ECCLESIATES
THUHILPA
Thuhilpa Sung Thu Umdan
Thuhilpa jihpa hin thohgimna, lung opkaina ho phondohna chule tahsan jal’a kihambol-a thohgimna naho ahilchen in ahi. Hinlah aman, “Pathen pang louvin hinkho hi pannabei ahi,” ti amudoh in ahi. Chule haosatna le nomsatah’a khosah nan jong lungkimna ape joupon chule neh le chah neng jeng jung le thepna, hiche ho jouse jong hi Pathen akon ikigam lhat teng pannabei jeng ahibouve, atin ahi.
Thuhilpa hi mimal cheh kihambolna dinga lamhil phapen ahin, chule thil hahsatah jeng jong kimaitopi jouna thudol aum in ahi. Chugohkeu hilouvin, vannoi thil ho pannabei jeng ahi, tijong aphongdoh in, amavang sunggil-a kon Pathen hol jousea din muna beilam pen ahi.
Thuhilpa Jihpa Chule Akijih Kum
Akhang khanga chondan toh kisaijin Solomon in anajih ahiti, akicheh in chule aman vai ahop kum 970 le 930 BC sunga anajih ahi.
1
Ijakai Pannabei Ahi
1 Hiche hi Thuhilpa, Jerusalem’a vaipoa pang, Leng David chapa thuseidoh ho ahi. 2 Thuhilpa chun, “Ijakai ajehbei tobang ngen ahi, ajeh bei tobang ngensen ahi sohkeije,” ati. 3 Nipi noija hi mihon atoh gim jeh’uva hi ipi aki mudoh uvem?
Thil Ijakai A’umden Ding Aum Poi
4 Khang achemang in, khang ahung lhung kit in, hinlah leiset hin kikhelna aneikha hih laiye. 5 Nisa ahung sohdoh in chule alhum kit jin, chule kinotah’a kipandoh kit ding in akigopai jin ahi. 6 Hui chu lhang lama anung in, chule sah lama ahung kihei jin ahi. Avel kol avelkol in, ahui nun chun akollin ahi. 7 Vadung ho tuikhanglenna alonglut’uvin, hinlah twikhanglen adim thei deh poi. Chuti chun twi ho chu vadunga ahung kile kit jiuvin chule ahung longdoh un twikhanglenna chun alut kit jiuve. 8 Thil ijakai hi seithei lou hellin thachol chol a um'in ahi. Ijat imit uva imu vang un ilungnau achim poi. Ijat ina khang uva ijah jeng vang un ilunglhai jou pouve. 9 Achesa thusim kivelso kitna ahibouve. Masang peh’a ana kibol chaisa ngensen ahiuve. Nisa noija imacha thil athah tahbeh aum poi. 10 Khatvei veileh mihon aseijun, “Imacha athah kiti aum poi,” atiuve. Hinlah tahbeh mong in alui ahi bouvin, imacha athah kiti hi aum poi. 11 Achesa phatna ipi anasoh em ti igeldoh pouve, chule khang ahung lhung ding hoa jong tua i-thilbol houhi koiman ahetdoh lou ding ahitai.
Thuneina, Chihna Le Hetna Chun Agilou Asubei Joupoi
12 Keima, Thuhilpa hi Israelte leng kahin, chule Jerusalema chenga kahi. 13 Hetkhen themna holdoh theina ding in keima ka kipum pehdoh jeng in, chule nisa noija na kitongdoh ho chengse hi chihna’a kholdoh ding in ka gel’e. Keiman kahin mudoh chu Pathen in mihemte henga aumna akiphondoh hi ahi. 14 Keiman nisa noija thil ache jomho ijakai hi kavetna ahileh atahbeh in, abonchan ajeh bei aphachom lou ding tobangbep ahije. 15 Adih lou chu aki sudih tahbeh joupon, chule amangsa jong chu akinung mukit tapoi. 16 Keima ka lungthima ka kihoulim in, ka seijin, “Ven, kamasanga Jerusalema leng changho vaihomlai sangin jong ka ching joi. Keima amaho khatpen sangin jong chih john a le hetjohna kaneije ,” kati. ✡ 1 Lgt 4:29-31 17 Hiti chun keima ijakai chihna’a konna ngolna chule kingol sahna geija hetdohna ding in ka kalsong doh in ahi. Hinlah keima tah in kahetdoh chu hiche ho jouse hi pannabei thil tobangbep ahije. 18 Ka chihna akibe cheh le ka gimna akibe cheh in, hetna akalbe cheh le lunggim na akibe cheh bepmin ahi.
DRAFT COPY