaiyin hitin aseiye, “Edom mite talen man louva kalha louhel ding ahi. Ajeh chu amahon chonset abol bol jeng uvin, anga deh pouvin ahi. Amahon asopite, Israelte, chung’a chemjam apan’un adel jeng’un, dipdamna beijin aboltauve. Amahon, alungdam theilou jeh’un, asopite chu asat jing’un, chuleh nasatah in lunghang den in aum tauvin ahi. ✡Isa 34:5-17; 63:1-6; Jeremiah 49:7-22; Ezekiel 25:12-14; 35:1-15; Obadiah 1:1-14; Malachi 1:2-5 12 Hijeh’a chu Keiman Teman meiya kahal ding, chuleh Bozrah kulpi jouse jong ka suhmang ding ahi. 13 Pakaiyin hitin aseiye, “Ammon mite talen man louva kalha louhel ding ahi. Ajeh chu amahon chonset abol bol jeng uvin, anga dehpouvin ahi. Amahon gamgi kehbe na ding in, Gilead chu gal asat khum’un, numei gailai ho chemjam in agai acheuvin ahi. ✡Jeremiah 49:1-6; Ezekiel 21:28-32; 25:1-7; Zephaniah 2:8-11 14 Hijeh’a chu keiman Rabbah khopi bangho meiya kahallhah ding, chuleh akulpi jouse jong kasuhmang ding ahi. Hiche gal chu, chimpei nasatah kipei bang ding, chuleh huise gimnei tah gin bang’a, mi peng in husa kithong ding ahi. 15 Chutah leh alengpau leh leng chapate jouse abon’uva, migam’a sohchang ding’a kitolmang soh diu ahi,” tin Pakaiyin aseiye.
✡1:1 2 Lengte 15:1-7; 2 Thusimbu 26:1-23; 2 Lengte 14:23-29
✡1:3 Isa 17:1-3; Jeremiah 49:23-27; Zechariah 9:1
✡1:6 Isa 14:29-31; Jeremiah 47:1-7; Ezekiel 25:15-17; Joel 3:4-8; Zephaniah 2:4-7; Zechariah 9:5-7
✡1:9 Isa 23:1-18; Ezekiel 26:1—28:19; Joel 3:4-8; Zechariah 9:1-4; Matt 11:21,22; Lk 10:13,14
✡1:11 Isa 34:5-17; 63:1-6; Jeremiah 49:7-22; Ezekiel 25:12-14; 35:1-15; Obadiah 1:1-14; Malachi 1:2-5
✡1:13 Jeremiah 49:1-6; Ezekiel 21:28-32; 25:1-7; Zephaniah 2:8-11
DRAFT COPY