1 Israel mite (hichu, Jacob chapate), ama insung mi cheh hin kipuija Egypt gamsung'a apau toh kitollut ho min chu: ✡Semtilbu 46:8-27 2 Reuben, simeon, Levi, Judah, 3 Issachar, Zebulun, Benjamin, 4 Dan, Naphtali, Gad chule Asher amaho cheng hi ahiuve. 5 Abonchauvin, Egypt gamsung'a Jacob chilhah chengse chu som sagi alhing'un chule Joseph vang agamsung'a ana um jingsa ahitai. 6 Phat chomkhat jouvin, Joseph le asopi chengse athigam tauvin, hiche khang mite se chu akichai tan ahi. 7 Ahinlah ason achilhah teu, Israel chate chun tu le cha tampi anei tauvin apung lheh jengun, ahung hatdoh cheh cheh un gamsung pumpi ahin lodim tauve. ✡Act 7:17 8 Achainan, Egypt gamsunga chun Joseph chung chang thu le anatoh ho hephalou leng thah khat thaneina ahung chang tan ahi. ✡Act 7:18 9 Amapa chun amite henga thu aseijin, “Vetem'un, Israel mite hi eiho sang'in apung'un chule eiho sang'in ahat lheh jeng tauve. 10 Amaho hi apunbe louna diuvin, tohgon khat nei tau hite. Achuti louva ahile hung hatdoh untin, chule gal hung um taleh, imelma teu ahin panpi diu eihin dou uva gamsunga kon'a jamdoh ding ahiuve,” ati. ✡Act 7:19 11 Hijeh chun Egypt miten Israel chate jouse soh in amangcha tauvin, achung uva tohvaihom mikhanse tah tah ho apansah un, chutobang bolgimna soh natoh a kon'a chu suhnem ding akinem'un, hunam chang'in lengpa thil kholna ding Pithom leh Rameses khopi chu asah sah uvin ahi. 12 Ahinlah Egypt mite'n amaho asuhgim chan'un apunbe uvin akithejal cheh jo tauvin ahi, Egypt mite chu kichat nan aum jo tauvin ahi. 13 Chutah chun Egypt miten Israel mite chu ngailutna beihel'in thohgim hahsa athohsah uvin na atohsah un ahi. 14 Aki manchahna jouse uva gimna alhun sah un, bon ngan achilsah un, leilhang asemsah un, loujaova natoh jouse atohsah un, atoh nalam jouseuva gimbolna achansah tauvin ahi. 15 Chuin Pharaoh, Egypt lengpan Hebrew mi nao dom teni Shiphrah leh Puah henga hiche thupeh hi aneiyin: 16 “Hebrew numei hon nao anei uva nao dom'a napan teng lhon le, hichu phatah in vechil lhonin lang, naosen chu pasal ahileh natha lhon ding; numei ahile vang na hinghoi lhon ding ahi,” ati. 17 Amavang naodom teni chun Pathen agin lhon jeh chun, lengpa thupeh chu anahsah lhon tapon, naosen pasal'a hungpeng lha ho jong chu ahinghoi lhon tan ahi. 18 Chuin lengpan naodom teni chu aheng'a akouvin, “Ipi jeh a hiche hi nabol lhon hitam?” tin adong'in, chule “Ipi jeh a naosen pasal ho chu, nahinghoi lhon ham?” tin ajah lhon'a aseiyin ahi. 19 Naodom tenin adonbut in “Hebrew numei ho hi Egypt numei hotoh abang pouve, amaho hi athohhat un aheng'u akilhun masang'in amaho le amaho bailam tah in ana kidoplhah jitauvin aphatchan kalapji lhonpoi,” tin asei lhon'e. 20 Pathen chu naodom teni din aphalheh jengin, Israel te chu apunbe cheh cheh tauvin ahile, athanei nau jong ahung hatdoh cheh cheh jeng tan ahi. 21 Naodom teni in Pathen agin lhon jeh chun, Pathen'in amani chu ama ama ding cheh insung asem dohpeh lhon'in ahi. 22 Chuin Pharaoh in amite jouse hiche thupeh hi aneiyin: “Hebrew naosen'a penglha pasal kiti phot chu Nile Vadung lam'a na pailhah jeng diu, ahinlah numeiya hung peng chengse vang chu hing hoiyun,” ati. ✡Act 7:19