1 Leng Xerxes vaipoh laiya thilsoh ho ahi, ama hin India a pat a Ethiopia gam geija gam 127 chunga vai anahop ahi. ✡Ezra 4:6 2 Hiche phatlai chun Xerxes lengpa chu Susa khopia alaltouna a ana touvin lengvai anapo in ahi. 3 Avaihomna kum thum channa a chun amilen le amilal ho jouse ding leh vaihom ho jouse dingin golvah loupitah khat ana bollin ahi. Hichea pang ding hin Persia le Media gamsunga leng ho leh sepai lamkai ho jouse jong akouvin ahi. 4 Golvah loupitah chu 180 geijin achelhan ahi. Hiche sung chun, agamsung loupina le thaneina, ahaona le aloupina atah langin ahi.

5 Hicheng chu akichai soh phat in, lengpan Susa khopi sunga um mi alenpen apat aneopen gei dingin golvah khat abolkit in ahi. Hiche chu lengpa khopi honsung tollhanga chun nisagi achelha kit in ahi. 6 Hichea hin leng inpi leitol chu pondal, ponkang jong, pondum jong tupat ponnem patjang chutoh akijopmat sohkeijin, ponsandup chuto jong akijop in, dangka sumkol ho chutoh akijopmat sohkeijin, songval khompia kisem'a kiphut hoa chun akihenin ahi. Phatah a kijempol kalbilei jong chu sana le dangka kiphan songmantam toh akihalin songval akigollin, twikoh chang le songmantam dang-dang tampi toh akihalin ahi.

7 Leng ina ju chu nengchet a jat chom-chom'a kijem sana khon ho a chu kidon ahin, hichun lengpa ning lhinna le ahong phalna atah langin ahi. 8 Akhopi sunga vaihom ho chun min ama-ama ngaichat dungjui cheh a agot channa adon ding uva ahopdoh diuvin lengpan thupeh aneijin ahi.

9 Hiche toh kilhon hin lengnu Vashti in jong leng Xerxes khopi sunga numeiho dingin golvah ana bollin ahi.

10 Hiche golvah nisagi channa nia chun lengpa Xerxes chu ju akham lheh jengtan ahileh ama jenlea pang nukiso mi sagiho—Mehuman, Biztha, Harbona, Bigtha, Abagtha, Zethar chule Carcas chu— 11 Lengnu Vashti in alallukhuh kikhuh puma lengpa angsung’a hung dingin gapuijun tin asoltan ahi. Amanu chu numei hoitah ahijeh chun amilen amilal ten amel-hoina chu ana vetsohkei diu chu adei ahi. 12 Ahinlah ama hon lengpa thupeh chu lengnu Vashti kom’a aga hetsah phat un amanu chu ahung nom tapon ahi. Hiche chun lengpa chu alung hansah lheh jengtan, alunghan akoudoh leuvin ahi.

13 Aman Persia mite dan le chena lhongpiho hethem ama thumop a pang phat tinna ana doh jingsa ho chu gangtah in adong tan ahi. 14 Amaho min chu Carshena, Shethar, Admatha, Tarshish, Meres, Marsena chule Memucan—Media leh Persia mithupi sagi ho chu ahiuve. Amaho hi lenggam sunga panmun sangpen loiho chu ahiuvin, lengpa toh phat tinna kimuto jing jiuva ahi.

15 “Lengnu Vashti hi iloding ham? Lengpa keiman nukisoho kaga kousah a lengpa thupeh palkeh a hung nomlou lengnu chu dan dungjuiya itobang gotna peh dinga lom am?” tin lengpan adongtan ahi.

16 Memucan chun lengpa leh amithupi ho chu hiti hin adonbut e, “Vashti lengnu hin lengpa keo hilouvin na lenggam pumpi sunga milen milal ho jouse leh gamsunga cheng mipi ho jouse hi anoise ahi. 17 Lengnu Vashti hin lengpan akom’a hunghen tin akou in anompoi tihi muntin'a numei hon ajah tengu leh ajiteu hi anoise diu ahitai. 18 Tu nilhum masang ngei hin Persia le Media gamsunga milen milal ho jouse jiten lengnu umchan hi hin jadoh untin ajipa teu hi ahin nahsah lou diu ahitai. Hitia chu lung hanna le thangtomna a hung dimset diu ahi.

19 Hijeh chun lengpan na phatsah dinga ahileh Persia le Media gamsunga khel thei louhel ding dan khat jihtho inlang phongdoh lechun kadeije. Lengnu Vashti hin lengpa Xerxes hi amai amukit tah louhel dingin a imatih channa dingin kaidoh in umhen lang lengpa dingin nakiloppi tah lengnu chomkhat kilheng doh hen katin ahi. 20 Hiche dan hi lenggam pumpia hi ahung kiphondoh tengleh muntin'a mipate hin itobang panmun nei hijongleu aji teuva konna achan diuva lom jana akimu diu ahi!” atipeh tai.

21 Lengpa le amilen amilal ho jousen Memucan thumop hi pha asa sohkei tauvin ahi. 22 Hiti chun lengpan agamsung pumpi gamkai sung jousea ama-ama pao le lekhajem a athotdoh in, mipa jouse hi ama-ama insunga thanei vaihom hi ding chule athu thua hi ding ahi, tin aphongdoh tan ahi.