GALATIA
MITE HENGA
PAUL LEKHA THOT
Jalenna thutah kipana thupha tuhchah dinga houna
Galatia lekhabu sung thu umdan
Galatia lekhabua kon hin lhagaova damna muchet ahi. Hichu tahsan vanga huhhingna'a kon ahi ti, kichen tah in aseiye. Lekhathot kipatna lam ah lemna, phatthei taona chule thangvahna thudol asei masan ahi. Hiche lekhathot hi ajatchom deuvin ahi. Ajeh chu atumbeh'a lemna aumin, lungsetna chidang namdangte chule chamna Judate hichu Greek le Hebrew thusei hoa kon, Paul chun phatthei le taona toh thoa ajuipeh ahi. Paul chun angailut Galatia mite chu Kipana Thupha dihlouva konin ana huhdoh in ahi.
Galatia lekhabu hin Gospel itilam dol'a nakisan ham ti, nahin geldohsah ding chule niseh na lhagao hinkhoa iti naman chah ding ham, tijong nahet doh ding ahi. Paul chun Galatia mite kihen ohna tampi adih louva konin gospel chamlhatna achun ahinle puiyin ahi. Hiche bang chun eiho jong kihen-oh na tampia kon Christa a chamlhatna dihtah chun eihin lepui tauhen.
Lekhathot jihpa chule ajih kum
Solchah Paul in akhat channa Missionary ache jouva ajih ahi. Hichu AD 48, Jerusalem Council masang ahi.
Koi henga ajih ham?
Galatia mun'a Christa tahsan ho hichu Rome gam vaipohna mun lailung tua Turkey, Houbung sunga adih louva kihilna ho suhdihna dinga ajih ahi.
1
Lemna thu
1 Hiche lekhathot hi solchah Paul, mihem lhen le mihem thuneina vanga hilou, Yeshua Christa Amatah le Yeshua athia kona kaithouva Pa Pathen pansah pa, a kon ahi. 2 Hikoma sopite ho jouse panna a Galatia houbung ho henga lemna thu kahin thot nahiuve. 3 I-Pau Pathen le Pakai Yeshua Christa chun lungset le cham-lungmon napeuhen. 4 Ichennau vannoi gitlouna a kona huhdoh ichan theina ding uvin, Pa Pathen lunggon dungjuiyin, Yeshuan ahinna eiho chonset jal'in ahungpe tan ahi. 5 Atonsot tonsot a dingin loupina chu Pathena hijing tahen! Amen.
Kipana Thupha dang umlou
6 Nangho Christa ngailutna khotona a kona, Ama a dinga nakoupau Pathena kona nakihei mang loi jengu hi kahin datmo lheh jeng nahiuvin ahi. Nangho hin lampi achombeh najuiyu ahitai. 7 Hinlah Kipana Thupha tahbeh chu ahitapoi. Christa chungchang thua thudih heikoi hon nangho na ngol bolu ahitai. 8 Keihon nangho henga Pathen Thu kahung seiphongu kalvala Kipana Thupha chom dang khat seiya auma ahileh keiho hiuving ting ahilouleh vana kona vantil khattou hijongleh Pathen gaosapna achunga umhen. 9 Keihon kaseisau kavelsei kit ahi. Nanghon nanajopsau kalvala Kipana Thupha achom seiphonga aumleh ama chu gaosap chang hen. 10 Mitmua miho seiphat hol a kahipoi, Pathena kon joh chu kahol ahi. Miho lunglhaisah ding chu kalunggon ana hitaleh keima Christa soh hilou kahi ding ahitai.
Paul solchah'a apanna ajeh
11 Sopi deitahte, keiman nangho kahetchensah nomu chu Kipana Thupha thudol kaseiphong hi mihem lunggel ngaitoa kingam'a ahipoi. 12 Keiman kathupohle hi mihem a kon ahipon, koiman eihil ahipoi. Chusanga, keiman Yeshua Christan kahenga aphondoh hoa kona bou kamu ahiye. 13 Juda mite hou lama itobang loma katompana Pathen houbung chu keiman kanabolset hitam ti naheuve. Keiman hichu suhmanghel kanagot ahi.✡Act 8:3; 22:4,5; 26:9-11 14 Kapu kapaten achepiu houlam chonna lamdol a keima Judah mi kachan khompi ho sanga gamchenga chung nung joa kana hi ahi.✡Act 22:3 15 Hinlah keima kapen masang jenga jong, Pathen in eilhendoh a, chule Alungsetna kidangtah a chu eikou ahi. Ajeh chu hichun Ama alung lhaisah ahi.✡Act 9:3-6; 22:6-10; 26:13-18 16 keiman Kipana Thupha Yeshua thu chu chidang namdang ho koma kaphondoh na dinga AChapa chu kahenga aphondoh ahi. Hichu ahunghi phat in, keiman mihem khattou to kihoutohna dingin kamoh kino jengpon ahi. 17 Chule keima masanga solchah himasaho to kihoutohna dingin Jerusalema kakaltou dehpoi. Chusangin, keima Arabia gam lama kachemangin chule khonungin Damascus khopia kahung kinungle kit in ahi. 18 Chujou kum thum alhinin, Peter to kiheto dingin Jerusalema kaga chetouvin, chule amato chun ni som le nga kaumkhomin ahi.✡Act 9:26-30 19 Hiche pet a chu seijui dang kakimupi khat chu Pakai sopipa Jacob chu ahibouve. 20 Keiman Pathen masanga nahenguva kahinjih a kaphondoh hohi jou apangpoi. 21 Hiche kagavil jou chun keima Sahlamsang Syria le Cilicia gam sunga kagalut in ahi. 22 Chule hiche pet achu Judea gam'a houbung ho chun keima einahetchen loulaiyu ahi. 23 Amahon miho seinaa ahet u chu, “Eiho eigimbol hesohpau chun asuhmang got tahsan chu tun aseiphong tai” tin aseiyuve. 24 Chule amahon keima jal'in Pathen avahchoiyun ahi.
DRAFT COPY